Fiisi kaɓɗohu Heber ci
Rangsohaani
Ali ɓo' inahɗi yi fiis kaɓɗohii, wala ɓooɓi fiisɗuu wa. Wa cambohɗi findi fiisi na kaɓɗohse na cambohe, waaye wa reehoh ɗaa, na kañɗoh.
Wa miniɗ nik ne cambohaani saɓsukoh saɓsukoh naa, wi wa na fiisissasse.
Fu jang kaɓɗohii ɗah, fu na hote ne wa fiisu wuu ɓi ɓo' ɓi inah baahiɗ Fiis ciŋ Ambtiɗohi Koc. Wa miniɗ nik ne e Yawuut ci fiisuu wa (weɗ tah wa teekuusa Heber ci). Wala wa nam fiisu wuu ɓooɓi kos te ɓa nikɗi Yawuut waaye ɓa jangiɗ Fiis ci maañiɗ ci.
Ɓa yaaɓeen sagu kosiŋ ɓa, waaye wa reyeeɗi ŋ kakaan. Yi fiisa neƴƴohiɗ ne ɓa faɗ Yeesu, ɓa dokuk ŋ Ambtiɗohi Koc.
Ineem weɗ tah kaɓɗohi na teeɓohe ne Ambtiɗohi Asi weɗ uup Ambtiɗohi Koc : Yeesu a yi uup malaakaaci, a yi uup Musaa, a uuppa seeƴkiɗoh ci yakak ci rimkoh ŋ Aaruna. Kaɓɗohi na teeɓohe ne Fiis ci gapohiɗ ambtiɗoh as. Ca teeɓoh Yeesu findi Seeƴkiɗoh yakak, yi seeƴkoh haf ce waas yino jameet wuu ɓooɓi jen.
Fiisi kaɓɗohu Heber ci kaɗtiɗoh an :
- Kooh woyiɗ taamboh ŋ Kuɓkiŋ ɗe1:1-3
- Kiristaani a yi uup malaakaaci 1:4–2:18
- Kiristaani a yi uup Musaa na Yosuwe 3:1–4:13
- Kiristaani a yi uup yak seeƴkiɗoh ciŋ waasiŋ Musaa4:14–8:6
- E Ambtiɗohi Asi dong min nihis bakaaɗ 8:7–10:39
- Kosaŋ caac ca 11
- Findi ɓo' joy pesoh ŋ Ambtiɗohi Asi 12:1–13:19
- Kiimi na askohi 13:20-25
1
Kooh woyiɗ taamboh ŋ Kuɓkiŋ ɗe
1 Ŋ maañiɗ, Kooh taambohee ŋ woosuuɗ ci, a woosa na caac ciŋ ɓoo waas laayiɗ te woyohaaɗ ci ɗalohha.
2 Waaye ŋ jamanoociŋ reehɗohaaniŋ adinaani ɓoo nikoh cii, a woyiɗ na ɓoo taamboh ŋ Kuɓkiŋ ɗe. Ŋ camba, adinaani na findi wa na tiindohe jen, a feroha Kuɓkeem. Te a yi a eɗan in ci jen.
3 A yi siñaariŋ yaki Kooh yak, a yi sah ñaamaariŋ ini Kooh nik keeh-keeh. Te a yi raanuk adinaani jen na woo kiŋ ɗe raakiɗ hatili. Wi a tum po ɓooɓi minnda hoolɗu ŋ bakaaɗ ciŋ ɓa, weɗ a kaɗoh ŋ Eel ci, a ɓooffa ŋ ñaahmiŋ Kooh yi buur.
4 A uuppa malaakaaci findi tiiki Kooh eɗ ɗe uupoh ciŋ ɓa.
Kuɓki a yi uup malaakaaci
5 Laam, ɗu inhiɗ ne, woo ki Kooh woo ŋ ɗooƴ Fiis ci Hooliɗ ci wii :
« Woti, ñam Baabiŋ ɗa,
a fu Kuɓkiŋ ngo. »
a moosɗaa woo ali malaaka. Te a namɗi woyoh ŋ ini kaɗ ŋ ali malaaka ne :
« Ŋ hey nike Baab nga ɗe,
a nik nga so findi Kuɓu. »
6 Te wi a na haytohe Kuɓkiŋ ɗe saawi ŋ Adina, Fiis ci woo ne :
« Malaakaaciŋ Kooh jen ƴekɗaat ɗe ! »
7 Inii weɗ Fiis ciŋ Kooh woo ŋ ini kaɗ ŋ malaakaaci :
« A tum malaakaaci findi puuɗis ;
ɓeɗ pangkoh ciŋ ɗe,
a tummba ɓa findi jaal yongkaah. »
8 Waaye ini Kooh woo Kuɓkiŋ ɗe ŋ Fiis ci weɗi wii :
« Eey Kooh, Nguuriŋ ɗa genan gen,
te salmaariŋ wa, weɗ wiŋ waasi yurhiɗi.
9 Fu teeɓohiɗ ne fu waaɗ in yurhiɗ,
fu sang ini nikɗi waas, weɗ tah, eey Kooh,
Koohiŋ ɗa tannda ɗa ŋ ɗooƴ huntoh ciŋ ɗa,
a diwiɗta ɗa hafiŋ ɗa diw eeñiɗ,
wa hunnda na sum. »
10 Kooh namiɗ woo ŋ Fiis ci ne :
« Ngaŋ camba, eey Heɗi, a fu yip kehƴi
te a fu haɓiɗ Eel ci na yaah ciŋ ɗa.
11 In ceem jen hey sooƴe waaye fu, fu genan gen.
Eel ci na kehƴi jen hey kaane findi kulɓa,
12 fu lem ca findi palto.
Wiiriis as degu findi ɓoyi ɓekkis,
waaye fu, fu risan mand findi fu mand ;
kipes kiŋ ɗa reehanɗi. »
13 Markaat rek ! Ini Kooh woo ŋ Fiis ci wii :
« Haya fu ɓoof ŋ ñaahmiŋ ngo,
po mbaɗna ŋ folan sangiɗ ciŋ ɗa ŋ kehƴi,
fu tum ɓa degoha kot. »
A moos woyoh yinde malaaka in mand na weem ?
14 Malaakaaci, ca jen ca pangkoh ci minɗi hotu haa e ? Ca woosu ne ca ɓaatɗoh ɓi rahsan muci haa e ?