4
1 Mbaa, Kooh gapiɗ ɓoo ne ɓoo miniɗ rahas iɗsiɗki a woye. Te gapohiŋ ɗe weem, wa ris po wi. Kon ɓoo wortukaat po ali ɓo' nga ɗu kinaat ambu findi ɓo' tasiɗ finho.
2 Laam ɓoo namiɗ yegɗu yegɗoh muc findi ɓa fiɗaaf caŋ ɓa keenee ŋ kehƴa hulanga. Woo ka ɓa yegɗasse, wa njirñeeɗi ɓa in sagu ina ɓa ɓaaheeɗi kos na ɓa teyɗukee wa.
3 Waaye ɓoo ɓi kos, ɓoo hey rahse iɗsiɗki Kooh na woye wi a woo ne :
« Sagu ayruki ŋ ayruke,
ŋ ginnja ne :
“ Ɓa rahsanɗi muk
iɗsiɗki ŋ gap ɓa. ” »
Moona Kooh ƴutiɗ ŋ pangkiŋ ɗe wa a fer Adina poyi.
4 Raakiɗ ɓaki woo ŋ Fiis ci, ŋ ini kaɗ ŋ mbeha yasna-kanakɗoh, ne : « Kooh iɗsiɗkiɗ ŋ mbeha yasna-kanakɗoh wi a ƴut ŋ panguk ciŋ ɗe jen. »
5 Waaye, ŋ Fiis cii, a woyis ne : « Ɓa rahsanɗi muk iɗsiɗki ŋ gap ɓa. »
6 Ɓi koc kerah yegɗoh muc, ɓa rahasɗi iɗsiɗki sagu kerhiɗaaɗi Kooh. Waaye wa wooriɗ ne raakiɗ poyi, ɓi joya min rahas.
7 Ineem weɗ tah, wa degga kiis laayiɗ, a gapissa mbeh wiiriis, a teekkaa "woti". A taambohha ŋ woosuuɗi Dawuuda a woosaa, ngaŋ Fiis ci ɓoo raaw jang an :
« Woti,
ɗu kerah hoosooriŋ Kooh ɗah,
kinaat ndeng haf. »
8 Kur ka Yosuwe aasɗohee caac caŋ ɓoo nikeen ɗiski ɓa joy iɗsiɗkoh ɗah, Kooh heeɗi woyisse ŋ ini kaɗ ŋ mbeh wiiriis.
9 Kon po woti, Kooh ɗaakɗiɗ ɓooɓiŋ ɗe jamano iɗsiɗkoha findi mbehi yasna-kanakɗohi.
10 Laam ɓo' nu rahas iɗsiɗki a gapoh ɗah, fu namiɗ iɗsiɗuk ŋ panguk ciŋ ɗa findi Kooh iɗsiɗkoh ŋ ciŋ ɗe.
11 Kon mbaa ɓoo ndengɗukaat, ɓoo rahas iɗsiɗkeem ne ali ɓo' nikuu kerhiɗaaɗi po a kee keena findi caac caŋ ɓoo.
12 Laam woo kiŋ Kooh wii pes te wa raakiɗ hatil, weɗ uup kaañ ndang nu na nguɗe na ɓak kanak ɗah. Weɗ na kaɗe po wa saɓsoh coonndiŋ ɓoyi na liiɓiŋ ɗe, pok pok ciŋ ɗe na soriŋ ɗe te wa inhisohee ini ɓo' waaɗ ŋ ɗooƴ keeñ na ini a na liiɓe.
13 Raakɗi feruuɗi ɗemb Kooh, in ci jen rangsukiɗ halang ŋ fiki Kooh, Yi ɓoo woyan in ci ɓoo tum.
Seeƴkiɗohi yakki
14 Ŋ woyeen ne ɓoo raak Seeƴkiɗoh yakak. A Seeƴkiɗoh yakoh na yakoh yi taamb ŋ Eel ci po reesa ŋ ɗiskaŋ Kooh, a Yeesu Kuɓkiŋ Kooh. Kon ɓoo nengaat baahiɗ ŋ waasi ɓoo na woye ne weɗ ɓoo kos.
15 Seeƴkiɗohi yakki ɓoo raak miniɗ ɓaah na ɓoo yeg-yeg ŋ mitaaɗiikiŋ ɓoo. Kinaat liiɓ ne a minɗaa ! A miniɗa, laam a jaɗɗuuɗ fiir ŋ in ci jen findi ɓoo. Waaye, ŋ fiiri a fiirsee weem, a moosɗi bakaaɗoh.
16 Kon, ɓoo kinaat supuk, ɓoo reɓaat ŋ ɓoofohaaniŋ Kooh yi na ɗaasohe, ne ɓoo min ɗe misik, a baahoh ɓoo, ŋ ineem, a min ɓoo hirip ŋ jamanooniŋ wa.