17
Yeesu kiimɗiɗ taalubeeciŋ ɗe
1 Wa Yeesu ƴut woo in ceem, a taaknukka ŋ Eel ci, a woosa ne : « Baab, wahtuuni reyiɗ ! Teeɓoha yaki Kuɓkiŋ ɗa yak ne Kuɓki teeɓoh yaki fu yak.
2 Laam fu oniɗ ɗe min-min ŋ ɗafuk ɓooɓi jen ne a on ɓi fu deg ŋ yaah ce jen kipes ki heyɗi reehe.
3 Te kipes ki heyɗi reehe weɗ ne ɓa inah ɗa, fu yi Koohi yino-kongi ; te ɓa inah Yeesu Kiristaa, yi fu woos.
4 Ŋ teeɓohiɗ ŋ kehƴi yaki fu yak, ŋ ɗiindohi ŋ ɗiindoh pangki fu nakee so.
5 Baab, ɗiski wa nik, eɗ to ŋ seroofu yaki ŋ yakee ŋ seroofu bala Adina fersan.
6 Ɓooɓi ɓaahee ŋ Adina te fu degga ɓa ŋ yaah ho, ŋ inhiɗiɗ ɓa tiikiŋ ɗa. Ɓa nikee ɓiŋ ɗa, fu eɗta so ɓa, te ɓa taambɗiɗ woo kiŋ ɗa.
7 Ɓa inhiɗ kotii ne in ci fu eɗ to jen, ca puloh nga ɗa.
8 Ŋ wikiɗ ɓa woo ci fu woo so ne ŋ woo ɓa ca ; te ɓa teyiɗ ca, ɓa inhiɗ keeh-keeh ne ŋ puloh nga ɗa, te ɓa kosiɗ ne yaf woos so.
9 Mi na kiimɗee ɓa. Ŋ kiimiɗɗi Adina, mi na kiimɗe ɓi fu eɗ to, laam ɓa ɓiŋ ɗa.
10 Ini ŋ raak jen, a fu raaka te ini fu raak, ñam raaka ; yaki ŋ yak teeɓohkiɗ nga ɓa.
11 Tas ƴissuut, ŋ nikissanɗi ŋ Adina, mi na hee nga ɗa, waaye ɓeɗ, ɓii ŋ Adina. Baab, fu yi Hooliɗi, niiɗaa ɓa ne ɓa min nik yino findi ɓoo nikoh yino mi na ɗa ; niiɗa ɓa ŋ hatiliŋ tiikiŋ ɗa, tiiki fu eɗ to.
12 Wa ŋ nik na ɓa, ŋ niiɗiɗ ɓa ŋ doolndiŋ tiikiŋ ɗa, tiiki fu eɗ to. Ŋ taambkohiɗ ɓa po ali yino sooƴɗi nga ɓa, ɗal yi joyee sooƴ ne ini Fiis ci woo raak.
13 Te ɗiski wa nik, mi yii hay nga ɗa ; mi yii woo woo cii ŋ ini ŋ ris ŋ Adina ne ɓa min sum sum kiŋ ngo, sum kiŋ ɓa mit.
14 Ŋ eɗiɗ ɓa woo kiŋ ɗa, te Adina sangiɗ ɓa sagu ini ɓa ɓaahɗi ŋ Adina, findi ŋ namɗi ɓaahoh nga.
15 Ŋ kiimɗi ɗa ne fu kooɗoh ɓa ŋ Adina, waaye mi na kiimee ɗa ne fu niiɗ ɓa po Seytaani raakuu waas nga ɓa.
16 Ɓa ɓaahɗi ŋ Adina findi ŋ namɗi ɓaahoh nga.
17 Tufkiɗohaa ɓa keeh ki, ɓa nik ɓo' hooliɗ wuu fu ; woo kiŋ ɗa weɗ keeh ki.
18 Findi fu tuuƴoh ho ŋ Adina, ŋ tuuƴoh ɓa nga ɗaa.
19 Ŋ eɗiɗ ɗa haf fo jen, ŋ nikka wuu fu saguuɓa, ne ɓa nam eɗoh haf ɓa wuu fu taamboh ŋ woo kiŋ ɗa, te weɗ keeh ki.
20 Ŋ kiimiɗɗi ɓa ɓeɗ dong, waaye ɓeɗ na ɓooɓi kosan ndo taamboh ŋ woo ciŋ ɓa.
21 Baab, mi na kiimee ɗa ne ɓa jen, ɓa nik yino, findi fu nikoh nga so, ŋ nikka nga ɗa. Ŋ waaɗ ne ɓa nam nik nga ɓoo po adinaani kos ne a fu woos so.
22 Kiyak ki fu tum nga so, ŋ tumiɗa nga ɓa ne ɓa nik yino findi mi na ɗa nikoh yino.
23 Ŋ nik nga ɓa, fu nik nga so ineem tah po ɓa min nik yino keeh-keeh ne adinaani jen inah ne, a fu woos so, te fu waaɗiɗ ɓa findi fu waaɗoh ho.
24 Baab, fu waaɗiɗ to bala Adina fersan, tahha po fu tumiɗ kiyak nga so. Mi yii kiim ɗa ne, ŋ ɗiski ŋ nikan, ɓooɓi fu eɗ to nam nik na so nga, ɓa min hot kiyak keem.
25 Baab, a fu yurah, ɓi Adina inahɗi ɗa, waaye mi, ŋ inhiɗ ɗa te taalubeeciŋ ngo ɓii, ɓa inhiɗ ne a fu woos so.
26 Ŋ inhiɗiɗ ɓa tiikiŋ ɗa, te ŋ hey ɓa wa ɓaate inhiɗ po waaɗi fu waaɗ to nik nga ɓa, te mi, ŋ nik nga ɓa. »