21
Ɓi taalube hotiɗ Yeesu ŋ ɗiska ɓa seeɓe
1 Wa in ceem coot, Yeesu teeɓkissa jahran taalubeeciŋ ɗe, ŋ Cookmaŋ-Tiberiyad. A teeɓkoh ɓa an :
2 Simong Piyeer, na Tomaa yi na woyse Siisi, na Natanayel yi gen Kanaa ngaŋ Galile, na kuɓuuciŋ Sebede na taalube wiiriis kanak ɓeɗ nike.
3 Simong Piyeer woosa ɓa ne : « Maa kaɗ seeɓa. » Ɓa woosa ɗe ne : « Ɓoo hey hune na ɗa. » Ɓa kaɗta. Ɓa aassa gaal, waaye ŋ weka jen ɓa ambɗi ali in.
4 Na ɓaaɓa teel Yeesu tufukka ŋ sereendaŋ cookma waaye taalubeeci inahɗi ne a yi.
5 Yeesu woosa ne : « Ƴaaɓiŋ ngo, ɗu raakɗi kañam ki ɓo' min ambsoh na mbuuru e ? » Ɓa loffa ɗe ne « A'aa ! »
6 A woosa ɓa ne : « Njafaat mbaal ciŋ ɗu ŋ ɓaki ñaahmiŋ gaali, ɗu hey ambe ! » Wa ɓa njaf ca, ɓa minisɗi ca nook sagu cuurund ca laayiɗ ca ɓa ambe.
7 Taalubeeni Yeesu keeñkohee woosa Simong Piyeer ne : « A Heɗi ! » Wa Piyeer kerah ne a Heɗi, a tokka kulɓaakiŋ ɗe ŋ kinoh ki, raak ɗe ɓekukɗi in wiiriis ɗal kulɓaakeem, a faɗsukka ŋ masma.
8 Taalubeeca ɓinooɓa kaɗta teera na gaala, ɓa faseeɗa mbaala, raaka riifiɗ na cuurund. Ɓa useeɗi sereendaŋ cookma, wa joyee nik saangal teemet.
9 Wa ɓa ruhus, ɓa hotta yongkaah, ca aañind kaɓɗasse, na cuurund ŋ joli na mbuuru.
10 Yeesu woosa ɓa ne : « Hayaat na cuurund, ŋ ci ɗu amb. »
11 Simong Piyeer aassa ŋ gaala, a nookka mbaala ŋ hara. Wa riiffa na cuurund yakak teemet na ndaŋkiyaah-yatuus na kaahay (153), te ina ca laayee jen, mbaala faarkeeɗi.
12 Yeesu woosa ɓa ne : « Hayaat ɗu malnduk. » Ali taalube kaañɗi ɗe meekis ne : « A fu ɓa ? » Ɓa inheen ne a Heɗi.
13 Yeesu reɓpa, a ɓayya mbuurnda, a eɗta ɓa, a nammba ɓa eɗ cuurnda.
14 Wii nikka waasi kaahayɗohi Yeesu teeɓuk taalubeeciŋ ɗe, ŋ finho hultiɗuukiŋ ɗe.
Yeesu na Piyeer na taalubeena
15 Wa ɓa malnduk po ɓa ƴutta, Yeesu woosa Simong Piyeer ne : « Simong kuɓkiŋ Saaŋ, fu keeñkohiɗ to keeñkohi uup wi ɓooɓii raak nga so e ? » Piyeer loffa ɗe ne : « Ee Heɗi, fu inhiɗ ne ŋ waaɗiɗ ɗa. » Yeesu woosa ɗe ne : « Taambkoha buul ciŋ mbaal ciŋ ngo. »
16 A kanakɗukissa a woosa ɗe ne : « Simong kuɓkiŋ Saaŋ, fu keeñkohiɗ to e ? » Piyeer loffa ɗe ne : « Ee Heɗi, fu inhiɗ ne ŋ waaɗiɗ ɗa. » Yeesu woosa ɗe ne : « Niiɗa mbaal ciŋ ngo. »
17 A kaahayɗukissa hooso an : « Simong kuɓkiŋ Saaŋ, fu waaɗiɗ to e ? » Piyeer soossa ŋ meeksohi kaahayɗoh an : « Fu waaɗiɗ to e ? » A loffa ɗe ne : « Heɗi, fu inhiɗ in nu nik, fu inhiɗ ne ŋ waaɗiɗ ɗa. » Yeesu woosa ɗe ne : « Taambkoha mbaal ciŋ ngo. »
18 A degga nga ne « Ñam na woyee ɗa wa te amba ne wa keeh, wi fu nik komaaki yaf tokootee ñooriŋ ɗa, fu kaɗeeɗa ɗiski neɓ ɗa ; waaye fu yaɓko ɗah, fu hey raɗse yaah ciŋ ɗa, ɓo' wiiriis tokiɗ ɗa wa, a ɓay ɗa ɗiski fu waaɗɗi. »
19 Ŋ woo ceem, a teeɓohee findi Piyeer na hee kaanohe, na findi a yakɗohan Kooh nga. Yeesu ɓaatta nga ne : « Ñaakiɗ to. »
20 Piyeer guridda, a hotta taalubeeni Yeesu keeñkohee hayeeɗa ŋ finhooce, a taalubeeni hiiree ŋ Yeesu wa ɓa ñame, a meekissa ɗe yi eɗndohan ɗe.
21 Wa Piyeer hot ɗe, Piyeer woosa Yeesu ne : « Heɗi ! Moo ini kaɗ ŋ yii nak ? »
22 Yeesu woosa ne : « Nik ne ŋ waaɗiɗ ne a ris pes po mbaɗna ŋ hayissan ɗah, waas fu ye nga ? Fu, ñaakiɗ to rek ! »
23 Wa pasarkohha ŋ kosiɗ ca ne taalubeeneem kaananɗi. Te kat Yeesu woyeeɗi Piyeer ne a kaananɗi, a woyee ɗe inii : « Nik ne ŋ waaɗiɗ ne a ris pes po mbaɗna ŋ hayissan ɗah, waas fu ye nga ? »
24 Taalubeeneem a yi fiis in ceem, a seede'iɗ ca, te ɓoo inhiɗ ne seedeeniŋ ɗe keeh.
25 Yeesu haɓɗeen in wiiriis laayiɗ, ca fiisseen yino yino ɗah, ŋ liiɓiɗ ne teereeci hee fiisse heeɗi haɓe ŋ Adina.