Ini Yeesu teeɓ Saaŋ
Rangsohaani
Saaŋ ɓaahee ŋ Apootar ciŋ Yeesu. A ɓaah ŋ ɓi uup woyu ŋ teereeci nikiis ci na naandsuke kipes kiŋ Yeesu. Marka Saaŋ ŋ Limiŋ tiik ci.
Ŋ finho kakaan ki na hulti na rapɗuukiŋ Yeesu, a taambkohiɗ Maryaama, yaayiŋ Yeesu. Ŋ mirndaani a yi adgohee ɓi Jangu, ŋ ɗiska woysee Asi ŋ jamanoonaam (ɓak ngaŋ ɗiski Turki nik woti-woti). Ŋ jamanoonaam, weɗ a fiisoh teerndi na woyse "Yegɗohiŋ Muci Saaŋ fiis", na kaɓɗoh kaahay, na teerndii.
Saaŋ fiis teerndii wuu "Janguuci yasna-kanak ciŋ Asi", te Yeesu taamboh ŋ Saaŋ, a kaɓɗohha Janguuci yasna-kanak ceem yaa nu nga fiis rohƴiɗ, waaye ini uup ŋ teerndii wa ini Yeesu teeɓ Saaŋ ŋ ini kaɗ ŋ "ini joy hay maañaaɗi".
Saaŋ hotiɗ Yeesu ŋ ndamiŋ ɗe, a hotiɗ ɓoofohaaniŋ Kooh na ina wila. A hotiɗ findi Kooh na ñaamkohse ndaam. A hotiɗ ruuh ciŋ ɓi apu sagu kosi ɓa kos Yeesu. A hotiɗ ɓi naamo ŋ kehƴi, ca nikka atteeniŋ Kooh. A hotiɗ ɗoopaat ciŋ baahaaɗiini. A hotiɗ saahi mirndoh na Asamaan as na keheƴ as, baahaaɗi raakɗi nga.
Ñaamaar laayiɗ nga, te ca yooɓɗi toksu.
Ini Yeesu teeɓ Saaŋ kaɗtiɗoh an :
- E Yeesu Kiristaa teeɓoh in ci nik ŋ teerndi 1:1-3
- Kañɗoh wuu Janguuci yasna-kanak ci 1:4-8
- Yaki Yeesu yak ŋ Eel ci1:9-20
- Fiis ci Yeesu kaɓɗoh Janguuci yasna-kanak ci 2–3
- Ini wil ɓoofohaaniŋ Kooh ŋ Eel ci 4–5
- Ndaɗ ci rangohaaci yasna-kanak ci 6:1–8:5
- Kuluɓ ci yasna-kanak ci 8:6–11:19
- Iiñ-safaali na ɓitɓi 12
- Kosiɗ ci na ɗoopaat ciŋ Seytaani 13
- Kuyiŋ Mbaali ƴini na tosuuɗ ci 14:1-5
- Atteeniŋ Kooh na kaas ci yasna-kanak ci 14:6–16:21
- Ngonjom kiŋ Babilon na ndami mirndoh 17–20
- Asamaan as na keheƴ as 21:1–22:5
- Reehɗohaani 22:6-21
1
Teeɓtiɗohi
1 Inii weɗ Yeesu Kiristaa teeɓoh : Kooh eɗ ɗe ne a teeɓ ñaam ciŋ ɗe ini joy hay maañaaɗi. A yi Yeesu, a woos malaakaaniŋ ɗe ne a teeɓ Saaŋ wa, ñaamiŋ ɗe.
2 Saaŋ yeem, a teeɓohiɗ ini a hot jen, wa nikka woo kiŋ Kooh na seedeeni Yeesu Kiristaa seede.
3 Ɓoyi jangɗan ɓooɓi teerndii hey sume, a yi na ɓooɓi kerhan woo ci puloh ŋ Kooh ceem te ɓa amb in ci fiisu ceem, laam jamanooniŋ ca reɓiɗ.
Kañɗohi wuu Janguuci yasna-kanak ci
4 Mi Saaŋ, mi yii fiis wuu Janguuci yasna-kanak ci nik ŋ Asi. Yi nik, te a yi nikee te a yi na haye baahohaat ɗu, a on ɗu jam. Fuuɗis ci yasna-kanak ci nik ŋ fiki ɓoofohaaniŋ ɗe baahohaat ɗu, ca on ɗu jam.
5 Yeesu Kiristaa, seedeeni woor, yi koc rimuk ŋ kaaniɗ ci, kilifaaniŋ buur ciŋ kehƴi, baahohaat ɗu, a on ɗu jam.
A waaɗiɗ ɓoo te a moosɗiɗ ɓoo bakaaɗ ciŋ ɓoo na ñif miŋ ɗe,
6 a ambsohiɗ ɓoo jen, a haɓɗiɗta ɓoo Nguur, a ɓekka ɓoo nga, a tummba ɓoo seeƴkiɗoh wuu Kooh Baab ɓa. A yakɗaah te min-min nikaat na ɗe po faw. Amiin !
7 Markaat, a yi hay ŋ ɗooƴ eel ; yaa nu nga hey ɗe dege has po ɓi maang ɗe sah, cuuɓ ciŋ kehƴi jen hey ɗe rooye. Ee, amiin !
8 Kooh Heɗi woo ne : « Ñam Alfa na Omega, ñam nik, ñam nikee te ñam na haye ; a ñam Heɗ-hatil. »
Yeesu teeɓkiɗ Saaŋ
9 Mi Saaŋ, ɓaah ɗu ngaŋ Yeesu, huntohiŋ ɗu yi ɓaah na ɗu miskiɗi, ɓaahha na ɗu Nguur na muñ seke. Wa nikee wa ŋ ambu ŋ Patmos, kur ka masmi wil, ŋ ambsee sagu woo kiŋ Kooh na seede Yeesu.
10 Ŋ mbehiŋ Heɗi, Fuuɗsi Hoolohngaani ammba so, ŋ kerheeɗa ŋ finhooso hooso leehkeeɗa findi kuluɓ
11 an : « Ini fu na hote fiisaa, wa nik teere, fu kaɓɗoha Janguuci yasna-kanak cii : Efes na Ismirna, Pergam, Tiyatiir, Sardees, Filadelfi na Lawdise. »
12 Ŋ heelukka ne ŋ marak ya ɓa heɗ hoosoori na wee na so, ŋ hotta laampa yasna-kanak urus.
13 Mannda haa ne a ɓo' nikee ŋ leerooca. A ɓekkee kulɓa hutiɗ, wa tokuusa ŋ fisaari na seentur urus.
14 Find ciŋ hafiŋ ɗe nikee yaanow haa find mbaal, haa maar galacaac. Has ciŋ ɗe siñaarɗeeɗa findi jaal yongkaah.
15 Kot ciŋ ɗe mannda na moosi hoolɗohu ŋ yongkaah, foocuusa po wa melciɗeeɗa. Hoosooriŋ ɗe mannda na ɗuuɗ masuɓ laayiɗ.
16 A ammba hor yasna-kanak ŋ yaahiŋ ɗe ñaahmi, ndang kaañiɗ, wi na nguɗe na ɓak kanak puleeɗa ŋ nguɓiŋ ɗe ; fikiiriŋ ɗe siñaarɗeeɗa findi nohi.
17 Ŋ hot ɗe hot rek ŋ keennda ŋ kot ciŋ ɗe po mand haa ne ŋ kaan kaan ; waaye a degga so yaahiŋ ɗe ñaahmi, a woosa ne : « Kana neƴƴoh, ñam koc te ñam mirndohan,
18 ñam pesiɗi, ŋ kaaneen, waaye ɗiski wa nik mi yii pes po faw, caaɓndiŋ kakaan na wiŋ Jaanim cii na so.
19 Kon fiisa ini fu hot, ini raak woti na ini na haye ŋ fikiiri.
20 Ini ɗasɗukiɗi nik ŋ hor ci yasna-kanak ci fu hot ŋ yaahiŋ ngo ñaahmi na laampaaci urus ci yasna-kanak ci tokis inii : hor ci yasna-kanak ci ceɗ malaakaaciŋ Janguuci yasna-kanak ci. Te laampaaci yasna-kanak ci ceɗ Janguuci yasna-kanak ci.