Kalata ya cibili ya Paulo ku
Batesalonika
Busansulushi
Kalata yacibili ya ku Batesalonika yalalembwa ne mutumwa Paulo 1:1. Walalemba iyi kalata mpopalapitowa kacindi kang'ana panyuma pakulemba 1 Batesalonika, byaka makumi asanu ne caka cimo Panyuma pa kusemwa kwa Klistu. Paulo walikacili mu Kolinto mpwalalemba iyi kalata ku mubungano wa Batesalonika, mubungano ngwalabyala mubulwendo bwakendi bwatubili 17:1-10 Mulibuku lya Ncito mulambangeti, mu mubungano uwu mwalikuba Bayuda bang'ana, bangi balikuba Bagiliki.
Mubungano wa Batesalonika walikuba wayakamwa ne cindi ca mapwililisho kayi ne kubwela kwa Klistu, pakwinga Paulo walalemba bingi byakumya ku makani awa mu makalata akendi akuli Batesalonika.Cintimbwi ca Batesalonika cilambangowa sha cindi camapwililisho. Kayi Paulo labacenjeshenga sha kulikumbatowa makasa. Uliyense wela kusebensa kwambeti acane cakulya 3:6-10.
Mitwi ya makani
Paulo latatikinga kalata pakulyamba mwine ne banendi 1:1-2
Kufumapo lalumbunga Lesa cebo ca mubungano wa Batesalonika ne kubapaililako 1:3-12
Mucimpansha ca cibili, Paulo lambanga sha cindi ca mapwililisho
Kayi lambangaponga sha kulikumbata makasa, ne kuyandika kwa kusebensa ncito 3:1-15
Paulo lapwishinga pakupa kayi mitende mubungano 3:16-18
1
1 Njame Paulo pamo ne Sailasi kayi ne Timoti. Tulalembelenga mubungano waku Tesalonika wa Lesa Bata ne Mwami Yesu Klistu.
2 Tulasengenga kuli Lesa Bata kwambeti amupe luse ne lumuno.
Sha kubeteka pacindi Yesu Klistu akesa
3 Twelela kulumbaisha Lesa cindi conse pacebo canjamwe mobanse. Pakwinga celela kwambeti afwe twinseco, cebo cakwambeti lushomo lwenu lulakulunga kayi ne lusuno ndomukute pakati penu lulakonempenga.
4 Eceb cakendi afwe tulatwanganga mumibungano yonse ya Lesa. Tulatwanganga cebo cakulimbikila kwenu mulushomo kulapeshengeti mulapite mumapensho nemakatasho ngomulacananga.
5 Byonse ibi bilaleshenga kwambeti Lesa ukute kubeteka mwabululami. Pacebo ici mulabanga belela kwingila mubwami bwa Lesa ubo mbumulapengelenga pacindi cino.
6 Lino pakwinga Lesa niwabululami nakabape cisubulo bantu abo balamupenshenga.
7 Neco amwe omulapengenga pacindi cino, nakamupe cindi cakupumwina pamo nenjafwe. Nakenseco pacindi Mwami Yesu akesanga mwilu pamo ne bangelo bakendi bangofu,
8 nakese ne mulilo ulabangilinga, kwisa kupa cisubulo batamwinshi Lesa kayi ne batanyumfu Mulumbe Waina wa Mwami wetu Yesu Klistu.
9 Nibakatambule cisubulo kayi nibakapenge kwa muyayaya. Nteti bakabone cinso ca Mwami Yesu Klistu nambi bulemu bwa ngofu shakendi.
10 Pabusuba mposhi akese kwambeti alumbaishiwe pakati pa baswepa kayi nekwambeti atambule bulemu kufuma kuli abo bashoma, nenjamwe nimukabe nabo pakwinga mwalashoma bukamboni bwetu.
11 Weco ncotukute kumupailila masuba onse, kwambeti mube belela kutambula buyumi mbwalamukwila. Neco ndasengenga Mwami kwambeti amupe bintu byaina byonse myoyo yenu nceilayandanga kwambeti musebense mulimo ulashininkishinga lushomo lwenu.
12 Neco lina lya Mwami wetu Yesu Klistu nilikalumbaishiwe pakati penu kayi nenjamwe nimukalumbaishiwe mulyendiye. Lino byonse ibi nibikenshike cebo ca luse lwa Lesa wetu kayi neku Mwami wetu Yesu Klistu.