Kalata ya kutanguna ya
Yohane
Busansulishi
Kalata yakutanguna ya Yohane yalalembwa ne mutumwa Yohane pakati pa (50-100 AD) Kufuma mu caka ncalasemwa Yesu Klistu. Yohane nkalyambapo kwambeti endiye walalemba libuku ili, nomba cimpansha cakutanguna cilaleshengeti walikuba umo wa bakamboni pa buyumi, ne makani a kupunduka kwa Yesu (1:1-3). Kayi nembelo ya libuku lya Yohane wakutanguna yakoshana ne libuku lya mulumbe waina walalembwa ne Yohane. Cilaboneketi Yohane ewalalemba libuku lya mulumbe waina, kayi ne makalata atatu; Mbuli 2 Yohane, kayi ne 3 Yohane, pa cindi ncalikuba ku Efenso.
Yohane walalemba kalata iyi kuli baklistu bonse pa cindi mubungano mpowalikuba mu mapensho, kufuma kukalikoto kalikukwiweti “Gnostics”. Bantu ba mukalikoto aka balikushometi Yesu walikuba Lesa mi bintu byonse, nkalikuba muntu sobwe pa cindi ncalikuba pa cishi capanshi. Weco, Yohane ncalalembeleti nendi walikuba kamboni pa buyumi bwa Yesu, kayi makasa akendi alamwikata Yesu (1:1-3). Ncalalembela kalata iyi ni cakwambeti kukondwa kwakendi kube kwapwililika (1:4) Kayi kwambeti bashoma kabataba mu bwipishi ( 2:1) Ne kucingilisha bashoma ku biyisho bwa bya bwepeshi (1:26) Kayi ne kubashomesheti bapuluka (5:13).
Mitwi ya makani
Yohane latatikinga kulemba kalata ne cebo ncalailembelenga (1:1-4).
Panyuma pkendi lapandululungeti Lesa ni mu muni kayi ne bwikalo bwa Yesu mbwalikuba nabo (1:5 mpaka 3:10).
Cakonkapo latwanushunga mulawo wa kusunanaumo ne munendi (3:11 mpaka 5:12)
Yohane lapwishinga kalata yakendi (5:13-21)
1
Maswi abuyumi
1 Tulamulembelenga sha liswi lyeshikupa buyumi. Pakutatika twalalinyumfwa ne kulibona ne menso etu. Nicakubinga twalalibona kayi twalalikata ne makasa etu.
2 Buyumi ubu mpobwalabonekela, twalabubona, weco tulamwinshibishinga ne kumusansulwila sha buyumi butapu bwalikuba ne Bata kayi bwalabonekela kulinjafwe.
3 Ico ncotwalabona nekunyumfwa encotulamukambaukilinga kwambeti nenjamwe mube kulubasu lwetu mbuli bana ba Lesa kayi ne mwanendi Yesu Klistu.
4 Tulamulembelenga makani awa kwambeti kusangalala kwetu kube kwancine ncine.
Lesa emumuni
5 Lino mulumbe ngotwalanyumfwa kumwanendi ne kumukambaukila niwakwambeti Lesa emumuni kayi kuliyawa mushinshe muli endiye.
6 Twambeti tuli ne Lesa nkakuli bwikalo bwetu nibwa mushinshe, ekwambeti tobandemi shibili mukwamba ne minshilo yetu.
7 Lino na tulekalanga mu mumuni mbuli endiye ncali mu mumuni ekwambeti tuli pamo nendiye kayi ne milopa ya Yesu mwanendi ikute kutuswepesha kubwipishi.
8 Lino na tulambangeti tuliya bwipishi, tulalibepenga tobene kayi tuliya cakubinga.
9 Nsombi natulambeti toba bwipishi, Lesa washomeka kayi walulama, ngautulekelela bwipishi bwetu ne kutufunya ku bwipishi bulibonse.
10 Natulambeti tuliya bwipishi ekwambeti tulambangeti Lesa nimubepeshi kayi maswi akendi nkalipo mulinjafwe.