Kalata ya Jemusi
Jemusi
BUSANSULUSHI
Libuku lya Jemusi lyalalembwa ne Jemusi. Uyu ni Jemusi mukwabo Yesu, walikuba mutangunishi mu mubungano wakutanguna, kayi walikuba umo wa bamakulene wa libunga lyamu Yelusalemu 15:13. Mutumwa Paulo walikumukuweti lusanda lwa mubungano mu Agalatiya 2:9. Bantu beshikuyanda kwishiba bingi bashoma kwambeti libuku lya Jemusi lyalalembwa kabitana bishika byaka makumi asanu kufuma pakusemwa kwa Klistu. Pakwinga Jemusi walikuba mutangunishi wa mubungano mu Yelusalemu, mpani libuku ili walalilemba mpwalikwikala kopeloko.
Jemusi mulibuku lyakendi walalembela mikowa likumi ne ibili yamwaikila mubishi nabimbi 1:1. Lwiyo luli muli Jemusi lukute kusebensa kuli baklistu bonse, nsombi kusebensesha maswi akwambeti “mikowa likumi” Alapeshengeti mpani walalembela baklistu Baciyuda. Pakwinga libuku ili lyalikuyandika kumwaiwa ku makoto angi a beshikulibelenga, ecebo cakendi lilambanga pa nkani shingi. Jemusi lashinga mano makamaka pa lwikatano luli pakati pa lushomo ne micito. Lushomo lwa ncinencine lwela kubonekela mu ncito 2:7. Kayi lacenjeshenga kutayandowa bantu babile 2:1-4 Kayi latwambilinga kucenjela ne ncetulambanga 3:1-12
Mitwi ya makani
Jemusi lapanga mitende beshikubelenga kalata 1:1
Cakonkapo layuminishinga baklistu kuba balimbikila bacana mapensho 1:2-27
Kayi lambanga ncecainina kwambeti lushomo lubonekelenga kufumina mumicito 2:1-26
Kufumapo lambanga maswi ncela kuba ne ngofu 3:1-12
Kayi lambanga sha mano a Lesa ncapusana ne mano a cishi 3:13 mpaka 4:10
Cakonkapo lacenjeshenga balabelengenga kutaba beshikulisumpula 4:11 mpaka 5:6
Jemusi lapwishinga libuku lyakendi mu 5:7-20 pakubapa malailile.
1
1 Njame Jemusi musebenshi wa Lesa ne Mwami Yesu Klistu, ndamupanga mitende amwe mikowa likumi ne ibili yalamwaikila kubishi nabimbi.
Lushomo ne mano
2 Mobanse, kondwani mwakumananga ne mapensho apusana pusana,
3 pakwinga mucinshi kwambeti na lushomo lwenu lubula kuntenkana pacindi ncomulapitinga mumapensho, nimukabe bantu beshikucikonsha kukoma.
4 Kulimbikila kwenu kwelela kupitilisha mpaka mukabe balulama cakumpwililila.
5 Nsombi na muntu naumbi liya mano pakati penu welela kusenga kuli Lesa, kayi nakatambule, pakwinga Lesa ukute kupa camakasa abili kuli bonse mwakubula kulangaula milandu.
6 Neco mwasenganga mwelela kushoma kwambeti nicikenshike kwakubula kutonshanya. Pakwinga uliyense latonshanyanga ulyeti mankape apamenshi ayo eshikwendeleshewa ne mukupwe.
7 Muntu wamushoboyu katayeyeti nakapewe ncalasengenga kuli Mwami Lesa.
8 Pakwinga lasenge ne myoyo ibili, kayi nkaikalikana mubintu byonse, neco nkela kutambulapo ciliconse kuli Lesa sobwe.
Bukandu ne bubile
9 Mwanse mukandu washoma, welela kukondwa na Lesa lamusumpulu.
10 Kayi mubile washoma welela kukondwa na Lesa lamuwishi. Pakwinga mubile nakapwe mbuli maluba amucisuwa.
11 Lisuba lyapula likute kutenta mumena ne kulasha maluba panshi. Neco buyumi bwa mubile nibukapwe kacili pakati pa micito yakendi.
Shakwelekeshewa
12 Ukute colwe muntu ukute kali walimbikilowa elekeshewanga, pakwinga panyuma pakendi nakatambule buyumi, pakwinga ecilambo ico Lesa ncashomeshesha kupa bonse mbwasuni.
13 Muntu elekeshewanga katambangeti Lesa elamwelekeshenga sobwe, Lesa nkela kwelekeshewa ne byaipa, kayi nkela kwelekesha muntu ne byaipa.
14 Nomba muntu ukute kwelekeshewa nelunkumbwa lwakendi mwine,elukute kumubepa nekwimwikata nkola.
15 Neco lunkumbwa lukute kusema bwipishi, nabo bwipishi bwakula mushimba bukute kusema lufu.
16 Kamutabepwa mobanse bame.
17 Cipo ciliconse caina kayi caswepa cikute kufuma kwilu ku Bata bakute kwendelesha bintu byonse byakwilu. Nendi nkashinti mbuli mufunsha, kayi kumunika kwakendi nkakushinkililwa ne cintu ciliconse sobwe.
18 Mwakuyanda kwakendi walatupa buyumi bwa linolino kupitila mu maswi ancinencine kwambeti, afwe tubeti bisepo byakutanguna kutoma palibyo mbyalalenga.
Makani akunyumfwa
19 Mobanse bame, kamwikatishani maswi awa, uliyense ashe mano kukunyufwa, kabani muntu utafwambana kwamba, kayi utakalala bwangu.
20 Pakwinga ukute kukalala bwangu nkakute kwinsa calulama ico Lesa ncalayandanga sobwe.
21 Ecebo cakendi kamushiyani cinga cakwinsa byasafwana, nekwipa moyo kulikonse. Mwakubomba moyo kamwatambula maswi a Lesa ngalabyala mu myoyo yenu, pakwinga endiwo elakumupulusha.
22 Kamutabowa bantu beshikunyufwa maswi a Lesa, nsombi kamubani beshi kwinsa ncalambanga maswi.
23 Pakwinga muntu lanyumfungowa maswi, nsombi kabula kwinsa ncalanyumfunga, welana ne muntu lalibononga mucilola.
24 Acileka kulanga mucilola popelapo ukute kuluba ncabonekanga.
25 Milawo ya Lesa yaswepa, kayi ikute kupa muntu kusunguluka. Neco muntu ukute kwatambula nekwakonkela cena, ukute kunyumfwa ne kutalubako, nsombi uyo ukute kwinsa, Lesa nakamupe colwe pa ncito shakendi shonse.
26 Na pali muntu layeyengeti washako mano kukukambilila Lesa, nomba katekata mulomo, kukambilila kwa muntuyo nikwabulyo, kayi ukute kulibepa.
27 Kukambilila kwakubinga pamenso pa Lesa Bata nuku, kubamba cena bana bamashala, batukashi bamukalubingi mumupensho abo, kayi kulisunga cena, kutalisafwanya mubintu byamucishi capanshi.