Kalata ya Paulo kuli
Filimoni
BUSANSULUSHI
Libuku lifupi lya Filimoni lyalalembwa ne Paulo (1:1). Paulo walikuba mujele mpwalikulilemba. Uku okwambeti mpani walalilemba kali ku Loma, na walikuba ku Loma, ekwambeti lyalalembwa byaka makumi asanu ne limo (61) Panyuma pa kusemwa kwa Klistu. Calikuba cindi cimocimo ncalalembela Bakolose.
Kalata iyi walalembela muntu walikukwiweti Filimoni. Filimoni walikuba umo wa mu mubungano, kayi walikukute musha. Paulo walamulembela kalata yakumusengeti nkatamupa cisubulo Onesimo musha wakendi walikuba lamufwamba Filimoni.
Kwelana ne milawo ya Ciloma, Filimoni walikukute ngofu sha kumushina Onesimo. Paulo walasebensesha maswi akumunyengelela mukwamba, ne kumuyuminisha Filimoni kwambeti amutambule Onesimo eti muklistu, nekwambeti amuleke kayi amusuminishe Onesimo kwisakusebensela pamo ne Paulo (1:13, 14.)
Mitwi ya makani
Paulo lapanga mitende Filimoni (1:1-3)
Kayi paulo lamusengelenga Onesimo kuli Filimoni kwambeti amutambuleti mwanse (1:21)
Paulo lapwishinga pakwamba shakuyanda kumufwakashila, ne kumupa mitende (1:22-25.)
1
1 Njame paulo, uli mujele pacebo cakusebensela Yesu Klistu. Ndi pamo ne mukwetu Timoti, tulalembelenga njobe Filimoni omukwetu wasunika, kayi musebenshi munetu,
2 ne Apiya mukwetu mutukashi, Akipasi mushilikali munetu munkondo ya Mushimu kayi ne mubungano uyo uli mung'anda yakobe.
3 Luse ne lumuno lube nenjamwe kufuma kuli Lesa Bata betu ne Mwami Yesu Klistu.
Lusuno ne Lushomo lwa Filimoni
4 Ndalumbunga Lesa wakame cindi conse ndakuyeyanga mipailo.
5 Pakwinga ndanyumfunga sha lusuno ne lushomo lwakobe kuli bashoma bonse, kayi ne lushomo muli Yesu Klistu.
6 Ndapailinga kwambeti lwikatano ndokute pamo nenjafwe mulushomo, ulusebenseshe cangofu kwambeti ubeshibishe byonse mbyotwalatambula pacebo ca Yesu Klistu.
7 Mukwabo, lusuno ndokute lulankondweleshe kayi ulanjuminishi pakwinga ulakondweleshe moyo wakame ne bashoma nabambi bonse.
Paulo lasengenga kwambeti bamunyumfwileko inkumbo Onesimo
8 Pacebo ico ame ndelela kukwambila muli Klistu ncowelela kwinsa.
9 Nsombi pacebo ca lusuno ame ndakusengenga ndemucekulu, kayi lino ndili mujele pacebo ca kusebensela Klistu.
10 Neco ndasengelenga Onesimo kuli njamwe pakwinga ni mwaname muli Klistu, pakwinga mpondalikuba mujele ndalaba baishi kubintu bya kumushimu.
11 Kaindi nkalikukute ncito kulinjobe, nsombi lino ngauba ne ncito kuli njobe ne njame.
12 Ndamubweshenga kulinjobe, pakwinseci ndabeti ndakutumini moyo wakame wonse.
13 Ngankondwa kuba nendi kuno, mpondicili mujele pacebo ca kukambauka Mulumbe Waina, kwambeti anyamfwenga pabusena bwakobe.
14 Necikabeco nkandayandanga kwinsa cintu ciliconse kantana ndikwipusha, kutineti ngaucinsa mwakukukakatisha, nsombi usuminishe mwakusunguluka.
15 Mpani Onesimo walakushiyowa kwakacindi kang'ana kwambeti akese akekale nenjobe kwacindi conse.
16 Lino nte musha nsombi wapita musha, nimukwenu muli Klistu. Ame ndimusuni neco, nenjobe welela kumusuna, pakwinga nimusha kayi ni mukwenu muli Mwami Yesu Klistu.
17 Na njame munobe, mutambule mbuli ncowela kuntambula.
18 Na walakwinshila caipa nambi kukweleta cintu ciliconse, upe njame mulandu.
19 Lino ndakulembelenga kalata ne makasa akame, “Ame nde Paulo ninkalipile.” Pakwambeco, nkandelela kukwanusha kwambeti nkongole njonkutile nibuyumi bwakobe.
20 Lino omwanse wame nenjame unyamfweko pacebo ca Mwami. Unkondwelesheko mbuli mukwenu muli Klistu.
21 Ndakulembelenga ibi bintu, pakwinga ndashoma kwambeti nubinse mbyondakusenge. Kayi ndicinsheti nucikonshe kwinsa kupita pa bintu ibi.
22 Ndasengenga kayi, eti ukamambileko cipinda pakona, pakwinga ndashoma kwambeti Lesa nakakumbule mipailo yenu nekumbwesha kulinjamwe.
Mitende yakupwililisha
23 Epafulasi uyo ngondi nendi mujele cebo ca Yesu, lamupanga mitende.
24 Maliko, Alisitako ne Dema kayi ne Luka basebenshi baname naboyo balamupanga mitende.
25 Luse lwa Mwami Yesu Klistu lube nenjamwe mwense.