15
Bangelo ne malwashi akupwililisha
1 Kayi mpondalalanga kwilu, ndalabona cingashilo nacimbi cinene kayi ciyosha. Bangelo basanu ne babili bakute malwashi asanu ne abili, malwashi awa emapwililisho abukalu bwa Lesa.
2 Kayi ndalabona cintu calikuboneketi lwenje lwa gilasi lwasankana ne mulilo. Kayi ndalabona bantu kabali bemana pepi ne lwenje lwa gilasi balakoma cinyama ne mukoshano waco ne cibelengelo ca lina lyaco.kabali bekata tulumbu ntwalabapa Lesa,
3 balikwimbila lwimbo lwa Mose musebenshi wa Lesa ne lwimbo lwa Mwana Mbelele lwakwambeti,
“Amwe Lesa wa ngofu shonse,
ncito shenu nishinene kayi shikute kuyosha!
Amwe Mwami wa bishi byonse,
nshila shenu shololoka kayi
ni sha ncinencine!
4 Niyani wela kubula kumutina Mwami?
Niyani wela kukana kwamba sha bukulene bwenu?
Amwe njamwe mwenka mwaswepa.
Bantu mubishi byonse nibakese nibakamukambilile,
pakwinga micito yenu yalulama
kayi bonse nibakaibone.”
5 Calakonkapo, ndalabona ng'anda ya Lesa kwilu kaili yacaluka, mukati mwakendi mwalikuba Tente ya cipangano ca Lesa.
6 Basa bangelo basanu ne babili balikukute malwashi asanu ne abili balapula mu Ng'anda ya Lesa kabali bafwala byabeka, kabali balisunga lamba wa golide pa cali.
7 Cimo ca bya buyumi bina calapa bangelo basanu ne babili ndilo shafongomana shisanu ne shibili shesula bukalu bwa Lesa muyumi kwa muyayaya.
8 Ng'anda ya Lesa yalesula bwishi bwa bulememneno ne ngofu sha Lesa cakwinseti paliya walacikonsha kwingilamo, mpaka bangelo basanu ne babili bakapwishe kwitila malwashi asanu ne abili.