Kalata ya kutanguna ya Paulo kuli Timoti
Timoti
BUSANSULUSHI
Libuku lya 1 Timoti ni kalata njalalemba mutumwa Paulo yalaya kuli Timoti. Mwakuyeyowa yalalembwa pakati pa (62-64 A.D.) Ici calikuba cindi ca pepi ne mapwililisho a buyumi bwa Paulo. Paulo ne Timoti balikunyumfwana cakwinseti Paulo tunkanda twingi walikumukuwa Timoti eti mwana (Bafilipi 2:22 1 Timoti 1:2, 1:18)
Iyi ni imo ya makalata ana alatumwa kubantu, mumusena wa kuya kumubungano. Makalata ambi ni 2 Timoti, Tito, ne Filimoni. 1 Timoti ikute malailile angi alambanga sha kukambila kwa mubungano 2:1-15 Mikalilo yelela batangunishi ba mubungano 3:1-13 Ne kucenjesha sha beshikwiyisha bandemishibili 1:3-11, 4:1-5 Kayi ilaleshenga mbuli Paulo mwalikumwiyishila Timoti kuba mutangunishi mu mibungano. 1 Timoti ikute bumpiyo mpiyo bwingi bwela kunyamfwilisha batangunishi kwendelesha cena mubungano mu masuba ano.
Mitwi ya makani
Paulo latatikinga kupa mitende Timoti 1:1-3
Lacenjeshenga Timoti sha beshikwiyisha bandemishibili 1:3-11
Paulo lapitilishinga kusansulula ncalamulumba Yesu Klistu 1:12-19
Cakonkapo lalayanga Timoti sha kukambila ne batangunishi ba mubungano
Paulo lapwishinga kalata yakendi pakumupa malailile amapwililisho 4-6
1
Paulo lapanga mitende Timoti
1 Njame, Paulo walakwiwa kuba mutumwa wa Klistu Yesu mukupewa mulawo ne Lesa Mupulushi wetu, ne Klistu Yesu uyo ngotwacinkamo manungo,
2 ndalembelenga obe Timoti mwaname mwine mwine mulushomo.
Ndambangeti kwina moyo inkumbo ne lumuno lwa Lesa ne Klistu Yesu Mwami wetu bibe nenjobe.
Cenjelani ne biyisho byabwepeshi
3 Mpondalikuya ku Makedoniya, ndalakupa malailile akwambeti wikale ku Efenso kwambeti ukanishenga bantu nabambi baleyishinga ciyisho cabwepeshi.
4 Kayi ubambileti kabatatayanga cindi cabo ku tulabi twabakulukulu tulambanga sha masemano. Ibi biliya ncito bikute kuletowa kutotekeshana, nkabikute kwiyishapo sobwe, bilayandanga Lesa bikute kwishibikwa mulushomo.
5 Ncondakupelenga malailile awa ni kwambeti ubayishe lusuno lwa ncinencine lulafumunga mu moyo waswepa, kayi kuba ne muntu wamukati waina ne lushomo lwa ncinencine.
6 Bantu nabambi balashiyi mukondo, balataiki ne kuya kuliwala mu makani abula ncito.
7 Balayandishishinga kuba beshikwiyisha bantu Milawo ya Lesa njalapa Mose, nomba nkabacishi ncobalambanga ne kushininkisha ico ncobaleyishinga.
8 Afwe twashoma kwambeti Milawo yaina na muntu kaisebensesha munshila yalumbuluka.
9 Tucishi kwambeti milawo iliya kubelako cebo ca muntu walulama, nsombi yalabelako kululamika beshi kupwaya milawo, batasuni kululamikwa, kayi batatini Lesa. Ba micito yaipa, baipa myoyo kayi batapaili, beshikushina bashali babo, bakapondo,
10 bapombo, batuloba beshikona ne batuloba banabo, beshikula ne kulisha bantu, bandemishibili, beshikulumbila cabwepeshi munkuta, kayi beshi kwinsa ciliconse capusana ne ciyisho calumbuluka.
11 Ici ciyisho cikute kucanika mu Mulumbe Waina Lesa Walemekwa welela kulumbaishiwa, uwo ngwalabika mumakasa akame.
Paulo lalumbunga Lesa
12 Ndalumbunga Klistu Yesu Mwami wetu walampa ngofu ne kunsala kwambeti ndimusebensele, cebo ca kuba washomekwa.
13 Nikukabeti ndalikusampula Lesa nekupensha bantu ba Lesa, nsombi Lesa walanyumfwila nkumbo pakwinga paliya ncendalikwishiba nkandalikukute lushomo sobwe.
14 Nomba Mwami wetu walanyumfwila nkumbo shinene, ndalatambula lushomo ne lusuno kupitila mukwikatana ne Klistu Yesu.
15 Maswi akwambeti Klistu Yesu walesa pa cishi capanshi kwisa kupulusha bantu babwipishi nakubinga kayi elela kutambulwa ca makasa abili, pa bantu bonse baipa ame ndaipa kupita bonse.
16 Nikukabeco Lesa walanyumfwila nkumbo kwambeti kupitila muli njame ondaipa kupita bonse, Klistu Yesu aleshe kwikalika nkombe kwakendi, kwambeti mbe citondesho kulyabo beti bakamushome kwambeti bakatambule buyumi butapu.
17 Lino ku Mwami wa cindi conse, utafu kayi utaboneke Lesa enka, kube bulemu ne kulumbaishiwa kucindi ca cindi. Ameni.
18 Timoti mwaname, ndakupa malailile awa kwelana ne maswi abashinshimi alambwa pali njobe, wasebensesheti byensho, kwambeti ukacikonshe kulwana nkondo yaina.
19 Kayi pitilisha kuba ne lushomo kayi miyeyo yalulama. iyo nabambi njobalanyakili pambali ibyo bilapasulu lushomo lwabo.
20 Pakati pa bantu balico pali Humenayo ne Alekisandulo, bantu aba ndabapa cisubulo ne kubanyakila mu bwendeleshi bwa Satana, kwambeti bakaleke kusampula Lesa.