Pathien Lekhabu Inthieng Chongtung Thar 1 Korinth 2

Khrista jêmdela aom roi

1 Ka lâibungngei le sarnungei, Pathien chongtak inthup,* misîra nin lâia ko hong lâihan, chong roiinpui le rietna roiinpui mang mu-ung. 2 Nin lâia ko om han khom neinun dang murdi mingil riein Jisua Khrista jêmdela aom roi vai kêng nin riet rang ku nuom ngâi. 3 Ma anghan nin lâia han râtloi le innîk pumin leh ichin ko oma,+ 4 male ka bâi renga minchuna chong asuok le ku thurchi misîr ngei khom hah miriem vârna methêmna chong nimaka, Pathien Ratha sinthotheina chong kêng ani uol. 5 Masikin nin taksônna hah miriem vârna han inngam maka, Pathien sinthotheina han kêng ânngam ani.

Pathien vârna

6 Hannoma rathatienga mitungsuo ngei kôm chu vârna chong ki misîr ngâi. Hannirese hi rammuol vârna chong chu nimaka, hi rammuol roijêkpungei an inlalna ânmang tir ngei vârna chong khom nimak. 7 Pathien vârna chong inthup ha kêng ki misîr ngâi, vârna chong inthup ei roiinpuina ranga Pathien'n rammuol om mânna a lei thangsai hah kêng ani. 8 Ma vârna hah hi rammuol roijêkpungei rengin riet mak ngei. Riet senla ngei chu roiinpuina Pumapa hah jêmdel noni ngei. 9 Hannoma Pathien lekhabu'n,+

“Tutên an mu ngâiloi le an riet ngâiloi,

Ma anga tung ranga tutên an mindon loi,

Pathien'n a lungkham ngei ta ranga a mintuosai ngân chu,” ati anghan.

10 Aniatachu† Pathien'n eini rangin chu a chongtak inthup hah Ratha'n mi min riet zoi. Ratha han jâttin a sûisuok ngâi, Pathien neinunkhînngei inthûktaka inthup khom. 11 Ei sûnga om ei ratha lelê hih vai kêng ei chungroi a riet ngâia; ma angdên han, Pathien Ratha vai kêng Pathien chungroi murdi a riet thei ngâi. 12 Ei man hih rammuol Ratha nimaka; manêkin, Pathien'n neinun mi pêk ngei murdi ei riet theina rangin, Pathien juongtîr Ratha ha kêng ei man ani.

13 Masika han miriem vârna minchûn, misîr ngâi mak mea, Ratha minchûn kêng kin misîr ngâi, rathatienga chongtakngei hah Ratha‡ dônngei kôm kin rilsensâi ngâi. 14 Tukhom Ratha dôn loiin chu Pathien Ratha renga manboipêkngei hah man thei ngâi mak ngei. Ma anga mingei han chu ma neinunngei hah riet thei ngâi mak ngeia; ama ta rangin chu inmôlna vai kêng ani, a luttie hah Ratha'n vai kêng a riet thei sikin. 15 Tutu khom Ratha man ngei chu neinuntin aluttie an riet ngâi, hannirese, ama chu tutên jêk thei ngâi mak ngei. 16 Pathien lekhabu'n ati anghan:+

“Tu'n mo Pumapa mulungrîl a riet?

Tu mo minchuna chong a pêk thei rang?”

Nikhomrese, einin chu Khrista mulungbôk ei pêl ani.

* 2:1 2:1; Pathien chongtak inthup; miziek senkhat ngei an chu Pathien chungroi. + 2:3 2:3: Sin 18:9 + 2:9 2:9: Isa 64:4 † 2:10 2:10: Aniatachu; miziek senkhat ngei an dôn chu. Rang. ‡ 2:13 2:13: ratha dôn ngei chu; aninônchu ratha chongpêk ngei leh. + 2:16 2:16: Isa 40:13 (LXX)