Pathien Lekhabu Inthieng Chongtung Thar Jakob 1

JAKOB

Renga Lekhamuthuon

Chongmaruoi

Jakob renga Lekhamuthuon hi ataka sinthoa rilnangei rusuongkhôma, “rammuol pumpuia Pathien mingei chekinchâia omngei kôma miziek ani.” Amiziekpu hin mintêkna chongngei inthârtak mangin khristien mulungbôkngei le nunchan dônna ranga vârna le inkairuoina ataka sinthoa inrilnangei a pêk ani. Khristien thîrna renga chonglupuingei jâttamtak, neina le inriengna, methêmna, nunchan sa, zenuolna, taksôna le sinthonangei, melei mang rangtie, vârna, inkhalna, inpâkna le rangâiinchîna, midangngei roijêkna, insongna, tuongdierna le chubaithonangei hih a misîr minthâr pe ngei ani.

Hi lekhamuthuon hin khristien sakhuo sinthonangei hin taksôna leh ânjûisa rang ti aluttie a misîr ani.

Asûnga chongtângpuingei

Chongmaruoi 1:1

Taksôna le vârna 1:2-8

Inriengna le neina 1:9-11

Minsinna le methêmna 1:12-18

Chong rangâina le sinthonangei 1:19-27

Zenuol dônngei ranga inningna 2:1-13

Taksôna le sinthonangei 2:14-26

Khristien le a melei 3:1-18

Khristien le rammuol 4:1—5:6

Rilna dadangngei 5:7-20

1 Jakob, Pathien le Pumapa Jisua Khrista tîrlâm renga:+

Rammuol pumpui chunga Pathien mingei chekinchâingei murdi kôm chibai a mûk ani.

Taksôna le vârna

2 Ka lâibungngei le sarnungei nin lampuia huongnangei jât tamtak nin tong khomin nangninanâkin vânsân inbê roi, 3 ma anga huongnangei ha nin taksônnân atuong zoiin chu tuongdierna asin ngâi tih nin riet sikin. 4 Lampui tina ite insamloiin akip le chukphara nin om theina rangin tuongdierna han ite châina boiin nangni ruoi rangin minthâr êt roi. 5 Aniatachu nin lâia tukhom vârna ân samin chu Pathien kôm chubaitho senla, ama han pêk atih; Pathien'n mitin kôm manarloi le mulungchuktakin a pêk ngâi sikin. 6 Aniatachu chubai nin tho tika, mulunglâiinlakna boitetin iemtakin nin tho ngêt rang ani. Tukhom mulunglâiinlakna a dônnin chu tuipui ânsôna phâivuopuiin asêm minlêngpai le atompiel angin ani. 7-8 Hima anga mingei hah, mulungrîlbulbâl dônloi, an sintho murdia detloi mingei han Pumapa renga ite man rangin mindon tet no rese ngei.

Inriengna le neinangei

9 Khristien inrieng mingei han Pathien'n a domminsâng ngeiin chu an râiminsân ngêt rese ngei, 10 male khristien mineingei khom Pathien'n a juong minnuoi ngeiin chu an râiminsân ngêt rese ngei. Minei ha rama sûl pâr achuoi angin alân mangpai rang ani.+ 11 Nisa alumnatak ruhu leh ahong suoka, sûl akânga; apâr atâka, male a enhoina ânmangpai ngâi. Ma angdênin mineingei khom sadâi sinthona chungroia an sepui ngâi hah minmangin ala om rang ani.

Minsinna le methêmna

12 Methêmna an tong lâi khoma taksônoma om bang ngei chu an vân asa, minsinna hah an zoi tena chu Pathien'n ama lungkham ngei kôma pêk ranga ân khâmsai ringna hah râisânmanin an man rang sikin. 13 Mîn hima anga methêmna hah an tongin chu, “Hi methêmna hih Pathien renga hong kêng ani,” ti tet no rese ngei. Pathien chu asaloiin methêm thei ngâi maka, male ama khom tute methêm ngâi mak. 14 Aniatachu ei ôina saloingei nanâkin mi tuong minmanga ei in-ôkin chu methêmna ei tong ani. 15 Hanchu ei ôina saloingei hah an vonga, sietna an neia; male sietna hah tuon-ahongtung tena chu thina anei ngâi ani.

16 Huongin om no roi, ko moroitak lâibungngei le sarnungei! 17 Neinunpêk asa murdi le neinunpêk achukngei chu invân renga juong ngâi ania; mahi Pathien invâna vârngei Sinpu inthûl ngâiloi le ijînga inhei ngâiloi renga juong chum ngâi ani. 18 Masikin iring parân a sinngei murdi lâia mun masatak ei chang theina rangin ama lungdôn chongtak thurchi renga miriem ring mi minchang zoi ani.

Chong rangâina le jômna

19 Ko moroitak lâibungngei le sarnungei, mahi riettit roi! Mitinin chong rangâi inchu ngêt rese ngei, thurchi misîr le taksi chu inchu no rese ngei. 20 Miriem taksinân Pathien neinunkhîn diktak hah tuon-mintung thei ngâi mak. 21 Masikin thobaisi inthiengloi le nunchan saloingei renga inkêm roi. Pathien kôm inpêklûtin, nin mulungrîlngeia a chong tuhngei ha pom ungla, ma hah nangni sanminring thei atih.

22 A chong rangâi ririemin nangninanâk inhuong no ungla; manêkin, chu atakin tho roi. 23 Tukhom a chong rangâia, ataka tho loi chu lîmena inena ama mêl nanâk adiktaka mupu angin ani. 24 Asadimin amananâk ân ena, a se nôkin chu kho angin mo a mêl omtie hah a mingil nôk kelen ngâi angin ani. 25 Aniatachu, tukhom balam akip mingei phûkdâia mojôk ngâi tieng en tita, lunghâng thorîta, a rangâia mingil nôk kelen ngâipu niloia, ataka sintho mingei chu Pathien'n an sinthona han satvur ngei atih.

26 Tukhom sakhuo tienga mi ki ni tia a mindon mo nin om? Nin melei nin donsûi minsa nônchu nin sakhuo mi nina hah kâmnângloi ania, nin thethena ân huong nin nih. 27 Ei Pathien le Pa'n sakhuo ânthieng le diktaka a bê ngâi chu mahi ani: nupaboingei le meithâingei an dûktong zora donsûi le rammuol sietna renga inkêm hih ani.

+ 1:1 1:1: Mat 13:55; Mk 6:3; Sin 15:13; Gal 1:19 + 1:10 1:10,11: Isa 40:6,7 (LXX)