Pathien Lekhabu Inthieng Chongtung Thar LUKE 4

Jisua'n methêmna a tong roi

(Mat 4:1-11; Mk 1:12,13)

1 Ratha Inthienga sipin, Jisua hah Jordan dung renga a hongkîra, Ratha ruoiin ramchâra han a se zoia. 2 Mahan Diabolin, sûn sômminli a methêma, ma zora han ite a sâk loi sikin a von achâm sabak zoia. 3 Diabolin, a kôma, “Pathien Nâi ni nîn chu hi lung hih vâipôl manchang roh,” a tia. 4 +Jisua'n a thuona, “Pathien lekhabu'n, vaîpôl riemin miriem ring thei nonih ati,” a tipea. 5 Hanchu, Diabolin, muol insângpa taka a tuong nôka, rammuol pumpuia rêngramngei phûkhatin a min ena. 6 A kôma, “Hi ngei chunga rachamneinangei le rochonngei hi nang pêk ki tih, ko kôma ipêk ani zoi, ku nunuom kôm ke pêk thei. 7 Chubai ni mûk inla anrêngin nang pêk let ki tih,” a tia. 8 +Jisua'n, “Pumapa na Pathien mang chubai mûk inla, ama sin mang tho roh ati,” tiin a thuona. 9 Hanchu, Diabolin Jerusalema a tuonga, Biekin sîp ânzumna taka a dara, “Pathien Nâi ni nîn chu inchôm roh, 10 +Lekhabu'n, Pathien'n a vântîrtonngei nang dom rangin juongtîr a ta, 11 an kutin nang dom an ta, ne ke khom lungin inde no tinih ati,” a tipea. 12 +Jisua'n, Lekhabua, “Pumapa na Pathien minsin no roh, ai ti kêng,” tiin a thuona. 13 A methêmna rang murdia a methêm zoiin chu, Diabolin chuminrên danga rangin a mâk zoi.

Jisua'n Galilee rama sin a phut

(Mat 4:12-17; Mk 1:14,15)

14 Hanchu, Jisua hah Ratha Inthieng sinthotheina neiin Galilee rama a kîr nôka, ha ram sûnga han a thurchi ânthang zoia. 15 Inkhom inngeia mi a minchu ngeia, mi murdi minpâkin a oma.

Nazereth'a Jisua hengpaiin a om

(Mat 13:53-58; Mk 6:1-6)

16 Hanchu, Jisua hah a seilienna khuo Nazereth'a a sea, Sabathnia a tho ngâi lamin Synagog taka a sea, Pathien lekhabu pore rangin ândinga. 17 Dêipu Isaiah lekhabu an pêka, lekha zuot hah a phara, hi miziek omna hih a porea.

18 +“Inriengngei kôma Thurchisa misîr rangin mi thangsuok sikin,

Pumapa ratha ka chunga a om,

Suoka ântâng ngei kôma jôkna chong min phuong rangin ni tîr ani.

Mitcho ngei mit vâr nôkna rang le mi nuomlo ngei jôkna rangin,

19 Pumapa'n a mingei an jôkna rang zora a hongtung zoi iti phuongsa rangin,” iti hih.

20 Hanchu Jisua'n lekha hah a juota, adarpu a pêka, ânsunga, Inkhom ina mi murdi mit ama chunga korong an ena. 21 Hanchu an kôma, “Hi lekhabu nin kôma porea om hih avien hin adikin nin kôma a hongtung zoi,” a tipe ngeia. 22 A chongbâi suok lungkham chong misîrin, an mulungrîl a tôna, kamâm a om an tia, “Hi mi hih Joseph nâipasal nimak mo?” an tia.

23 Hanchu an kôm, nangnin hi chongmintêk, “Doctor, nethenin indam roh, Capernaum'a ni sinthongei, kin lei riet ngei khom hah hin na khuoa hin sin roh, ni la ti ngêt nin tih” a tia. 24 +Jisua'n, “Adiktakin nangni ki ti, Dêipu, tutên anni khuoa modôm ngâi mak ngei,” a tipe ngeia. 25 +“Rangâi ta u, hih adik ani, Elijah zora lâiin Isreal rama meithâi tamtak an oma, kumthum in-ang ruo juong loiin a oma, an ram pumpui mâitâm achula. 26 +Isreal rama meithâi inkhat Sidon rama Zarephath khuomi kôma tiloi chu Elijah hah tute kôma itîr ni mak. 27 +Dêipu Elisha zora lai khomin Isreal rama mi phâr tamtak an oma, hannisenla, tute dam loiin, Syria rama Naaman mang kêng mindamin a om,” a tia.

28 Synagog mipuingei han, a chong hah an rietin chu an ningthik oka, 29 an inthoia, an khopui rôlsora namthâk rangin khopui renga an mojôk paia. 30 Hannisenla, mipuingei lâi renga a relpaia, a rotpat zoi.

Ratha saloi nei mi

(Mk 1:21-28)

31 Hanchu, Jisua Galilee rama Capernaum khopuia a sea, Sabathnin mingei a minchua. 32 + Rachamnei taka a minchu sikin an kamâm oka.

33 Synagog taka han mi inkhat ramkhori ratha dôn a oma, rôl inring takin ânieka. 34 “O! Nazereth Jisua, Imo lo rang mini ti? Mi minmang ranga hong mo nini? Nang ki riet, Pathien tîrton inthieng nini!” a tia.

35 Jisua'n, “Dairek inla, a sûng renga hong jôk roh!” a tia. Ramkhori han an makunga, a minjuon raka, min na loiin a sûng renga a hong jôk zoia. 36 An rêngin an kamâma, “Khoi chongbai tak mo ani zoi? roinei le rachamneia ramkhoringei chong a pêka an hongjôk hi,” an intia. 37 Hanchu ha rama han mun tina Jisua riming ânthang zoia.

Jisua'n Simon tarpi a mindamna

(Mat 8:14,15; Mk 1:29-31)

38 Hanchu, Jisua Synagog renga a jôka, Simon ina a sea. Simon tarpi ritun inrik taka nân a lei oma, ama rangin Jisua an ngên pea. 39 A kôla avan dinga, a ritun hah a ngoa, a natna, harenghan a hong boia, ânthoia anni ngei sin a tho pe ngei zoi.

Jisua'n mi tamtak a mindam

(Mat 8:16-17; Mk 1:32-34)

40 Hanchu kholoi nisa tak nûkin, natna tin renga damloingei Jisua kôma an hong tuonga, an chung chita a kut a minngama a mindam ngei rieia. 41 Hanchu “Pathien Nâipasal nini,” itia iniekin ramkhoringei khom mingei sûng renga an jôkpai zoia, Messiah ani iti an riet sikin, Jisua'n ramkhoringei hah an chong rang phal ngei mak.

Synagog taka Jisua chongril

(Mk 1:35-39)

42 Hanchu khuo ahongvârin chu, khopui a mâka mun inthimna a sea, mipuingeiin an roka, an mûn chu, anni mâk loia la châm rangin an pûta. 43 Hannisenla, Jisua'n an kôma, “Pathien Rêngram Thurchisa hih khopui adadangei khoma misîr rang piela itîr kêng ki ni,” a tipe ngeia. 44 Hanchu, Galilee rama Synagog tina thurchi a misîr zoi.

+ 4:4 4:4: Bal 8:3 + 4:8 4:8: Bal 6:13 + 4:10 4:10,11: Lap 91:11,12 + 4:12 4:12: Bal 6:16 + 4:18 4:18,19: Isa 61:1,2 (LXX) + 4:24 4:24: Joh 4:44 + 4:25 4:25: 1 Rêng 17:1 + 4:26 4:26: 1 Rêng 17:8-16 + 4:27 4:27: 2 Rêng 5:1-14 + 4:32 4:32: Mat 7:28,29