Pathien Lekhabu Inthieng Chongtung Thar Romans 11

Israelngei chunga Pathien inriengmuna

1 + Hanchu, Pathien'n a mingei a hengpai mini? Nitet mak, keima reng khom hih Israel mi, Abraham richi Benjamin rûia mi ki ni. 2 Pathien'n aphuta a thang, a mingei hah paiphar mak. Pathien lekhabu'n Elijah roi a misîr hah imo a ti nin riet. Ama han Israelngei chungroi Pathien kôm a mintunga. 3 + “Pumapa ne dêipungei an thata, na mâichâmngei an misima; Keima vai kêng ko om zoi. Keima khom hi mi that rang an bôk,” tiin. 4 + Hannirese, Pathien'n, “Baal makunga khûk lân bil ngâiloi mi isâng sari ka ta rangin ka la dar tit ani,” tiin a thuona. 5 Ma angdênin atûn hin khom Pathien'n a moroina sika a thangsuok ngei pâl atômte an la om. 6 A moroina sika a thangsuok anni an sintho sika nimak, ma anghan aninônchu moroina hih moroina tatak ni thei no nih. 7 Imo ei ti rang? Israelngeiin an rok hah man mak ngeia, Pathien thang atômte ngei vaiin an mana, midang ngei murdi chu Pathien koina han an sêt suo zoi. 8 +Pathien lekhabu'n, “Pathien'n avien sûn tena an mindonna le an mulungngei a min môl pea, an mua an riet thei loina,” a ti anghan. 9 + David khomin,

“An ruolhoi thona bukhalâi hah châng le in ôkna chang senla,

An inbana le an khitrûi chang rese.

10 An mu theiloina rangin an mit hong jîng senla,

an intakna puokrikin del ngei tit rese,” a tia.

11 Hanchu an inba sikin an inluoi phar rang mini? Ni mak! an inpal sikin Jentailngei kôma sanminringna a juong tung ani. Judangei narsana rang ani. 12 Ha anghan, Judangei an inpalna man rammuol neina ania, Judangei ratha tienga an insamna man hah Jentailngei neina a ninte, Judangei an hong kip tena vâng chu idôra satvurna mo a ni rang ani zoi.

Jentailngei sanminringna

13 Ha anghan, nangni Jentailngei kôm ki ti ani, Jentail tîrton ki ni anghan ki sinthona hih ki minlût ani. 14 Ki mingei nangni ki min narsa senkhat luo ka sanminring thei ngêt na rangin. 15 An hengpai lâihan rammuol ta ranga Pathien leh inngêi nôkna aninte, an pom nôkna tena inmo ani rang? Maha thina renga ringna nîng atih.

16 Vâipôl hâr ât masatak han Pathien kôm pêk minthieng anînchu apumin pêk minthieng ani. Hanchu thing khom a ruzung ânthienga anînchu amachangngei khom an inthieng ani. 17 Olive thing machang senkhat tanpaiin, nangni ram olive, an lâia zomin nin oma, ruzung asa hah nin inzompui zoi ani. Nangni Jentailngei hah ram olive angin nin nia, male atûn chu Judangei ratha râtna tienga ringna hah nin insempui ani. 18 A machang dangngei chunga insong no roi, insong khom ungla, aruzung vâipu nimak chei, aruzung in kêng nangni avâi ani. 19 Hanchu, nangman, “Zoma ko om theina ranga amachangngei hah thâk kêng an ni,” tîng ni tih. 20 Ani, an iem loina sikin thâkin an oma, nang chu na taksônna sikin zom ni ni, inpâk nônla, manêkin chi roh. 21 Pathien'n amachang taktak angati Judangei luo a manar nônchu nang khom nang manar uol no nih. 22 Masikin, Pathien sa tie le chi aomtie ei mua, ânpal ngei ta rangin chu chi a oma, a satna no omtitin chu nangma ta rangin chu asa ani. No omtit nônchu nang khom thâkpai sa nîng ni tih. 23 Male, Judangei khom an iemloina an maka anînchu zomin la om nôk an tih, Pathien'n a zom nôk thei sikin. 24 Nangni Jentailngei, ram olive machang renga thâkpai luon olive thing bâk sa taka inzomin nin om inte, nangni Judangei, olive thingkung diktak amachangngei a zom chu Pathien rangin abai pe uol ok rang ani.

Mi murdi chunga Pathien inriengmuna

25 Ka malngei hi chong inthup hih nin riet rangin ku nuom ani, aninônchu avâr intum nin tih. Isreal mingei tukdullienna hah a omjêt rang nimak. Aniatachu Jentailngei hah Pathien kôma an hong kipphar tena rang vai ani. 26 + Hanchu, Israelngei murdi sanminringin om an tih. Pathien lekhabu'n,

“Zion renga Minringpu hah juong a ta,

Jacob jâisuonngei renga puoloinangei minboi atih.

27 + Mahih an kôma ko chongkhit rang chu ani,

An nunsienangei ka lâk pai tika chu,” ati anghan.

28 Thurchi Sa an hengpaia, nangni sikin Judangei chu Pathien râl an ni. Pathien'n a thang ngei na mindonin chu an richibulngei sikin a champui lungkhamna ngei an ni. 29 Pathien'n mi a thangna le sat a vurna lama a mulungrîl thûl ngâi mak. 30 Tienlâi han chu nangni Jentailngei chu Pathien chongjôm mak cheia, atûn chu Judangei an jômloina sikin a moroina nin chang zoi ani. 31 Ma ang nanâk han, atûn nang nin moroina nin chang sikin Judangei khomin Pathien moroina an chang sa theina rangin atûn* hin chu chongjômloia om an ni. 32 Asikchu anrênga chunga a inriengmuna a minlang nuom sikin Pathien'n mi murdi chongjômloina a khum zit ani.

Pathien minpâkin om rese

33 + Pathien neina ngei chu idôra roiinpui mo! a vârna le a rietna khom idôra ânthûk mo! tûn mo a roijêk a rilminthâr thei ranga? tun mo a lampui a riet thei ranga? 34 + Pathien lekhabu'n:

“Tun mo Pumapa mulungrîl rieta?

Tu mo rilna a pêk thei ranga?

35 + Tumo a kôma lâkâi amin tanga,

tumo a kôm renga a man nôk rêk ngai?” ati anghan.

36 + Asikchu neinun murdi hih ama sin ania, ama sika hong om le ama ta riempet ani. Pathien kôma tuonsôtin inlalna chu om rese! Amen.

+ 11:1 11:1: Phili 3:5 + 11:3 11:3: 1 Rêng 19:10,14 + 11:4 11:4: 1 Rêng 19:18 + 11:8 11:8: Jôk 29:4; Isa 29:10 + 11:9 11:9,10: Lap 69:22,23 + 11:26 11:26: Isa 59:20,21 + 11:27 11:27: Isa 27:9 * 11:31 11:31: Miziek senkhat ngeiin chu dôn mak ngei atûn. + 11:33 11:33: Isa 55:8 + 11:34 11:34: Isa 40:13 + 11:35 11:35: Job 41:11 + 11:36 11:36: 1 Kor 8:6