Pathien Lekhabu Inthieng Chongtung Thar Romans 16

Mimal chibaimûknangei

1 Ei sarnu Phoebe Cenchreae koiindang mingei sinthonu hih a mêl nangni min riet ku nuom. 2 Pumapa riminga Pathien mingei anga nin lei modômna rang le asan anângna tina nin lei san theina rangin. Ama reng khom hi mi tamtak lei san ngâi ania, keima reng khom mi lei san ngâi ani.

3 + Priscilla le Aquila, Khrista Jisua chuonsina ki sintho champui ngei hah lei chibai roi. 4 Anni han ki ringna minjôkna rangin an ringna tena lên phala an chunga ka râisân sabak ani, keima vai niloiin Jentail koiindang murdi khom an chunga an râiasân ani. 5 An ina koiindang inkhôm ngâi ngei hah chibai mi mûk pe sa roi.

Asia rama Khrista lei iem masatak ka mal Epaenetus hah chibai mi lei mûk pe roi. 6 Mary ninta ranga sin dûktong nu hah lei chibai roi. 7 Andronicus le Junia, ku Juda champui le intâng ina ke lei lûtpuingei hah mi lei chibai pe roi. Ma ngei hah tîrtonngei riming inthangtak le keima nêka Khrista lei iem masa an ni.

8 Ampliatus, Pumapa taka ku ruol miditom hah mi chibai pe roi. 9 Khrista chuonsina kin sinthopui Urbanus le ku ruol miditom Stachys hah mi chibai pe roi. 10 Khrista mi tatak ânthârlak Apelles hah mi chibai pe roi. Aristobulus insûngmingei hah mi chibai pe roi. 11 Ku Juda champui Herodion, Khristien insungmingei lâia Narcissus mi chibai pe roi.

12 Tryphaena le Tryphosa, Pumapa a sin ngâi hah mi chibai pe roi. Ku ruol miditom Persis, Pumapa sintho râttak nu mi chibai pe roi. 13 + Pumapa chuonsina sinthopu satak, Rufus le a nû, a nâi anga mi be ngâinu hah mi chibai pe roi. 14 Asyncritus, Phlegon, Hermas, Patrobas, Hermes ngei le a kôma Khristien sungsuok dang omngei murdi hah mi chibai pe roi. 15 Philologus le Julia Nereus le a sarnu, Olympas le an kôma Pathien mi omngei murdi hah mi chibai pe roi.

16 Intum inthiengin inkhat le inkhatin chibai roi. Khrista koiindangngei murdi'n chibai nangni an pêk.

Azoinataka rilnangei

17 Sûngsuokngei, rilna chong nin man ha ânkâl lama nin kâra insenna le mingei taksônna minngûipu ngei renga han indîn rang le mangei hah nûksong rangin nangni ke ngên. 18 Ha mingei han ei Pumapa Khrista sintho mak ngei, an phûngpui sin kêng an tho ani. An chong hoi le an mûr thiemin mi theiloinaboi ngei an huong ngâi ani. 19 Thurchisa taka nin det tie mitinin an riet zoi masikin nin chunga kin râiasân ani. Nikhomsenla, satna tieng nin vâra sietna tieng chu theiloinaboi nin ni rang ku nuom ani. 20 Hanchu ei inngêina bulpui Pathien han Soitan hah nin kepha nuoia om rangin min nôichit lâi atih.

Ei Pumapa Jisua Khrista moroina hah nin kôma om rese.*

21 + Ki sinthopui Timothy le Lucius, Jason le Sosipater ku Juda champuingeiin chibai nangni an pêk.

22 Keima, Tertius hi lekha miziekpu hin, Pumapa rimingin chibai nangni ke pêk.

23 + Ku tungnapa Gaius le koiindangngei inkhômna ngâi in pumapa, khopuiliena sumrâkpu Erastus le a lâibungpa Kuartus khomin chibai nangni an pêk. 24 Ei Pumapa Jisua Khrista moroina hah nin rênga nin chunga om rese, Amen.

Chongkhârna

25 Pathien chu chôilôm ei ti u! Ama han Jisua Khrista thurchi, Thurchisa kin ril le zora sôt taka chongtak inthup lei muphuong anghin nin taksônna dettakin nangni minding thei ani. 26 Atûn chu ha chong dik hah dêipungei lekhabua ajuong inlanga, tukhomin an iema an jôm theina rangin kumtuong Pathien chongpêk angtakin namtin kâra min riet ani zoi.

27 Pathien inkhat mang avârtak kôma om, Jisua Khrista jâra tuonsôtin roiinpuina chu om rese! Amen.†

+ 16:3 16:3: Sin 18:2 + 16:13 16:13: Mk 15:21 * 16:20 16:20: miziek senkhat ngeiin chu ma chongbâi hi an minmang. + 16:21 16:21: Sin 16:1 + 16:23 16:23 Sin 19:29; 1 Kor 1:142 Tim 4:20 † 16:27 16:27: miziek senkhat ngeiin chu a rachangngei 25-27 mahin le masuole 14:23; adadangngei chu 14:23 suole ke an dônna; inkhat chu 15:33 suole an dôn.