Pathien Lekhabu Inthieng Chongtung Thar Chongphuong 1

John Kôma

CHONGPHUONG

Chongmaruoi

John kôma Chongphuong hih chu Khristienngeiin Jisua Khrista hi Pumapa ani tia taksônna an om sika nunuomloa an om lâitaka miziek ani. Amiziekpu'n akhîn tak chu aporepungei sabeina le mohôkna pêk rang le dûktongna le nunuomloa an om zorangeia khom taksônoma an om bang ranga ngên hi ani.

Hi lekhabua atam uol chu chongphuongna jât tamtakngei le inlârnangei mâlâia Khristienngeiin an riet theina ranga chong le rimila minlang ani, aniatachu mi dangngei ta rangin chu chonginthup ani. Miringhoi chonglupuingei anghan hi lekhabu chonglupuingei hi inlârnangei jât dadang mangin lam tamtakin avêl vêlin misîr ani. Hi lekhabu akipa rilsensâina chungroia mindonlam dadang om ngâi khom resea, achonglupui tak; anûktaka chu Pathien'n Khrista, Pumapa jârin a râlngei murdi Soitan khom ânrêng rêngin mene let a ta, male hi motorna hih ânzoi tena chu a mi taksônom ngei chu invân thar le pilchung thar le satvurnangei leh râisânman a pêk ngei rang tih chu ânthâr ani.

Asûnga chongtângpuingei

Chongmaruoi 1:1-8

Inlârna mo-ongna le koiindang sari ngei kôm lekhamuthuonngei 1:9—3:22

Lekhazuot le mohôr sari ngei 4:1—8:1

Bekul sari ngei 8:2—11:19

Dragon le Sarâng inik ngei 12:1—13:18

Inlârna dadangngei 14:1—15:8

Pathien taksina khuriâi sari ngei 16:1-21

Babylon sietminmangna, le sarâng menena, dêipu dikloi le Diabol thurchi 17:1—20:10

Roijêkna azoina 20:11-15

Invân thar, pilchung thar, Jerusalem thar 21:1—22:5

Chongkhârna 22:6-21

1 Hi lekhabu hih Jisua Khrista chongphuong, Pathien'n a tîrlâmngei min riet ranga a pêk, neinun hong tung kelen rang thurchi hah ani. Khrista'n ma chong ngei hi a vântîrton juongtîrin a tîrlâm John kôm a juong min rieta, 2 male John'n a mu murdi ngei hah a misîra. Mahi Pathien chong le Jisua Khrista'n chongtak a phuonga a misîrna ani. 3 Hi lekhabua ânziek porepu ngei, le asûnga lei rilmasana chongngei rangâia male ajômpu ngei chu satvur an ni! Hi neinunngei murdi tungna rang zora hih anâi zoi sikin.

Koiindang sari ngei chibaimûknangei

4 John renga Asia ramhuol sûnga koiindang sari ngei kôm:+

Pathien renga moroina le inngêina hah nin ta nirese, A om tit, A om sai le A la hong om rangpu, le a rêngsukmun makunga ratha sari ngei kôm renga, 5 male Jisua Khrista renga, rietpuipu taksônom, thina renga inthoi masatak le rammuol rêngngei roijêkpu khom ani sa.+

Ama'n mi lungkhama, male ama thina ân pêkna sikin ei sietnangei renga mirtan zoia, 6 male a Pathien le a Pa sintho rangin a Rêngrama ochaingeiin mi sin zoi. Jisua Khrista kôm han roiinpuina le sinthotheina tuonsôt tuonsôtin om rese! Amen.+

7 En roi, ama hih sûmngei lâia khin a juong rang ani! Mitinin mûng an tih, ama lei sunngei khom mu sa an tih. Pilchunga mi murdi'n ama châ an tih. Ma angtak han nîng atih!+

8 “Keima hi amotontak le anûktak ki ni,” Pumapa Pathien Râtinchung, A om tit, A om sai le A la hong om rangpu han a ti.+

Khrista inlârna

9 Keima John, nin lâibungpa, le Jisua nûkjûipu a Rêngram mingei chunga dûktongna hong tung, diertaka tuongna tienga nin champuipa ki ni, Pathien chong le Jisua'n chongtak a phuong thurchi ki misîrna sikin Patmos tuihuola intângin ko oma. 10 Pumapa nikhuo han Ratha'n ku chunga sin a thoa, male ku nûktieng rôl inringtak, bekul inring angin ki rieta. 11 Ma anghin a tia, “Neinun nu mu ngei hi miziek roh, male ma lekhabu hi khopuilien sari ngei sûnga koiindang sari ngei kôm muthuon ngei roh: Ephesus, Smyrna, Pergamum, Thyatira, Sardis, Philadelphia le Laodicea.”

12 Tumo mi rokôk en rangin ko hônheia anîn chu, rângkachak châtidarnangei sari ku mua, 13 male ma châtidarnangei lâia han munisi aphuozek, a kephangei dênin kâncholiinchuol a haka, a rôpa rângkachak kongkhit a khit ku mua.+ 14 A sam chu belrimul, aninônchu rodokang dôra chek, male a mitngei chu meichuong angati;+ 15 a kephangei chu sum-eng meikhura hâlminvâr le nôtminvâr angin aoma, a rôl miring chu tuitâk rasa angin ani.+ 16 A kut changtieng ârsi sari ngei a chôia, male a bâi renga khandai beniknei angaidak ahong suoka. A mâi chu sûnchimripa nisa râtlâitak angin ani. 17 Ama hah ku mu lehan, a kebula athi angin kên let raka. A kut changtieng ku chunga minngamin, “Chi no roh! Keima hih amotontak le anûktak ki ni, a tia.+ 18 Keima hi aring hah ki ni! Ki thia, aniatachu atûn chu tuonsôta rangin ki ring nôk zoi ani. Thina chunga le mithi khuo chunga khom rachamneina ko dôn ani. 19 Hanchu, neinun nu mu ngei, atûna aom ngei le nûkka ahong om rang ngei hih miziek roh. 20 Ma hih ku kut changtienga ârsi sari nu mu ngei, le rângkachak châtidarna sari ngei omtie inthup chu an ni: ârsi sari ngei chu koiindang sari ngeia vântîrtonngei an nia, male châtidarna sari ngei chu koiindang sari ngei hah an ni.”

+ 1:4 1:4: Jôk 3:14; Chph 4:5 + 1:5 1:5: Isa 55:4; Lap 89:27 + 1:6 1:6: Jôk 19:6; Chph 5:10 + 1:7 1:7: Dan 7:13; Mat 24:30; Mk 13:26; Luk 21:27; 1 Thes 4:17; Zak 12:10; Joh 19:34,37 + 1:8 1:8: Chph 22:13; Jôk 3:14 + 1:13 1:13: Dan 7:13; 10:5 + 1:14 1:14-15: Dan 7:9; 10:6 + 1:15 1:15: Ezek 1:24; 43:2 + 1:17 1:17: Isa 44:6; 48:12; Chph 2:8; 22:13