Pathien Lekhabu Inthieng Chongtung Thar Chongphuong 5

Lekhazuot le Belrite

1 Rêngsukmuna ânsung ngâipu kut changtieng han lekhazuot ku mua; maha kângnika ânziek mohôr sari ngei mohôr ânnam leta ânthom ani.+ 2 Vântîrton râttak ku mua, rôl inringtakin, “Tu mo aminpipna mo-onga, lekhazuot ha aphar thei rang ni zoi?” tiin tânghâi ku mu sa. 3 Aniatachu invâna, pilchunga aninônchu rammuol nuoia* khom tute lekhazuot mo-onga asûnga a en thei rang reng om mak ngei. 4 Lekhazuot hah a mo-onga, asûnga a en theiruo tute an om loi sikin ka chap ngungûia. 5 Hanchu upangei lâia inkhatin ko kôm, “Chap no roh. En roh! Juda jâta ikeibaknei, David richisuonpâra roiinpui han, a menea, male ama han aminpipna sari ngei hah akheka lekhazuot hah a mo-ong thei zoi,” a tia.+

6 Hanchu Belrite hah rêngsukmun alâitak han ânding ku mua, iring parân minli ngei le upangei hah arihîla an om ani. Belrite that sai anghan ânlanga. Maha rikingei sari le mitngei sari a dôna, ma ngei hah Pathien ratha sari ngei pilchung pumpuia tîra om ngei hah an ni.+ 7 Belrite hah a sea male rêngsukmuna ânsung ngâipu kut changtieng renga lekhazuot hah ava lâk zoia. 8 Ma anghan a thoa anîn chu, iring parân minli ngei le upa sômnikleiminli ngei han serânda le rângkachak khuriâingei mirimhoia sip chôi pakin Belrite makunga han an inboka, ma ngei hah Pathien mingei chubaithonangei ani.+ 9 Anni ngei han lâ thar an thoa:+

“Nangma chu lekhazuot lâk theiruo

le a minpipnangei kheka mo-ong thei ni ni.

Thatin no oma, male thina nên pêkna han Pathien ta rangin

jâttina mingei, chongtina mingei, namtina mingei le ruitina mingei no rochôk zoi.

10 Kin Pathien sintho rangin rêngrama ochaingei ni sin ngei zoi ani,+

male anni ngei han pilchunga roijêk an tih.”

11 Ko hong en nôka, male vântîrtonngei rôl ki rieta, isâng tamtak le isângrazasôm tamtak an ni! rêngsukmun rihîla han an indinga, iring parân minli ngei le upangei khom an om sa,+ 12 male rôl inringtakin lâ an thoa:

“Belrite thata omsai hih

sinthotheina, neinunsampâr, vârna le râtna,

miritna, roiinpuina le minpâkna man theiruo piel ani!”

13 Male invâna, pilchunga, rammuol nuoia, le tuikhanglien sûnga iring parânngei murdi vânnuoia iring murdi ngei le lâ an thoa:

“Rêngsukmuna ânsung ngâipu le Belrite kôm han,

minpâkna le miritna, roiinpuina le sinthotheina ngei,

tuonsôt tuonsôtin om rese!”

14 Iring parân minli ngei han, “Amen!” tiin an thuona, male upangei han inbokin chubai an mûk zoi.

+ 5:1 5:1: Ezek 2:9-10; Isa 29:11 * 5:3 5:3: rammuol nuoia: Thina rammuol (1:18 en roh). + 5:5 5:5: Aph 49:9Isa 11:1,10 + 5:6 5:6: Isa 53:7; Zak 4:10 + 5:8 5:8; Lap 141:2 + 5:9 5:9: Lap 33:3; 98:1; Isa 42:10 + 5:10 5:10: Jôk 19:6; Chph 1:6 + 5:11 5:11: Dan 7:10