Pathien Lekhabu Inthieng Chongtung Thar 2 Timothy 1

TIMOTHY

Kôma Paul Lekhamuthuon Inikna

Chongmaruoi

Timothy kôma Paul Lekhamuthuon Inikna hi sinthopui nâipang uol le a nuoidoi Timothy misanga rilna rang uola miziek ani. Achonglupuitak chu tuongdierna hih ani. Taksônomtaka Jisua Khrista rietpuipu ni tita, Thurchi Sa le Chongtung Muruoa minchuna diktak hah sûr mindet tita, male dûktongna le doina tamtak kâra khom minchupu le thurchimisîrpu nina sintum ngei sin rangin Timothy hih a rila, a mohôk ani.

Aliekin “Amo le iterietloi Inkhalnangei” ite asenaboi, arangâi ngei asietpuina ngâia inchel hih inrîngomngei chungroia Timothy hih inningna pêk ani.

Hingei murdia hin, amiziekpu ringnun le neinunkhîn a taksônna, dierna, lungkhamna, a tuongdierna, le nunuomlona dûktongna ngei hi minenna rangin Timothy a minrietnôk ani.

Asûnga chongtângpuingei

Chongmaruoi 1:1-2

Minpâkna le mohôkna 1:3—2:13

Huongvârshakna le inningna 2:14—4:5

Paul dingmun 4:6-18

Chongkhârna 4:19-22

1 Paul, Khrista Jisua taka ringna om inkhâmna thurchi misîrna lama Pathien lungdoa Jisua Khrista tîrton renga han,

2 Ka nâipasal moroitak, Timothy kôm:+

Pathien ei Pa le Khrista Jisua ei Pumapa han moroina, inriengmuna le inngêina ngei nang pêk rese.

Râisânchongrilna le mohôkna

3 Ki richibulngei renga sielesarietna inthiengtak dôna a sin ko tho pe ngâi Pathien kôm râisânchong ki misîr ngâi. Sûn le jân ku chubaithonangeia zoratin nang riettitin a kôm râisânchong ki misîr ngâi. 4 Ni mitrithingei khom ki riettit ngâi, male râisânnân ka sip theina rangin nang mu rang ku nuom sabak ani. 5 Taksônna, takintâina no dôn hah ki riettita, ma taksônna hah aphut han ni pi Lois kôm le nu nû Eunice kôm khom aom, nangma no kôm khom aom sa ti ki riet minthâr ani.+ 6 Ma sika han nu chunga ku kutngei ki minngam lâia Pathien'n neinunpêk nang a pêk hah minring tit rangin nang ka minrietnôk ani. 7 Pathien Ratha mi pêk han ei thâimindôp maka; manêkin, ama Ratha'n sinthotheina, lungkhamna le indîntheinân mi min sip ngâi ani.

8 Hanchu ei Pumapa rietpuipu nina ha inzakpui nônla; keima Khrista jâra mi intâng khom hih mên zakpui uol no roh. Manêkin, Pathien'n Thurchi Sa sika tuong theina ranak nang a pêk ngâi anghan nu tuong rangtum hah tuong roh. 9 Ama han ei sintho ngei sika niloiin, ama neinunkhîn le a moroina sikin mi sanminringa, a mingei ni rangin mi koi ani. Hi moroina hih Khrista Jisua han rammuol insieng mân mi pêk zoia, 10 aniatachu maha mi Sanminringpu Khrista Jisua juongna sikin atûn chu ei kôm minlangin aom zoi ani. Ama han thitheina ranak hah a min monga, male thurchisa renga han thitheiloina ringnun a minlang zoi.

11 Thurchi Sa phuong rangin Pathien'n tîrton le minchupu'n ni phun zoi ani,+ 12 male ma sika han kêng hi neinunngei khom hi ku tuong ani. Hannirese atûn tena khom ngamnân ka la sippuia, ka taksônpu hah tumo ani ti ki riet sikin, male ko kôma ni minkol hih ma Nikhuo ha atung mâka a rung thei ti ki riet mindik ani.* 13 Chong dik nang ki minchu ngei hah sûr mindet tit roh, nu jûi ranga minenna ani anghan, Khrista Jisua leh inzoma eita, taksônna le lungkhamna han omtit roh. 14 Ei kôma om ngâi, Ratha Inthieng sinthotheinân neinun asa ngei no kôma minkola om hah vong minsa roh.

15 Asia ramhuola om murdi'n min mâk ti ni rieta, Phygelus le Hermogenes ngei khom an inchel sa. 16 Pumapa'n Onesiphorus insûngmi ngei inriengmu ngei rese, ama han vêl tamtak mi minhar zoi sikin. Intângna ina ko om khom hi mên zakpui maka, 17 aniatachu Rom a hong tung lehan mi roka, ni mu mâka ni rok titir ani. 18 Pumapa'n ha Nikhuo han a inriengmuna pêk rese! Male Ephesus taka keima rangin idôrmo sin a tho khom ni riet minthâr sabak ani.

+ 1:2 1:2: Sin 16:1 + 1:5 1:5: Sin 16:1 + 1:11 1:11: 1 Tim 2:7 * 1:12 1:12; imo ama'n mi minkol hah; aninônchu imo keiman ki minkol hah.