TITUS
Kôma Paul Lekhamuthuon
Chongmaruoi
Titus hah Jentail mi, Khristien a hong changa, Paul missionary sinna han a san ngâi le a thop ngâi mi ani. Paul'n Titus kôma Lekhamuthuon hin Crete tuihuola a sintho san ngâi, koiindang sinngei enkol ranga amâkpu rangin a miziek ani. Hi lekhamuthuon hin abi inthum a dôn.
Inkhatna, Crete mi tamtak ngei nunchan saloi tie enin, koiindang ruoipungei dôn ranga nunchan sa, Titus kôm a ril nôk ani. Inikna, Titus'n koiindanga lôm tamtak ngei, Putarngei, Pitarngei (mangei han an nuoia nupang nâipangngei minchu ngei rang an ni) ruothartengei, le suokngei minchu rang lam. Azoinataka, Khristien nunchan sa, aliekin insûk le ruolinchang anâng tie ngei le inmumâknangei, inkhalnangei, le koiindanga insennangei om loi rang roia Titus kôma a rilna.
Asûnga chongtângpuingei
Chongmaruoi 1:1-4
Koiindang ulienngei 1:5-16
Koiindanga pâl omngei murdi sintum 2:1-15
Mohôkna le inningna 3:1-11
Chongkhârna 3:12-15
1
1 Paul, Pathien tîrlâm le Jisua Khrista tîrton renga han.
Pathien a mi thangngei an taksônna san rang le sakhuo lama dikna tieng ruoi ngei rang le sanngei rang le,
2 kumtuong ringna sabeina chunga ânngam hah minriet ranga thang ki ni. Pathien, milak tho ngâiloi han, zora hônphut mân renga ma ringna hih ni leikhâm pea,
3 male ama han azora diktaka han a thurchi a juong minlang zoi ani. Sanminringpu Pathien chongpêk anghan phuong minzar rangin sintum pêk ki ni zoi.
4 Ei rêngin munkhat ei nina taksônna sika ka nâipasal diktak, Titus rang ki miziek ani.
Pa Pathien le mi sanminringpu Khrista Jisua moroina le inngêina nangni pêk rese.
Crete tuihuola Titus sintho
5 Neinunngei jêk ranga ala nângngei jêk rangin le khopui tina koiindang upangei phun pe ngei rangin, Crete tuihuola nang ka mâk ani. Nang ki rilnangei hih riettit roh:
6 Upangei chu demnaboi ngêt; lômnu inkhat dônpu ngêt, a nâingei khom Pathien taksôn mi le hoiinhôkna lama dem theiloi le chongdonloi mi niloi ani ngêt rang ani.
7 Koiindang upa chu Pathien sin enkolpu ani sikin, demnaboi ani ngêt rang ani. Theiintum mi aninônchu ningthik bai, ju inrûi mi aninônchu rahangrât mi, aninônchu sum inruôk mi ani rang ni tet nimak.
8 Mi donsûi thei le neinun sa midit mi, indînthei mi, mi diktak, mi inthieng le mi omchan dik ani ngêt rang ani.
9 Ama han, minchuna dik taktak lehan mingei a mohôk theina rang le adoipungei khom an dikloina a min mu theina rangin, thurchi taksôn omtak, chongrin leh injûipui ngei sûrngit ngâi mi ngêt ani sa rang ani.
10 An omphuoloi han, midangngei hah adikna minjûiloi le huongna tieng an tuong ngâi ani, aliekin Juda sakhuo renga hong inheipu ngei hah an ni uol.
11 An bâi hîp pe ngei rang anânga, asikchu inzakpuiruoi tak sum rujûlin, an minchu loi rang ngei minchûn, an insûngmingei nâm mulungjîng an mintong ngei zoi ani.
12-13 Crete mingei lâia nanâk, an dêipungei inkhatlam, chongdik misîr ngâipu han “Crete mingei chu milakkok, rama sarângngei, thaboi rôlruokngei,” a ti lehan, ngo bit ngei roh, taksônna dik an dôn theina rangin le
14 Juda thurchimuruongei renga hong, chongtak hengpai ngâi miriem chongpêkngei jôm khâi no rese ngei.
15 Mi inthieng ngei ta rangin chu neinun nâm hih ânthieng ania; hannirese, mi innim ngei le iemloipu ngei ta rangin chu ite hih ânthieng reng om maka, an mindona le asielesarietna ten khom ânnim ani.
16 Pathien riet mi kin ni an intia, aniatachu an sintho han an saloina aminlang pe ngei ngâi ani. Mangei hah ennuôm pêlloi le chongdonloi mi, asa sin rang ti reng inhoiloi an ni.