28
1 «Cimi no, nongu goo no kaŋ ra nzorfu kaaray ga hun,
nda nongu kaŋ ra wura ga ɲumay ka henan,
2 Guuru bibi si hun kala laboo ra,
tondi mennante ga alhan noo.
3 Kubawey ga ben,
i ga laboo fanši ka koy guusu kuku ra
hala tondey kaŋ ga tugu buuyan biyoo ra.
4 I ga guusu fanši kaŋ ga mooru borey gorodogoo,
nongu ra kaŋ ra cee si duu jisidoo,
i nka deeja, i ga zinji-zinji adamizey se nongu mooro.
5 Laboo kaŋ ra meehunay ga hun gandaheroo
bere-bere sanda nuune ka duu a.
6 Safir tondi si duwandi kala laboo tondey ra,
no din ra wura hamni ga duwandi.
7 Ciraw kaŋ ga hoo si fondaa bay,
algabu biboo moɲey si dii a.
8 Ganjihooga kaŋ ga zankam mana too no din,
ganjihayla mana bay ka bisa nda no din.
9 Adamize ga kaŋ tondi ga,
a ga tondi hondey bere hala ngi linjey ga.
10 A ga guusu kaa tondey ra kʼa tee hari bisadoo,
moɲey ga dii haya kayante dumi kul.
11 A ga haroo kayandi hala a masi dandi,
a ga haya tugantey fatawandi.
12 Amma man ra lakkal ga duwandi?
Man ra fahamay doo goo?
13 Adamize si alkadaroo bay,
a si duwandi hundikoyney laboo ga.
14 Guusu beeroo nee: ‹A sii ay ra.›
Teekoo nee: ‹A sii ay do.›
15 Ba wura alhakiika sʼa noo boro se,
nzorfu kaaray si duu a.
16 A si hin ka neešandi Ofir gandaa wura bande,
oniks tondi hay šenda si duu a,
safir tondi hay šenda si duu a.
17 Wura wala diji si hin ka deedandi a ga,
a si hin ka barmayandi nda wura alhakiika jinay.
18 Hiiri caadante nda murmur si hin ka kay a jine,
lakkal hayoo bisa alyakuutu.
19 Topaz tondi kaŋ hun Ecopi gandaa ra
si hin ka deedandi a ga,
wura alhakiika si toorʼa alkadar.
20 Man ra lakkal ga hun?
Man ra fahamay dogoo goo?
21 A tugandi hundikoyni kul se,
a daabandi beenaa cirawey se.
22 Guusu futaa nda buuyanoo šelaŋ ka nee:
‹Ir haŋawey maa nga šennoo.›
23 Irkoy no ma lakkal fondaa bay,
nga no ma dogoo bay,
24 zama nga no ma dii hala laboo kaydogoo ga,
a ga dii haya kul kaŋ goo beenaa cire.
25 Nga no ka hewoo hinoo daŋ,
nga no ma harey neeši.
26 Waati kaŋ a na yaamar noo ncirɲoo se,
ka fondo tee meli nda jiŋjiŋyan se,
27 waatoo din a dii lakkal, a nʼa deede,
a nʼa laasaabu, a nʼa noo alkadar.
28 Woo banda ga, a nee adamize se:
‹Ka hunbur war Koyoo, woo ti lakkal,
ka mooru ifutu, woo ti fahamay!›»