35
Cee hinzantoo kaŋ Elihu na šennoo zaa
1 Elihu na šennoo zaa ka nee:
2 «Nʼga hongu ni goo nda cimi ka nee: ‹Ay ga šerre ka bisa Irkoy.›
3 Zama ni nee Irkoy se: ‹Man ni nafaa ya si zunubu tee,
macin no a gʼa hanse ya ne?›
4 Agay no ma ni zaabi,
ni nda ni cerey kaŋ goo ni bande.
5 Beenaa honnay, guna!
Duulawey guna, takaa kaŋ nda i ga mooru ni ga.
6 Nda nʼna zunubu tee, cin no nʼgʼa hasara a se?
Nda ni hooyaney boobo, macin ti tooɲaa kaŋ nʼnʼa tee a se?
7 Nda boro šerrante ti ni, macin ti nafaa kaŋ ga hun a se ni do?
Macin no a ga duu a ni ga?
8 Ni borolaalataraa si hin ka haya hasara kala ni cine se,
šerretaraa si haya hanse kala adamize se.
9 Borey ga kaati ngi kankamyan boobey se,
borey ga faabayan ceeci
ka ngi kaa boŋkoyney hini futaa cire.
10 Amma boro kul si nee:
‹Man Irkoy kaŋ nʼay taka?
Nga kaŋ ga baytiyaŋ zumandi
boro ga cijin here a mʼi don,
11 nga kaŋ gʼir cawandi ka bisa laboo adabbawey,
nga kaŋ gʼir noo lakkal ka bisa beenaa cirawey?›
12 Borey ga kaati, amma Irkoy si tuuru i se,
boro laaley foomayanoo maaganda se.
13 Cimi no, i mma kaati yaada, Irkoy si haŋajer i se,
Hini-kul-koyoo si dii a.
14 Amma ni ka nee kaŋ nʼsi dii a,
ni misoo goo a jine, a batu!
15 Hala sohõ a mana nga futuroo cebe,
ni mma nee kaŋ a nka dirɲa tureyan boobey.
16 Šenni yaadayaŋ no Ayuba ga nga miɲoo feeri kʼi har,
a ga lakkal jaŋante šenni booboyaŋ har.»