21
Izirayel borey hin Kanaŋ borey
1 Arad koyraa kokoyoo kaŋ ti Kanaŋ boro kaŋ ga goro Negew maa kaŋ Izirayel borey goo ma kaa nda Atarim fondaa here. A na Izirayel borey wongu, a na affooyaŋ daŋ baɲɲataray.
2 Izirayel na allaahidu zaa Abadantaa se, i nee: «Nda nʼna jamaa woo daŋ ir kabey ra, ir ga ngi koyrawey halaci sõy.»
3 Abadantaa na haŋajer Izirayel jindoo se, a na Kanaŋ borey daŋ kabey ra. I na ngi nda ngi koyrawey halaci sõy, de i na nongoo maaɲoo daŋ Horma (maanaa «halaci sõy»).
Alhan gondoo
4 I hun Hor tondi hondoo do ka Kakaarey teekoo fondaa zaa ka Edom gandaa kuubi. Fondaa ra, jamaa biney hun.
5 I šelaŋ Irkoy nda Musa ga ka nee: «Cin se war gʼir žigandi ka hun Misira? Hala ir ma buu saajoo woo ra wala? Zama ŋaayan sii ne, hari sii ne, ir biney hun nda ŋaayan takaa-takaa woo.»
6 Woo ga, Abadantaa na gondi naajikoyniyaŋ sanba jamaa ga. I na jamaa ɲama, de boro boobo buu Izirayel jamaa ra.
7 Jamaa kaa Musa do ka nee: «Ir na zunubu tee ka šelaŋ Abadantaa ga, ka šelaŋ ni ga. Abadantaa ŋaaray hala a ma gondey moorandi ir.» Musa na Irkoy ŋaaray jamaa se.
8 Abadantaa nee Musa se: «Gondi naajikoyni tee, mʼa jer bundu ga, boro kul kaŋ gondi nʼa ɲama, nda a nʼa guna, koyoo ga huna.»
9 Musa na alhan gondi tee kʼa daŋ bundoo ga. Boro kaŋ gondi nʼa ɲama, de a na alhan gondoo guna, koyoo ga huna.
Izirayel borey koy hala Pisiga tondi hondoo do
10 Izirayel borey koy, i goro Obot.
11 I hun Obot ka koy goro Iye-Abarim, saajoo ra kaŋ ga tenje Mowab, waynahunay here.
12 I hun no din ka koy goro Zered gooroo ra.
13 I hun no din ka koy goro Arnoŋ isaa jere foo here kaŋ ga bisa saajoo ra ka hun Amor borey laboo ga, zama Arnoŋ ti Mowab gandaa hirri foo kaŋ goo Mowab nda Amor borey game.
14 Woo maaganda se Abadantaa wongey citaaboo ra i ga nee: «Waheb kaŋ goo Sufa gandaa ra, nda Arnoŋ isaa harey,
15 nda haroo kaŋ hun ka koy Ar laboo here ka koy jeesi Mowab gandaa hirroo ga.»
16 I hun no din ka koy Ber (maanaa «day»), no din ra dayoo goo kaŋ ga Abadantaa nee Musa se: «Jamaa marga, ay gʼi noo hari.»
17 Woo se Izirayel don ka nee:
«Dayoo, hari fattandi! Wa don a se!
18 Day kaŋ boŋkoyney nʼa fanši,
jamaa borciney nʼa fanši
nda ngi laamaa gobey,
nda ngi gobey!»
I hun saajoo ra ka koy Matana,
19 i hun Matana ka koy Nahaliyel, i hun Nahaliyel ka koy Bamot,
20 i hun Bamot ka koy sosooroo ra kaŋ goo Mowab gandaa ra, Pisiga tondi hondoo boŋoo jeroo ga kaŋ ga boro ga saajoo honnay.
Izirayel hin kokoyoo kaŋ maaɲoo ti Sihoŋ
21 Izirayel borey na dontokawyaŋ sanba Sihoŋ kaŋ ti Amor borey kokoyoo do ka nee a se:
22 «Naŋ ya bisa nda ni gandaa. Ir si hun fondaa ra ka bisa nda faarey, ir si bisa nda alaneb faarey, ir si dayey harey haŋ. Ir ga hanga kokoyoo fondaa hala ir ma bisa ni gandaa ra.»
23 Sihoŋ mana yadda Izirayel borey ma bisa nda nga gandaa laboo. Sihoŋ na nga jamaa kul marga ka koy Izirayel kubay saajoo ra, a too Yahas, no din ra i na Izirayel wongu.
24 Izirayel nʼa kar kʼa wii nda takuba ka ngi gandaa taa, kʼa dii za Arnoŋ isaa hala Yabok isaa ka koy Amoŋ borey gandaa hirroo ga, zama Amoŋ borey gandaa hirroo nka cinandi nda cete.
25 Izirayel goro Amor borey koyrawey ra, i goro ba Hešboŋ koyraa nda nongey kul kaŋ goo nga laamaa ra.
26 Hešboŋ manʼti kala Sihoŋ kaŋ ti Amor borey kokoyoo koyraa. Nga no ka Mowab kokoyoo kaŋ goo no cee jinaa wongu, a na nga gandaa kul taa a kone hala Arnoŋ isaa do.
27 Woo se donkey ga nee:
«Wa kaa Hešboŋ! Sihoŋ koyraa ma cinandi ka kay,
28 zama nuune fatta Hešboŋ,
nuune deeneyaŋ hun Sihoŋ koyraa ra,
a na Ar koyraa kaŋ goo Mowab gon,
Arnoŋ isaa hodaddawey jineborey.
29 Ni bone, Mowab,
Kemoš jamaa, ni dere!
A na nga izʼarey tee cindiyaŋ,
a na nga ize woyey daŋ koŋŋataray
Sihoŋ se kaŋ ti Amor borey kokoyoo.
30 Ir nʼi hay nda biraw,
Hešboŋ halaci hala Diboŋ.
Ir na hasaraw tee i se hala Nofa kaŋ ga too Medeba.»
31 Takaa woo nda Izirayel goro Amor borey gandaa ra.
32 Musa na boroyaŋ sanba i ma Yazer koyraa guna. Woo banda ga, i na koyrawey kaŋ goo nga mayraa ra dii. Amor borey kaŋ goo no din, i nʼi gaaray kʼi kaa no.
Izirayel hin kokoyoo kaŋ maaɲoo ti Og
33 I bere ka žigi ka koy nda Bašaŋ fondaa. Og kaŋ ti Bašaŋ kokoyoo, nga nda nga jamaa kul kʼi kubay kʼi wongu Edreyi.
34 Abadantaa nee Musa se: «Masi hunbur a, ay nʼa daŋ ni kaboo ra, nga, nda nga jamaa kul, nda nga gandaa. Ma hayaa tee a se kaŋ nʼnʼa tee Sihoŋ se kaŋ ti Amor borey kokoyoo kaŋ goro Hešboŋ.»
35 I nʼa kar, nga, nda nga izʼarey, nda nga jamaa kul, i mana baahunante kul naŋ a se. I na nga gandaa dii.