105
Irkoy ga laadir
(Sorro 1–15: Taarikey 1na 16.8–22)
1 Wa Abadantaa saabu, war ma maaɲoo cee!
Wa nga teegoyey bayrandi jamawey ra!
2 Wa don a se, wa don kʼa saabu,
wa nga goy kayfantey kul har borey se!
3 Wa fooma nda nga maa henanantaa,
yala borey kaŋ ga Abadantaa ceeci biney ma ɲaali!
4 Wa Abadantaa nda nga gaaboo ceeci,
war ma nga ndumoo ceeci waati kul!
5 Wa hongu haya kayfantey kaŋ a nʼi tee,
nda nga kayfey nda nga miɲoo ciitey,
6 war kaŋ ti Ibirahima, nga tamoo hayroo,
war kaŋ ti Yakuba izey kaŋ a nʼi suuba!
7 Nga ti Abadantaa, ir Koyoo,
nga hantumey kaŋ kayandi goo laboo kul ga.
8 A ga hongu nga amaanaa waati kul,
yaamaroo kaŋ a nʼa noo alwadda zenber (1.000) se,
9 woo kaŋ a nʼa daŋ nga nda Ibirahima game,
nda žeeyanoo kaŋ a nʼa tee Isiyaka se.
10 A nʼa kayandi sanda ašariya Yakuba se,
kʼa tee amaana duumante Izirayel se.
11 A nee: «Ay ga kaa ka ni noo Kanaŋ gandaa
a ma tee war tuboo, a ma tee war wane.»
12 Alwaatoo din, boro hinna kaccu no,
i si boobo, i goo yawtaray ra no din.
13 I ga yaara gandawey nda cere game,
ka hun ganda foo ra ka koy affoo ra.
14 Amma Irkoy mana naŋ boro kul mʼi šiita,
a citi kokoyyaŋ ga ngi maaganda.
15 A nee: «War masi tuku ay suubantey kaŋ yonandi ga,
war masi albasi tee agay annabey se!»
16 A na heray cee gandaa ga,
a nʼi jaŋandi ŋaayan dumi kul.
17 A na aru sanba i jine:
Isufi neerandi sanda baɲɲa.
18 I na cewey daŋ gaalayaŋ ra,
i na jindoo daŋ guuruyaŋ ra,
19 hala waatoo kaŋ ra šennoo kaŋ Isufi nʼa har tee,
Abadantaa nʼa noo cimi.
20 Kokoyoo na yaamar noo kaŋ i mʼa naŋ,
jamawey jineboraa nʼa feeri.
21 A nʼa tee nga hugoo jineboraa,
kʼa tee nga hayey kul boŋkoynoo,
22 hala a ma nga goykaw beerey cawandi woo kaŋ a ga baa,
ka kokoyoo boro beerey noo lakkal.
23 Woo banda ga, Izirayel koy Misira.
Yakuba tee yaw Šam gandaa ra.
24 Irkoy hanse ka nga jamaa boobandi,
a nʼa noo gaabi ka bisa nga torrokey.
25 Woo banda ga, Irkoy na Misira borey biney barmay,
takaa kaŋ ra i konna Irkoy jamaa,
i na nga tamey zanba.
26 A na nga tamoo Musa sanba
nda Haruna kaŋ a nʼa suuba.
27 I na Irkoy tammaasawey tee i game,
ka kayfiyaŋ tee Šam gandaa ra.
28 A na kubay sanba, kubaa na nongoo dii,
i mana ture nga šennoo ga.
29 A na ngi harey bere kʼi tee kuri,
a na ngi hamiisawey wii.
30 Ngi gandaa too met nda kormoto
hala ngi kokoyey hugu-izey gundey ra.
31 A šelaŋ, hamniyaŋ kaŋ ga ɲama kaa,
ngi laboo kul tee ndeŋ.
32 A na gari tee i se ncirɲi,
ka nuune beeri tunandi ngi gandaa ra.
33 A na ngi alanebɲaŋey nda jeejayɲaŋey hasara,
ka ngi laboo tuurey kayri.
34 A šelaŋ, ndoowey kaa,
ndoo beeriyaŋ kaŋ si kabandi,
35 kaŋyaŋ na ngi gandaa suboo kul ŋaa,
i na ngi laboo dumari-izey ŋaa.
36 A na ngi gandaa gunde jinawey kul kar kʼi wii,
ngi gaaboo ize jina-jinawey.
37 A na nga jamaa kaataray nda nzorfu kaaray nda wura,
boro kul mana cindi banda ngi alkabiilawey ra.
38 Ngi fattaroo tee ɲaali Misira borey se,
zama i nka tee i se hunburay beeri.
39 A na duula daaru kʼi gum
nda nuune kʼi noo gaay cijin here.
40 I nʼa ŋaaray, a na jerfendayyaŋ sanba i se,
a nʼi kungandi nda beenaa ŋaahaya.
41 A na tondoo feeri, hari fatta,
a doori ka koy sanda isa saajey ra.
42 Zama a ga hongu nga šenni henanantaa,
a ga hongu nga tamoo Ibirahima.
43 A na nga jamaa kaataray nda binekaanay,
borey kaŋ a nʼi suuba ɲaali kaatiyaŋ ra.
44 A nʼi noo dumiyaŋ gandawey,
i duu jamayaŋ faraa bagaa,
45 hala i ma nga hantumey dii,
de i ma gaabu nga ašariyawey ga.
Aleluya!