12
Haya kaŋ Irkoy nʼa har, a gʼa tee
1 Donkey boŋkoynoo ka woo don. Dooni kaŋ bande kurbu linji yaahakoyni goo. Woo ti Dawda zabur foo.
2 Faaba, Abadantaa, zama laadirantey ben,
borey kaŋ ga boro ga kabu dere.
3 Boro foo kul ga šenni futu har nga ceroo ga.
I ga šelaŋ cere se nda meekaanaytaray
amma nda bine hinka-hinka.
4 Yala Abadantaa ma meekaanawey kul halaci,
miɲey kaŋ ga šelaŋ nda bolsay,
5 borey kaŋ ga nee: «Ir deeney goo nda albarka,
ir goo nda ir miɲey,
may no ma hin ir?»
6 Zama alfukaarey kankamandi,
talkey taabi,
sohõ Abadantaa nee: «Ay ga tun,
ay ga borey hallasi kaŋ ga jaw hallasiroo se.»
7 Abadantaa šenney manʼti kala šenni alhakiikanteyaŋ,
i ga hima nda nzorfu kaaray alhakiika,
kaŋ mennandi labu kusu-ize ra hala cee iyye.
8 Ni, Abadantaa, nʼga kaa kʼi hawgay,
nʼgʼi hallasi zamanoo woo borey ra hala abada.
9 Boro laaley ga yaara nongoo kul here,
ifutu ga boobo adamizey game.