147
Abadantaa hinoo ga beeri
1 Aleluya!
Zama a ga boori boro ma don ir Koyoo maaɲoo se,
a ga kan a ga boori boro mʼa saabu.
2 Abadantaa ga Žerizalem cin koyne,
a ga Izirayel borey kaŋ say-say marga.
3 A ga borey noo baani kaŋ biney hasara,
a ga ngi dorey safar.
4 A ga handarawey hinnaa kabu,
a ga affoo kul cee nda nga maaɲoo.
5 Ir Koyoo ga beeri, nga hinoo ga beeri,
nga lakkaloo sii nda kaydoo.
6 Abadantaa ga talkey faaba,
a ga boro laaley yeeti ganda.
7 Wa dooni don Abadantaa se nda albarka daŋyan,
wa kuntiji kar ir Koyoo se!
8 A ga beenaa daabu nda duula,
a ga ncirɲi soolu laboo se,
a ga subu zayandi tondi hondey ra.
9 A ga adabbawey noo ŋaayan,
a ga gaaru-gaaru-izey kaŋ ga kaati noo ŋaayan.
10 Bari gaaboo manʼti baffoo a se,
a si kabu boro gaaboo ga.
11 Borey kaŋ ga hunbur Abadantaa ga kan a se,
borey kaŋ ga naata nga borohennataraa ga.
12 Žerizalem, ma Abadantaa šifa!
Siyoŋ koyraa, ma ni Koyoo saabu,
13 zama a ga ni koyraa miɲey ganbey kufaley noo gaabi,
a ga albarka daŋ ni izey ra ni gundoo ra.
14 A ga alaafiya tabatandi ni gandaa ra,
a ga ni kungandi nda alkama henna.
15 A ga nga yaamarey sanba laboo ga,
nga meešennoo ga zuru nda cahãyan.
16 A ga neeži zumandi sanda haabu,
a ga harandaŋ doori sanda boosu.
17 A ga nga galašoo tee kunturu-izeyaŋ kʼi warra,
may no ma hin ka kay nga yaynoo jine?
18 A ga nga meešennoo sanba kʼi mennandi,
a ga nga hewoo funsu, de harey ga doo.
19 A ga nga šenney har Yakuba se,
ka nga hantumey nda nga hantumey kaŋ kayandi har Izirayel se.
20 A mana takaa follokaa tee gandawey kul se,
i si nga hantumey kaŋ kayandi bay.
Aleluya!