3
Irkoy ga nga borey faaba
1 Woo ti Dawda zabur foo. A manʼa hantum kala waatoo kaŋ a ga zuru nga izʼaroo Absalom se.
2 Ya Abadantaa, ay torrokey ga boobo,
borey kaŋ tun ya ne ga boobo.
3 Boro boobo ga nee ya ne:
«Irkoy sʼa hallasi!»
Kay-kayna
4 Ka gar ni, Abadantaa ti ay koraa,
ni ti ay daržaa, nʼgʼay boŋoo jer.
5 Ay ga kaati ka Abadantaa cee,
a goo nga tondi hondu henanantaa ga, a gʼay zaabi.
Kay-kayna
6 Ay kani, ay jirbi.
Ay ga tun, zama Abadantaa gʼay faaba.
7 Ay si hunbur boro zenber-zenberey
kaŋ gʼay kuubi kʼay bere kʼay wanga kʼay daŋ game.
8 Tun, Abadantaa! Ay hallasi, ay Koyoo!
Zama nʼga agay iberey kul saŋ!
Nʼga boro laaley hiɲey kayri.
9 Hallasiyan ti Abadantaa wane!
Yala ni albarkaa ma bara ni jamaa ga!
Kay-kayna