58
Koy goo no kaŋ ga laboo ciiti
1 Donkey boŋkoynoo ka woo don. Takaa kaŋ nda a ga doonoo woo don se i ga nee «Masʼa halaci.» Woo ti Dawda bayti foo.
2 Cimi ti kaŋ dangayyan ti war ciitoo?
War ga adamizey ciiti nda fondaa wala?
3 Kalaa, war biney ra war ga goy futu tee,
war kabey ga teegoy laala boobandi gandaa ra.
4 Boro futawey hibi Irkoy ga za ngi ɲaŋey gundey ra,
taariharkey na fondaa naŋ za ngi hayyanoo ga.
5 I goo nda naaji kaŋ ga hima nda gandakarfu naajoo,
wala firsaw lutu kaŋ ga nga haŋaa daabu,
6 a si maa kottekoynoo jindoo,
ba albidakoyney kul ihennaa.
7 Ya Irkoy, hiɲey kayri miɲey ra!
Abadantaa, ganjihayla soogey hiɲey kayri-kayri!
8 Yala i ma dere sanda hari kaŋ mun!
Yala ngi biraw-izey masi duu gaabi!
9 Yala i ma tee sanda jingam kaŋ ga menne waynaa ra,
sanda zanka kaŋ mana hayandi nda hundi kaŋ si dii waynaa!
10 Za karjey mana tee karjiɲaa,
a ga firzi wala a ga kogu, hewoo ga koy nda ey.
11 Boro šerrantaa ga ɲaali, zama a dii kaŋ Irkoy faasa nga se,
a ga nga cewey ɲumay boro laaley kuroo ra.
12 Woo ra borey ga nee: «Jaka boro šerrantaa goo nda banaw,
jaka Koy goo no kaŋ ga laboo ciiti.»