61
Irkoy ganakey ga talfi a ga
1 Donkey boŋkoynoo ka woo don. Dooni kaŋ bande hooray jinay linjikoyni goo. Woo ti Dawda zabur foo.
2 Ya Irkoy, maa ay kaatoo se,
haŋajer ay ŋaarayroo se!
3 Ay goo aduɲɲa boŋ faa ga, ay ga kaati ka ni cee,
waati kaŋ ay binoo dunbu,
mʼay ka koy tondoo boŋ kaŋ jer nda agay!
4 Zama ni ti nongoo kaŋ ra ay gʼay boŋ talfi,
ni manʼti kala soorohugu kuku gaabante kaŋ ga kay agay iberoo jine.
5 Ay ga baa waati kul ya bara ni hukkumoo cire,
ya duu lanbadoo ni fatawey cire.
Kay-kayna
6 Zama ni, Irkoy, nʼga maa ay meefurey se,
nʼnʼay noo tubuhayaa kaŋ nʼgʼa noo borey se kaŋ ga hunbur ni maaɲoo.
7 Han kuku tonton kokoyoo aloomuroo ga,
yala nga jiirey ma kuu zaman nda zaman!
8 Yala a ma goro hala abada Irkoy jine!
Naŋ ni borohennataraa nda ni laadirtaraa mʼa lakkal!
9 Ay si fay nda ka don ka ni maaɲoo saabu,
zaari kul ay ga allaahidey kaa kaŋ ay nʼi zaa ma ne.