8
Irkoy beeraa nda nga daržaa
1 Donkey boŋkoynoo ka woo don. Dooni kaŋ bande Gat koyraa nzarka goo. Woo ti Dawda zabur foo.
2 Abadantaa, ir Koyoo,
ni maaɲoo ga beeri laboo kul ga,
ni beeraa bisa beenaa wanoo.
3 Zanka kaccey nda naanandey miɲey nda
nʼga ni gaaboo cebe ni nkuwawey se,
ka iberey nda borey kaŋ ga baa ngi ma ngi dukuroo kaa ni ra miɲoo daabu.
4 Nda ay na beenaa guna kaŋ ni kabey nʼa tee,
nda handoo nda handarawey kaŋ nʼnʼi gorandi,
5 macin ti boro hala ma hongu a,
adamize ti macin hala ma huga nda a?
6 Ka gar haya kayna nda Irkoy goo adamizey jine,
nʼna darža nda beeray tee a se boŋkoyni fuula.
7 Nʼnʼa daŋ hayey kul jine kaŋ ni kabey nʼi tee,
nʼna haya kul daŋ cewey cire,
8 a ma tee alman buuna nda ibeeri, i kul cere ra,
ba ganjihoogawey,
9 nda beenaa cirawey, nda teekoo hamiisawey,
nda haya kul kaŋ ga zuru teekowey bande.
10 Abadantaa, ir Koyoo,
ni maaɲoo ga beeri laboo kul ga.