82
Irkoy ga ciiti dunbu nda cimi
1 Woo ti Asaf zabur foo.
Irkoy ga kay nga margaroo game,
a ga ciiti dunbu koyyaŋ game.
2 Hala waati foo no war ga fay nda ka ciiti dunbu
nda šerretaray jaŋay ka boro futu faaba?
Kay-kayna
3 War mma hima ka ciiti dunbu yalaafantey nda alyatimey se,
ka ciiti nda šerretaray borey kaŋ ga taabi nda alfukaarey se.
4 Wa yalaafantey nda talkey hallasi,
kʼi kaa boro laaley kabey ra.
5 Amma i si haya kul bay, i si faham haya kul se,
i ga dira kubay ra.
Aduɲɲa asaasey kul ga jijiri.
6 Agay hunday nee: «War manʼti kala koyyaŋ,
war kul manʼti kala Koy Jerantaa izeyaŋ.
7 Amma war ga buu sanda adamize,
war ga kaŋ sanda boŋkoyni.»
8 Tun ka laboo ciiti, Irkoy,
zama gandawey kul manʼti kala ni tuboo.