Bangandiroo citaaboo
Citaaboo fahamandiroo
Yehiya ka citaaboo woo hantum. A ga hayayaŋ cebe cere bande kaŋ Isa Almasihu nʼi bangandi a se. A ga hayey deede kaŋ a dii ey waatoo kaŋ Hundi Henanantaa nʼa dii. Waatoo kaŋ a ga citaaboo woo hantum, a sii kala gungu-ize foo ra kaŋ se i ga nee Patmos, Azi gandaa here. A sii kala Gres gandaa ra, Tirki gandaa jeroo ga. I nkʼa gaabi ka koy no din, zama hayaa kaŋ se a na Alhabar Boryaa waazu. Waati no kaŋ ra kokoy beeroo ga hanse ka Isa ganakey zarabi. A ga ganakey gurzugay, zama i ga nee kaŋ ngi si koy kul gana nda manʼti Isa Almasihu.
Gurzugaa din waati no Yehiya ga hantum Egilizey se ka biney daŋ. Nga hantumoo ra ir dii hinna booboyaŋ kaŋ goo nda almagana, sanda «iyye» kaŋ maanaa ti «timmeyan». Nga citaaboo ga hin ka zamnandi zamna hinza (zamnaa 1.19):
1. Hayey kaŋ Yehiya dii ey, maanaa Isa kaŋ goo nga daržaa ra (zamna 1na).
2. Hayey kaŋ teendi, maanaa bataga iyyaa kaŋ hantumandi Egiliz iyyaa se (zamna 2to—3to).
3. Hayey kaŋ ga kaa ka tee (zamna 4to—22to).
Citaaboo benantaa ga, Isa ga allaahidu noo nga ganakey se ka nee i se: «Cimi no, ay ga kaa nda cahãyan.» Ganakey gʼa zaabi ka nee: «Kaa, ir Koyoo Isa» (zamnaa 22.20).
1
Citaaboo addaliloo
1 Isa Almasihu bangandiroo ne kaŋ Irkoy nʼa noo a se hala a ma hayey kaŋ ga hima ka kaa ka tee ne nda kayna har nga tamey se. Almasihu na nga almalaykaa sanba nga tamoo Yehiya do a mʼa filla a se.
2 Yehiya na seedetaray tee kaŋ hayey kul kaŋ nga dii ey manʼti kala Irkoy meešennoo nda Isa Almasihu seedetaraa.
3 Boraa duu gomni kaŋ ga annabitaray šenney caw nda borey kaŋ ga haŋajer i se ka hayey dii kaŋ hantumandi a ra, zama waatoo man.
Yehiya hantum Azi gandaa Egiliz iyyaa se
4 Agay Yehiya ka hantum Egiliz iyyaa se kaŋ goo Azi gandaa ra. Irkoy anneemaa nda alaafiyaa ma bara war ga. Irkoy kaŋ ga bara, kaŋ gay a ga bara, kaŋ goo kaa mʼi noo war se, nga nda Irkoy Hundi iyyaa kaŋ goo nga kokoy gorodogoo tenje,
5 nda Isa Almasihu kaŋ ti seede laadirantaa, nga ti boro jinaa kaŋ tun ka hun bukawey ra, nga ti kokoyey boŋkoynoo laboo ga. Nga ti boraa kaŋ ga baa ir, de a nʼir feeri kʼir kaa ir zunubey ra nda nga kuroo.
6 A nʼir tee kokoytaray nda sargari juwalkaw nga Baaba maaɲoo ga kaŋ ti nga Irkoy. Nga, darža nda hini ma bara a se abada hala abada. Amin.
7 Nga ne, a goo ma kaa duulawey gamey ra,
moo kul ga kaa ka dii a,
ba wey kaŋ na gaahamoo fun.
Alkabiilawey kul kaŋ goo laboo ga, ga hẽe nga maaganda se.
Nhuu! Amin.
8 Agay, agay ti Alfa nda Omega, ir Koyoo Irkoy kʼa har, nga ti boraa kaŋ ga bara, kaŋ gay a ga bara, kaŋ goo kaa, Hini-kul-koyoo.
Isa na nga boŋ bangandi Yehiya se
9 Agay Yehiya, war armaa nda war hangasinoo Isa zaraboo, nda nga Laamaa, nda nga muɲeyanoo ra, ay bay ka koy gungoo ra kaŋ se i ga nee Patmos Irkoy meešennoo nda Isa seedetaraa maaganda se.
10 Irkoy Hundoo nʼay dii ir Koyoo zaaroo hane, ay maa ay dumaa ga kaati beeri kaŋ ma nee laati beeri.
11 A nee: «Hayaa kaŋ nʼdii a, a hantum citaabu ra, mʼa sanba Egiliz iyyaa se kaŋ goo Efez, nda Isimir, nda Pergam, nda Tiyatir, nda Sard, nda Filadelfi, nda Lawodise koyrawey ra.»
12 Ay ɲeli ka dii jindoo kaŋ ga šelaŋ ya ne. Kaŋ ay ɲeli, ay dii wura fitilla gorodoo iyye.
13 Fitilla gorodoo iyyaa game boro goo kaŋ ga hima nda adamize, darbay kaŋ ga zunbu hala cewey ga goo jindoo ra, wura gamahaw ga gandey haw.
14 Boŋoo nda hinbirey ga kaaray ma nee feeji hinbiri kaaray, sanda haabu, moɲey ga hima nda nuune deene.
15 Cewey ga hima nda alhan nerante kaŋ ma nee a nka hansandi alforon ra. Jindoo ga hima nda hari beeri jinde.
16 Kabe hennaa ra handaray iyye goo, miɲoo ra takuba ga fatta kaŋ mee hinkaa kul ga kan. Ndumoo ga hima nda waati kaŋ waynaa ga dii garaw.
17 Waatoo kaŋ ay dii a, ay kaŋ cewey cire sanda bukaw. A na nga kabe hennaa fur ay ga ka nee: «Masi hunbur, agay ti ijinaa nda ikokorantaa.
18 Agay ti baahunantaa, ay bay ka buu, amma nga ne, ay ga huna abada hala abada, buuyan nda alaaharaa kufal-izey goo ay kone.
19 Adiši hayey hantum kaŋ nʼdii ey, wey kaŋ goo ma teendi nda wey kaŋ ga kaa ka tee hayey wey banda ga.
20 Handaray iyyaa kaŋ nʼdii ey ay kabe hennaa ra sirroo nda wura fitilla gorodoo iyyaa maanaa ne: handaray iyyaa manʼti kala Egiliz iyyaa almalaykey, fitilla gorodoo iyyaa manʼti kala Egiliz iyyaa.»