MATIUS
1
Yesus Na Yobe Naei Kamahe Naei
(Luk. 3:23-38)
1 Na bere hele Yahudi kanine ro mbai nekewole na ro Yesus. Neyae Yahudi ro miyae naei yobe mbai nendo Abrahambe orona menara yeuboke, nane merau Yahudi naei Ondofolo Kaban Daudle orona mena. Allah yae nda Yesusre Wali Ondofolore ranenjendere oro umau heraweungeboke.
Yesus na yobe naei kamahe naei homone molaikoke nda niyae:
2 Abrahambe kelu Ishak,
Ishakle kelu Yakub,
Yakuble kelu Yehuda na aka baeke wa bele,
3 Yehudale kelu Peresle Zerahle Tamar yae honoukoke,
Peresle kelu Hezron,
Hezronbe kelu Ram,
4 Rambe kelu Aminadab,
Aminadable kelu Nahason,
Nahasonbe kelu Salmon,
5 Salmonbe kelu Boas Rahab yae hongke,
Boasle kelu Obed Rut yae hongke,
Obedle kelu Isai,
6 Isaite kelu Daud Yahudi naei Ondofolo Kaban.
Daudle kelu Salomo Badseba bere Uriale nekeikoke miyae yae hongke,
7 Salomole kelu Rehabeam,
Rehabeambe kelu Abia,
Abiale kelu Asa,
8 Asale kelu Yosafat,
Yosafatle kelu Yoram,
Yorambe kelu Uzia,
9 Uziale kelu Yotam,
Yotambe kelu Ahas,
Ahasle kelu Hizkia,
10 Hizkiale kelu Manasye,
Manasyele kelu Amon,
Amonbe kelu Yosia,
11 Yosiale kelu Yekhonya na aka baeke wa bele. Nebei hee Israelna ro miyae Babel ro miyae yae ikilewate, Babel kanire hauwate ewate.
12 Israel Babel kanire ekate hee yae
Yekhonyale kelu Sealtiel hongkate,
Sealtielle kelu Zerubabel,
13 Zerubabelle kelu Abihud,
Abihudle kelu Elyakim,
Elyakimbe kelu Azor,
14 Azorle kelu Zadok,
Zadokle kelu Akhim,
Akhimbe kelu Eliud,
15 Eliudle kelu Eleazar,
Eleazarle kelu Matan,
Matanbe kelu Yakub,
16 Yakuble kelu Yusuf Mariale molo Yesusre hongke. Nda Yesus Allah yae Wali Ondofolore oro umau heraweungeboke kiyae.
17 Yesus Na yobe naei kamahe naei nemene na helen nda niyae: Abrahambe heera mewole Daudle heene, na akona akona nemene me bee oro nen keli bele (14). Daudle heera mewole Babel kanine aisayeukoke heene, na akona akona nemene me bee oro nen keli bele (14). Nebei sului mbai Babel kanine aisayeukoke heera mewole Yesusle heene, na akona akona nemene me bee oro nen keli bele (14).
Yesusre Hongkate na Mekai Ma
(Luk. 2:1-7)
18 Yesus Wali Ondofolore hongkate na mekai ma nda niyae: Yesus nenake Maria Yusuflere endere be hinainyeboke, rore miyaere namman eyeiboi mo, Allahle Roh yae aungebokene Maria emale yeuboke.
19 Yusuf wali himaloungeboke nekeweke aerene ro miyae helen bene febe mokonnebonde belene, Mariare maleu-maleu wae nennehinde naei merau raungehike.
20 Yusuf nibi ninae mokoukoke Mariare nukennebondere. Ijongkune eungeke nebei u benene haiwole hee Allahle malaikat imene uwa yakaungeboke weunge, “Yusuf, Ondofolo kaban Daudle orona mena, Mariare rowele waei miyaere yembonde naeise wa kena wauwau wae okoijae. Rabuhine ban, Maria na kou bulu yahi buluna yale Fa ro miyae naeinya ban, nebeibe Allah yae Rohle walora Mariale kou ei yahi einye aungeboke yale.
21 Maria Kelu Fabe hononde, Na ro Yesus yae hele roungebonde. Rabuhine ban nebei Kiyae yae hele nda kanina kelana ro miyae hole emmimolonde na beko neban mokoyatera emmifaeinyende.”
22 Allahle ako faeuko Naei yendo kayaalo Yesaya yae eleukoke na hului yembonde naeise nda rambun bewate.
23 Yesaya nda mekai a eleukoke,
“Maengke yele mbai emale miyae yembonde,
kelu fabe hononde.
Na ro ronainyebonde niyae: Imanuel.”
(Imanuel na mekai: Allah aere ei haweyeume.)
24 Yusuf ijongkura aunguke mo, Allahle malaikat yae imene ukeunge a huluinye hakouboke. Mariare roke nekewote.
25 Nebeibe hokolo bee uwa mbainye ohonoi mo meinyekekokete Maria fa honoke. Allahle malaikat yae eleukoke huluinye, nebei Fa na ro Yesus yae rainyeboke.