3
1-2 Titus, Yesusre hakoyainye ro miyaere isaeyeumile nda a u bene foi jae nekenaimile: kani me kela mere ikilaiboke yo bele na yun-jun hiwa yo bele naei a keleene nekenate nane merau naei a hakonaimile, nauwa foi mokonate naeise mokonainyehande, a beko ro hi miyae hi naei ehuweijae, naeise naeise rei mai bele nekenate, wali na mekai yae nekenate, naeise naeise kena u ane rainyehike yae mokonate.
3 Na bere hele aei wali u mekai kobu heene nekewande nda wanen: ro miyae hiwa naei are oboroyei ehakoyei, hiwa yo a ame-ame yanaimeke, aei bekore kena kowande nane merau nda kani kelana foi bele yu bele erande rambun aei walire ikileumekoke, ro kelai miyae kelai hiwa na waline beko benate me u mokowande, ro miyae hiwa yo naei rambun yaromakondere kena haehae kowande, ikele aeise naeise kowande.
4-5 Naendae mekai sele aei u mekai nebei wanenbe, nebeibe ya mbai aei Walilo Allah yae keleumeboke Na u mekai nime haba nekeimeyele nane merau aere kena buhae heyeumele. Neyae aere hole moloumeboke, aei wali foi nekewande aerene ban, nebeibe Neyae yanekoi yase yae ei haweumekokene. Aere holere moloumeboke nibi nda wanen: Allah yae aere kuyeumekoke Naei holone haumekoke, Naei Roh yae wali neme ikeume.
6 Allah yae Wali Ondofolo Yesus aei Walilole walora Naei Roh aei waline aumeboke.
7 Eyae Naei fa-fa helere imabonde naeise, nane merau wali hena bona yaromalere rabo elae yae halemande naeise, Allah nebei me u mokouboke. Na kena buhae aere ban mae heumekokene aei wali himaloumeboke walora eyae na hului naei fa-fa helere imabonde.
8 Homo moloukokawalene na bumana a nemene na foi bangka mo, hila rabo halen. Nebeinye Titus, Allahre hila rabo halewainye ro miyae me u foi na hibi-hibi mokonayende naeise, reyae kena kale weyae nebei a elae yae keleumile.
9 Nebeibe a bangka-bangka, han hoi-soi a ma eleijae. Abu naei arai naeitena yo mei-mei huwate aerene bele, Musale walora wali heere foloukoke aerene bele a ekileijae. Rabuhine ban nebei mekai a kileyate yae foise eyei, rambun foi omokoiboi.
10 Ro miyae holo mbai mokombonde naeise ame-ame kelemmile kiyaere angkaa yoboungebonde. Neyae hee eneinya, benen angkaa yoboungebonde. Oboroiboi mo kondena, nebei ro bele wali nibi mbainye oroyeijae.
11 Mayae maisaei nebei mekai ro na u bene yeli-yelibe yeubokene, u mekai beko mokoyele. Neyae naeisaei sele na me u beko mokolera nauware beko yeungebe, nebeibe namman mokoimeyele.
A Humboise
12 Artemas yae, Tikhikus yae, nebei beera hire ufende waei bokore ende. Neyae ende heera, Titus, weyae releungekonde Kreta yokobara kulun wele na hibi raei bokore Nikopolis yore mele, rabuhine ban raei kenara hokoukokale hin manse mennende heene oko name keli hului nebeinye erenekengkonde.
13 Ro bee Zenas wali heere folaikokere isaeyeukoke kiyaele Apolosle Kreta yokobare kulun ungete enete hee, naei kolo rambun-rambun ijoko foi yae erengkombe nane merau na hului-sului jae hakoumikombe.
14 Nane merau Yesusre hakoyainye ro miyae na wali rambun na hului-sului hononaimile naeise bele na wali rambun kalo eimoloi naei bele isaeinyaibonde helene kalia me u foi mokonate.
15 Rangkele nekande ro miyae ware ro melaeyaeyete. Nebeinya Yesusre hila rabo haleyainyene maere buhaere haeimele yore ro melaeyeumibonde.
Reyae ebeli banale Allah mare kena buhae aere ban mae henemembe.