8
Him si Iesu a kuluk i diar á torahin tám osmapak
1 Iakte atalsa timani si gam suri matngan tám osmapak táil ái Káláu a oboi suri na tur sur git. Má minái á támin táit ur on. Ái Iesu ái á matngan tám osmapak táil erei iau parai, má ái á kángit tám osmapak muswan. Má imi sang ái, i kiskis pakta i balsán mingin ái Káláu Tám Pulpulus Tánráu.
2 Má a lu longoi kán him án osmapak i rumán pálpálih imi bát, wa pokon muswan suri lotu ái uri narsán ái Káláu. Kápte kesá kálámul a longoi. Ái Káláu sang a longoi.
3 Talar kán bos tám osmapak táil no suri na lu artabar má nák lu osmapak mul uri narsán ái Káláu. Má ngorer tám osmapak táil minái iau parai, ái mul a hut uri narsán ái Káláu mai kán osmapak.
4 Má ngo na han liu main i bim, kápnate kipi him án tám osmapak sang kabin a mon á tan tám osmapak, gegen si Lewi mái Aron, dikte kis suri tari artabar ngorer a parai i nagogon si Moses.
5 Má tan tám osmapak er di kis main i bim, kándi him di lu longoi má rum di lu him on, a ngoro tártárwán sár i nián ái Káláu imi a lu kis muswan ái. Git mánán ngo a ngorer kabin i pákánbung ái Moses a eran suri matananu Israel da longoi rumán pálpálih si Káláu, ái Káláu a inau on ngoromin ngo, “Matngan rum una longoi, na ngorer sár i matngan iau inngasi singim tungu gitar ami pungpung á Sinai.”
6 Mái sár onin i hutngin kamkabat, him erei ái Káláu ákte tari ur si Karisito suri na tám osmapak táil, a tuan sorliu alari him káián tan tám osmapak di lu longoi main i bim. Má kán him a sorliu kabin a kopkom tili hutngin kamkabat er ái Karisito sang a katbán kálámul on, má ái a kápti matananu tiklik mam Káláu. Áá, hutngin kamkabat er a kuluk i diar á torahin. Má kamkabat erei a kuluk kabin a aptur tili oror si Káláu er a parai ngo na longoi tan lalain táit suri kán matananu alari tan táit a longoi tungu.
Hutngin kamkabat a kuluk i diar á torahin
7 Má mulán kamkabat er kápate artálár suri long anokwai matananu suri da han páput i Káláu. Ngo na han long artálár pasi ngorer, ki kápnate mon mul á áruán kamkabat.
8 Mái sár ái Káláu a inngasi ngo mulán kamkabat er kápate him kuluk má kápate long anokwai matananu, má ngorer ák parai si di ngo,
“Á iau ái Konom iau parai si gam, gama alongra!
Pákánbung na hut be suri hutngin táit ina longoi.
Ina atri hutngin kamkabat ur singin mát si Iuda,
má ur singin tan mát no si Israel.
9 Kamkabat erei kápnate ngorer i kamkabat tungu iakte longoi mai rang támin i di
i pákánbung iau lam pas di alari balis á Aigipto.
Ái rung er kápte di muswan uri kamkabat iau longoi mam di,
má ngorer iak ilang alar di.
Á iau ái Konom iau parai si gam ngorer.
10 Má hutngin kamkabat ina atri mai matananu Israel er namur a ngoromin.
Ina oboi kak nemnem i kándi hol,
má da lu mánán kuluk i kak sál.
Má ina le páptai i bál di,
má da laes suri mur i kak nemnem.
Á iau masik ina kándi Káláu,
má á di da matananu kaiak suri ina lain ololoh i di.
11 Kápte kesi kálámul na atintini turán sur iau,
má kápte kes na parai si tuán ngo, ‘Ukte mánán i Káláu?’
Kápdate lu parai ngorer kabin di no da mánán tus iau ngo iau kándi Konom.
Tan kálámul no sang da mánán,
ái rung kápte ngis di mái rung mul di árngai ngis di.
12 Má ina mámna di
má ina hol palai tan táit a sák er di longoi,
má kándi tan sápkin káp ina te hol pasi mul.”
13 Ái Káláu a parai ngo áruán kamkabat a hutngin, má ngorer a obop palai mulán kamkabat ngo ákte torahin má. Má táit a torahin ngorer, ki páput má da long palai.