AMARUBA EMWA ABAGALASIYA
Enshokolezi oku maruba emwa Abagalasiya
Paolo ali mwîshogwa wa Nnâmahanga, Yezu wamuhugûlaga Emyanzi y’Akalembe ayigîriza (1). Okubà mukristu kurhali kushimba obwôrhere bw’Abayahudi (2); bulya okukembûlwa kuli ntâco, n’okurhakembûlwa nakwo kuli ntâco; akantu kagwêrhe akamalo, kuli kuhinduka ciremwa cihyâhya (5, 5-6; 6, 15). Omukristu akwânîne ayumve oku abemêzi boshi muli Kristu bakola bene Abrahamu. Ye Nnâmahanga ahâga endagâno omu buyêmêre mpu arhaciri Abramu, Larha-wa-lukengwa, ci Abrahamu, Îshe-wa-mbaga-mwandu. Ababatizibwe barhacirimwo kabôlo. Obuyêmêre buyimangira oku ciragâne ci arhali oku Irhegeko, bulya Irhegeko lirhâna misî ya kushimba amarhegeko (3). Erhi Nnâmahanga abona oku amango gayunjwîre arhuma Omugala, aburhwa n’omukazi, afîra ebyâha bîrhu, anafûka; n’abamuyêmîre bahâbwa Mûka wabarhabâla okushimba amarhegeko mafundikire omu irhegeko ly’obuzigire, barhali bajà ci bâna baburhe (4-5). Ngasi muguma acîhangâne kuyâka ebijiro bigalugalu by’omubiri ahêkwe na Mûka Mutagatîfu (5, 5-6. 13-6, 17).
1
Paolo acîmanyisa, anahâna omusingo
1 Paolo, ntumwa, arhali oku bulonza bw’abantu nîsi erhi oku bulagizi bw’omuntu, ci oku nshôkano ya Yezu Kristu na Nyamuzinda Îshe wamufûlaga omu bafù,
2 nie na bene wîrhu boshi rhuli rhweshi, oku Ekleziya z’e Galasiya.
3 Kuli mwe engalo n’omurhûla gwa Larha Nnâmahanga na Nyakasane Yezu Kristu,
4 wacîhânaga nterekêro oku byâha bîrhu, mpu lyo arhurhenza omu bubî bw’er’igulu, nka kulya Larha Nyamuzinda alonza,
5 olya okayagirwa emyâka n’emyâka! Amen.
Emyanzi y’Akalembe ebà miguma yône
6 Nsômîrwe kurhi mudwîrhe mwatwîka duba-duba ntya olya wammuhamagalaga omu nshôkano ya Kristu, mpu mushimbe eyindi-yindi myanzi y’akalembe;
7 n’obwo Emyanzi y’Akalembe erhabamwo kubiri. Ci hali abantu badwîrhe bammuhiramwo akavulindi n’okulonza okuhushikanya Emyanzi y’Akalembe ya Kristu.
8 Mâshi owankaderha mpu ammuyigîriza eyindi-yindi myanzi y’akalembe erhali nk’erya rhwammubwîrizagya, ciru akabà rhwêne nîsi erhi malahika wamanuka emalunga, oyo akahera!
9 Kulya rhwammubwîraga mîra, nashub’ikuderha buno: owammuyigîriza eyindi-yindi myanzi y’Akalembè erhali nk’erya mwayigîrizibagwa, oyôla erhi ali mukâge!
10 Omu kuderha ntyo, ka kusîmwa na bantu erhi kusîmwa na Nyamuzinda nnonzize? Ka bantu nnonza okusîmîsa? Acibâga bantu ncilonza okusîmîsa, singa ntabà mwambali wa Kristu.
I. Paolo ashambala kurhi ayigîrizagya Emyanzi y’Akalembe
Kristu wabwîrizagya Paolo Emyanzi y'Akalembe ayigîriza
11 Nêci, leki mmubwîre, bene wîrhu: Emyanzi y’Akalembe nyigîriza erhabà ya bantu;
12 bulya arhali muntu wayimpâga erhi kuyinyigîriza, ci Yezu Kristu yêne wayinfulûliraga.
13 Mwayumvîrhe baderha oku nayôrhaga mîra omu idini ly’Abayahudi, n’oku ntagwêrhe Lugero omu kulibuza Ekleziya ya Nyamuzinda n’omu kulonza okuyisherêza.
14 Omu idini ly’Abayahudi, nalusha bîrhu banji rhwakulaga rhweshi, bulya ntâye wampimaga okusêra oku ngeso za bashakulûza.
15 Ci olya wacinyîshogaga kurhenga nciri omu nda ya nyâmà, Nyamuzinda anampamagala oku nshôkano yâge, erhi alonza
16 okummanyîsa Omugala, mpu lyo nâni ngend’imuyigîriza abapagani, ho na halya, buzira kudôsa omubiri n’omukò,
17 buzira kurheremera e Yeruzalemu emwa balya banshokoleraga okubà ntumwa, nalikûlira omu Arabiya; okuhandi nashub’ijà e Damasi.
18 Erhi hagera myâka isharhu lyo narheremirage e Yeruzalemu, nti ngend’ilolakwo Kefa; rhwabêra rhweshi naye nsiku ikumi n’irhanu.
19 Ci ntà yindi ntumwa nabwîne, okuleka Yakôbo, mwene wâbo Nyakasane.
20 Ebi mmuyandikîre, Nyamuzinda yêne amanyire oku burhali bunywesi!
21 Okuhandi nanacijà omu bihugo by’e Sîriya n’eby’e Silisiya.
22 Ci kwônene ntâl’inyishibwi omu Ekleziya za Kristu z’omu Yudeya.
23 Bakâg’iyumva baderha kwône, mpu: «Olya wakâg’irhulibuza mîra, ye kola odwîrhe ayigîriza bulya buyêmêre alonzagya okuherêrekeza».
24 Bakakuza Nnâmahanga erhi nie ntuma.