16
Olwimbo lya Yuditi
1 Yuditi anaciderha, erhi: «Muyimbire Nnâmahanga mumurhimbire n’engoma. Muyimbire Nnâmahanga n’empundu, mumuzihire ennanga z’okumukuza, muharâmye munakuze izîno lyâge.
2 Bulya Nyamuzinda ye Nnâmahanga ofunga entambala, bulya omu bihando byâge ekarhî k’olubaga, anandîkûzize omu maboko g’abashombanyi bâni.
3 Asûru anacirhenga omu birhondo byâge, ayisha ahumire n’omwandu gw’engabo, obunji bwâbo bwanacifûnika emigezi n’obunji bw’enfarasi zâbo bwanacibwîkira orhurhondo rhwoshi.
4 Ali amâhiga mpu ecihugo câni acidulika muliro n’abâna bâni abamalire n’engôrho yâge, mpu ebirhaba abinigûze okw’idaho, abâna bâni balîrwe oku mpinga, n’abanyere bâni mpu gubè munyago.
5 Nyamuzinda ogala byoshi amabaloha nyuma n’okuboko kw’omukazi.
6 Bulya entwâli yâbo, arhali mpimbo za misole zayiyisire, arhali bene Titani bamunizire, arhali balya bantu balîrî kulusha bali bamurhabalire, ci ali Yuditi, mwâli wa Merari, ye wamuhabulaga n’obwinjà bw’iranga lyâge.
7 Bulya anahongwîre emyambalo ya obukana bwâge mpu lyo akuza bene Israheli bali omu mababale.
8 Obusù bwâge abushîga amanukato, emviri zâge azishoshamwo ecimanè, ayambala akanzo k’ecitâni, mpu lyo amushumika.
9 Enkwêrho zâge zamuhûsa amasù, n’obwinjà bwâge bwamurhimbalaza obukengêre. Akêre k’ecihombo kamutwa igosi.
10 Abanyapersi bageramwo omusisi erhi bukali bwâge burhuma, n’Abanyamede bajiremwo entemu erhi burhwâli bwâge burhuma.
11 Okubundi abîrhôhye bâni babanda akahababo, nabo bageramwo omusisi. Bahamagaza izù bwenêne, nabo abanzi bagaluka cinyumanyumà.
12 Abakazâg’ijâcirwa mpu ho bene abakazi, babanigûza nka bantu bajabayâka. Boshi bahungumukira muli eyo ntambala ya Nnâhamwîrhu.
13 Nkolaga nayimbira Nyamuzinda olwimbo luhyâhya: Nyakasane, mushâna oli mukulu kulusha, we muny’irenge, oli wakurhangaza omu misî yâwe, orhankahimwa na cici.
14 Ebiremwa byoshi bikukolere, bulya wadesire akanwa byanahabà. Wabirhumira omûka gwâwe na byoshi byajirwa. Na ntâye wankahakana akanwa kâwe.
15 Entondo zahuruduka zône, zagenzikanwa n’emihusi y’amîshi. Emihirigisi y’amabuye yanajonga embere zâwe nka nungulu ya buci. Ci kwône ngasi bakurhînya we lwâkiro lwâbo.
16 Nêci yâgirwa biri binyi ebi bakurhûla nka nterekêro y’akisûnunu kinjà. Biri binyi kulusha ebikurherekêrwa nka mashushi galya bayôkera oku luhêro. Ci omuntu orhînya Nyakasane ye onali muntu nkana ensiku zoshi.
17 Iragi libî oku mashanja gacishomya okuhalalira olubaga lwâni. Nyamuzinda ogala byoshi anâbahane oku lusiku lw’okutwa olubanja. Abahira omuliro na ebinyagasi omu mubiri, bâyâma ensiku zoshi.»
18 Erhi bahika aha Yeruzalemu, boshi bakanya baharâmya Nnâmahanga, n’erhi olubaga lubà lwamâcêsibwa loshi, barhondêra okuhêra enterekêro zâbo z’embâgwa, ezayôcibwa, barherekêra na ngasi zindi nterekêro banali balonzize bône, bahâna entûlo.
19 Yuditi anacirherekêra emwa Nnâmahanga birya birugu bya Holoferno byoshi. Birya olubaga lwanamuhâga n’erya mishangi Yuditi yêne arhenzagya oku ncingo ya Holoferno.
20 Olubaga lwacîsimîsa oku lunahashire aho ka-Nyamuzinda myêzi isharhu yoshi na Yuditi anabêra haguma nabo.
Okugikula n’okufà kwa Yuditi
21 Erhi ago mango gagera, ngasi muguma anacishubira emwâge. Yuditi anacishubira e Betuli, anacibêra aha mwâge. Amango ali anacizîne goshi, Yuditi ajà irenge bwenêne omu cihugo.
22 Banji balonza okumusheba, ci arhacimanyanaga na mulume omu buzîne bwâge boshi, kurhenga halya îba Menashè anafiraga anashîmâna b’îshe ekuzimu.
23 Nêci irenge lyâge lyàluga bwenêne, ci erhi n’emyâka nayo yajà yamugonza mulya nyumpa y’îba. Ahika omu myâka igana n’irhanu. Alîka olya mwambalikazi. Buzinda afîra aho Betuli, banagend’imubisha mulya lwâla banabishaga îba Menashè.
24 Omulala gwa bene Israheli gwanacimushîba nsiku nda zoshi. Embere afè ali erhi agabire birugu byâge emw’ab’omu mulala gw’îba Menashè n’emw’ab’omu mulala gwâge yênene.
25 Ntâye wacidesire mpu ahalalire bene Israheli amango ga Yuditi goshi, ciru n’amango ali amâfà.