6
Amahêro g’ecipagani omu cihugo
1 Erhi kugera nsiku nsungunu, mwâmi anacirhuma mushosi muguma w’e Atena mpu agendisêza Abayahudi baleke okushimba amarhegeko g’ababusi bâbo, anabahanze okushimba amarhegeko ga Nyamuzinda omu kalamo kâbo.
2 Mpu bahemuke banahemule aka-Nyamuzinda k’e Yeruzalemu banakârherekêra Zeusi w’e Olimpe, n’ak’e Garizîmi bakarherekera Zeusi w’omurhima mwinjà nk’oku abantu b’eyo banalicîfinjire.
3 Amabî galuga galusha olugero, ciru kwabà kuzibu bwenêne oku bantu okushubigalembera.
4 Bulya aka-Nyamuzinda kali kayunjwîre bya bugonyi n’ebindi bigalugalu, abapagani bakaz’icîsîmikizamwo haguma n’embaraga, ciru bakaziyankira abakazi omu hantu hatagatîfu, banakahêkamwo ebirhakwânîni okujamwo.
5 Oluhêrero nalo lwàli luyunjwîre nterekêro ngalugalu zirya zihanzîbwe n’amarhegeko.
6 Kurhankacihashikîne okukulikira olwa Sabato, erhi okulanga zirya nsiku nkulu z’ababusi bîrhu ciru n’okuhash’iderha oku omuntu ali muyahudi.
7 Obulagîrire bunene bwarhuma Abayahudi bakaz’ishangîra kuli ezôla nterekêro zakazâg’ijirwa ngasi mwêzi omu lusiku lw’okuburhwa kwa mwâmi; omu nsiku za Dionizo, bakazâg’ibasêza okuyambaliza ebimanè nk’oku binayôsire birhegesirwe n’okujà oku lugendo lw’okukuza omuzimu wa Dionizo.
8 Olushika lwanacigera omu cihugo c’Abagereki oku burhegesi bwa Ptolemeyo mpu Abayahudi banali omu bihugo bya hôfi boshi bakashimba eryo irhegeko n’okulya oku biryo birherekêre,
9 mpu banayîrhe ngasi boshi bahakanyire okushimba amarhegeko g’Abagreki. Ebyo byoshi byakamanyîsa abantu oku obuhanya bubali hôfi.
10 Ntyôla bakazi babirhi banacigwârhwa erhi bamâkembûla abâna bâbo, bamanika abâna bâbo oku mabêre gâbo, babageza omu lugo lwoshi, bâgendibaloha enyanya ly’ebyôgo.
11 Abandi banajâga omu lwâla boshi mpu bâgendijiriramwo olusiku lukulu lwa Sabato bwifulikwè, bagend’ibashobeka emunda Filipo ali, babayôca boshi bulya bamâyôboha okucîfungira erhi olwôla lusiku lurhuma.
Enylgirizo zirhenga omu malibuko
12 Mpûnyire ngasi ab’ecîra citabu cakanahikakwo omu nfune bamanye bankanakumba omurhima erhi agôla malibuko garhuma, ci bamanye oku agôla malibuko gayishaga arhali ebwa kuherêreza ci ebwa kucêsa obûko bwîrhu.
13 Bulya Nyamuzinda arhalekerera abantu babî nsiku nyinji buzira kubahana, ci anabayandagalize obuhane bwâge duba-duba, eco ciri cimanyîso c’obwinjà bwâge.
14 Nêci, erhi Nnâmahanga ahana agandi mashanja anarhang’ilinda mpu kuhika gabè gamâzôngwa n’amabî; arhali kwo arhujirîre ntyôla rhwêhe,
15 mpu lyo alekicîhôla kuli rhwe, erhi amabî gîrhu garhaluka olugero lwâgo.
16 Ntyôla ntà mango arhukulakw’obwonjo bwâge, ci omu kubabalira anakabulire amalibuko nka cikwebo c’ebyâha, anayêreke olubaga lwâge oku arhalulekêrîri.
17 Rhwarhangikengêza ebyo binwa bisungunu, kushingânînage rhukulikize buno erya myanzi yîrhu.
Eleazari afîra idini
18 Eleazari, muguma w’omu bandisi barhangiriza, muntu wali okola mukulu omu maburhwa na mushamuka w’aha mwâge, banacimuyashamula akanwa, banamusêza mpu alyè enyama y’engulube.
19 Ci yêhe asîma okufà ahâli h’oku ba n’akalamo kahemusire, yêne ayisha ayîshire emunda ebirugu by’okubabaza biri erhi abà amâmeshera erya nyama,
20 nka kulya bankanajayo balya bantu bagwêrhe oburhwâli bw’okukabulira ebi obuzigire bw’akalamo bibahanzize.
21 Abâli bayimangîre okulya eby’enterekêro ngalugalu, bulya bayîshinigi boshi na Eleazari bamuhêka hâgo hâgo, bamuyinginga mpu arhumize anarheganye yênene zirya nyama anayêmêrîrwe okulya, ci mpu abè nk’owalya enterekêro nka kulya mwâmi anarhegekaga,
22 mpu lyo ashugunuka olufù, ogwôla murhima gw’obwonjo n’obwîra bajiraga boshi kurhuma.
23 Ci yêhe arhanya kulya kushingânîne omushosi ogwêrhe amâburhwa gâge, oyu emyâka eri nk’eyâge ekola ekengêsa, kuguma n’emvi zâge na kulyâla ali n’akalamo kinjà kurhenga eburhò bwâge, ci bwenêne erhi akengêra oburhegesi bwa Nyamuzinda yênene, ashuza kuli okola koshi mpu buzira kucilegama bamurhume omu balinda-mboho.
24 Erhi omu myâka nahika, kurhakwânîni okufulika, lyo misole minji elekicîkêbwa mpu nkaba Eleazari omu myâka makumi galimwenda, ajîre omw’idini lindi lindi,
25 n’erhi bankarhebwa kwanarhuma bahêkwa kubî erhi nie ntuma, hano mbà namâbabêshera omu kulonza okufungira akalamo kakola kasungunu, na ntyôla obushosi bwâni nanabuhiramwo enshonyi n’obugalugalu.
26 N’erhi nakayâka bunôla obuhane bw’abantu, mbè nafîre erhi ncirimwo omûka, ntakahashiyâka obuhane bw’Ogala-byoshi.
27 Co cirhumire nkafà buno n’oburhwâli, nanayêrekana oku obushosi bwâni bunakwânîne.
28 Kandi, nanalêkera emisole olwiganyo lw’okulonza n’okuyêmêra okufà erhi marhegeko gîrhu minjà na matagatîfu garhuma. Erhi abà amâderha ntyo akânandira yêne emunda birya birugu by’okubabaza biri.
29 Abamuhekaga yo, obwîra bali bamugwêrhekwo embere, gwabà mujina erhi bamâkunira n’ebyôla binwa aderhaga.
30 Erhi akola ali hôfi h’okufà, ayisha aderha erhi: Nnâmahanga ayishi byoshi bwinjà, amanyire yênene oku nankahashire okucîfumya, na bunôla nkolaga nalembera empîmbo za ndumîsa omubiri, ci omu iroho lyâni, nzilembîre n’enshagali erhi ye orhuma.
31 Oyo muntu anacifà ntyôla, n’olufù lwâge lwâbà lwîganyo lwa burhwâli na lwa bwôrhere burhankayibagirwa oku misole n’oku lubaga lwoshi.