3
Ninive amininisirwe oku mabî gâge
1 Yajêwe! ecishagala c’obulyâlya, ngasi mwêzi ciyunjwîre bunyazi, mangaci weki wâgokôla okwâwe!
2 Yumva! Obuhiri bwahukuza! Yumva emidindiri. Endogomi zikûzire omulindi, ebiterusi byajà byahukuza n’okuhama;
3 basirika bali eruhya, engôrho ziri nka ngulumira, amatumu nka milazô. Abayagalisire buli buvu, abafîre byo byâsi, emifù eri ntuliranye, bajà bayigerakwo.
4 Ebyo bwo bunguke amabî galêrhera omukala-nshonyi, omwâlikwa mwihisa ahindwîre ebishagala bajà b’amabî gâge.
5 Co cirhumire nkolaga nâkuhana, kwo Nyakasane w’Emirhwe adesire. Nâkubarhuza omwambalo gwâwe, nkugendêse bushugunu omu masù g’abantu, nkubonêse nshonyi embere z’amâmi.
6 Nâkubulula omu bijondo, nkubonêse za mêmè: nâkujira obè lwîganyo oku bâgera boshi.
7 Ngasi bankakubona boshi banakule omulindi bajà baderha, mpu: «Ninive ashâbûsire, ndi wâmufà bwonjo?» Ndi wâcikufe bwonjo! Ngahi owakurhûliriza ankaciboneka?
Olwiganyo lwa Tebesi
8 Ewani Ninive, ka we muzibu kulusha No-Amoni wayûbakaga oku burhambi bwa Nili? Ecôgo câge yali nyanja, n’amîshi gàmujirira ecirhangorhango.
9 Obuhashe bwâge àbâga Etiyopiya na Mîsiri, bo bàkâgimuhà obuhirhi bwa ngasi lubero. Abantu b’e Puti n’ab’e Libiya bâli bâge.
10 Naye kurharhumaga arhalulizibwa anahêkwa bujà; abâna bâge boshi bànigwa omu ngasi mashango g’enjira. Abaluzi bâge boshi bàshwêkwa n’obudagulè, n’abarhwâli bâge boshi bàgendibà bajà omu kuyêshwa cigole.
11 Nâwe Ninive, okolaga wâlonza aha wâyâkira mpu lyo ofulumuka abashombanyi bâwe.
Busha Ninive acîrheganyiza oku mushombanyi
12 Ebyôgo byâwe bizibuzibu kwo biri nka malehe gayêzire oku murhi.
13 Emwâwe erhaciri abarhali nka bakazi, emihango mihamikize y’ecihugo ekola ecîyigula yône embere z’omushombanyi: orhuhamikizo rhwâyo rhwo rhwalîrwe n’omuliro.
14 Doma amîshi muhako Ninive, bulya okola wâgorhwa; zibuhya ebyôgo byâwe, olabarhe ibumba onarheganye enformo y’amadafâli.
15 Ci kwône wâfà, wâhîra omu bwokêre bw’ecishagala câwe, erhi ofîre oku matabâro. Wâherêrekera nka byâsi byàlîbirwe n’ebizindêre.
Olubaga lugumagumà lwahirigirha
Olubaga lwâwe kwo lwakâgivanda nk’irumbu lya nzige.
16 Abarhimbûzi bo bâli banji kulusha enyenyêzi z’oku nkuba. Bàkâgiyôrha nka kula ebizindêre bibalala, lêro bahirigisirage.
17 Abajà-bulâbi bâwe kwo bàkâgiyandala nka nzige, n’abakozi bâwe nka kula amalumbu g’enjuci gajà gacîlunda oku mashaka amango g’emboho. N’erhi izûba lishalâla ntâye wacimanya aha zàgezire. Ngahigi bâgezire obwo?
18 We mwâmi w’e Asûru, abarhambo bâwe bagwîshîre burhazûka, abakulu bâwe b’abasirika barhacihinya. Olubaga lwâwe lwashandabîne omu ntondo zoshi, na ntâye wacilushûbûliza haguma.
19 Wajîrekwo ibala lirhankabukwa, ebibande byâwe biri bya lufù. Ngasi boshi badwîrhe bayumva olwâwe badwîrhe baheba orhusheka, bulya ndigi yeki orharhindibukaga wâni n’obulyâlya bwâwe?