23
Omushigo gurhahasha ngasi mulume
1 Nk’oli oku cîbo mweshi n’omukulu, onalole bwinjà ehiri embere zâwe.
2 Akabà odambiha, ohire akêre aha mumiro gwâwe.
3 Orhacîfinjaga ebiryo byâge by’olununîrizi, hyankanaba biryo bya kurhebana.
Omwônganwa
4 Orhacîrhamagya mpu walwira okuhirhira, oleke n’okuyungukira oku bandi.
5 Obuhirhi obukonolîre amasù, orhabubwîni. Bulyâla kwo bujira ebyûbi nk’ikozi, lyo liyâkira oku nkuba.
6 Orhahîra okalîra haguma n’omwônganwa, orhahîra okacîfinja ebiryo byâge;
7 Bulya ebi âgerereza emurhima gwâge, ye nyamuderha erhi: «mâshi lyaga onasûze», n’obwo omurhima gwâge gurhakulikwo.
8 Wâshala ehi wamâmira, obone wamaheza ebinwa binjà wacikazâg’iderha.
Amahano gw’obulezi
9 Irhondo orhahîraga okaderhera omu kurhwiri kw’ecingolo-ngolo, cankanagayaguza oburhimanya bw’ebinwa byâwe.
10 Orhahîraga okahindula olubibi lwa mîra, orhayankaga n’amashwa g’enfûzi,
11 bulyâla Ogala-byoshi ye mwihôzi wâbo, ye wânayanka olubanja lwâbo akuyâgîrize.
12 Omurhima gwâwe ogurhegêre, gurhegêre ihano, n’amarhwîri gâwe ogarhege ebinwa by’abalenga.
13 Orhahîraga okababalira omwâna mpu orhâmuhana, bulyâla erhi wankamushûrha, akarhi karhâmuyîrhe.
14 Kàli ciru okamushûrha akarhi karhankamuyîrha, kwakûla omûka gwâge ekuzimu.
Oburhimanya n’omurhima
15 Mwâna, wâni, erhi wankanabà ogwêrhe omurhima gw’oburhimanya, nâni ogwâni murhima gwanarhimûkwa.
16 Obulâ bundi omu nda bwanarhâmba, bubona akâwe kanwa kâderha ebishingânîne.
17 Omurhima gwâwe gurhayâgalagwa n’enkola-maligo, ci guyôrhe gurhînya Nyakasane ngasi mango.
18 Bulyâla irhondo ho liri, n’obulangâlire bwâwe burhâfanânde.
19 Nkubwîre mwâna wâni, obè murhimanya, onayêrekeze omurhima gwâwe omu njira nnungêdu.
20 Orhahîraga okakerekera ekarhî ka ba-cambali-nzoga, nîsi erhi ekarhî k’abaziga enyama,
21 bulyâla abanywi bakulu n’ab’amîru banacîkenye, n’obwôlo bunarhume omuntu ayambala obwikûnjè.
22 Okaziyûmva sho wakuburhaga, orhanagayaga nyoko mpu akola mugikulu.
23 Olonze okumanya okuli, ci orhabâga: «mpemba-nkubwîre» ocîhangâne omanye oburhimanya, ihano n’okumany’iyumva.
24 Okubâ îshe w’omushinganyanya: kulya ntânda; okubâ îshe w’omurhimanya: busîme bunji.
25 Orhangishagalusa sho, n’omuzîre wakuburhaga naye ashagaluka.
26 Mwâna wâni, yumva nkubwîre; amasù gâwe gayêrekere amahano nâkuhà:
27 Omukazi w’ecirala: lushâyo; n’omukazi w’embuga, iriba lya bunwa buhûnde!
28 Bwifulikwè alinga nka cishûngu, na barhebwa banji ajira ekarhî k’abalume.
Obulalwe
29 Ba «namâhera», na ba «yajoowe» babà ba ndi?
Zibà za ndi entambala?
Ebà ya ndi emirenge? Zibà za ndi empîmbo?
Gabâ ga ndi amasù g’ebirenge-renge?
30 Bibà bya bala barharhenga aha c’âmamvu, bibà bya mudûmbi-orhashubûka.
31 Orhahîra okakonolera amamvu amasù: mpu alà nka gayinjiha! Mpu alà nka gabirira bwinjà omu kabêhe, mpu alà oku gahona bunyi-bunyi!
32 Ganazînde erhi galumana nka njoka, gakômole nka njoka ya mpiri!
33 Amasù gâwe gabone ebingeru-ngeru obwo, n’omurhima gwâwe guderhe eby’amahabwe;
34 Nâwe obè nka muntu ogwîshîre omu nyanja emuhengere, erhi nka muntu ogwîshîre oku murhi.
35 «Banshûsire na ntaho hânduma! Bambambwîre, ntanayumvîrhe! Mangaci nazûka nshubihûna orhundi!»