38
Omusengero gw’omunya-byâha oli burhè
1 Lulanga. Lwa Daudi. Lwa kukengêza.
2 Yâgirwa, orhantumuzagya omu burhè bwâwe, orhankalihiraga omu mutula gwâwe,
3 Bulyâla emyampi yâwe yacinyîgwisiremwo n’okuboko kwâwe kwamponîrekwo.
4 Ntà bwinjà amagala gâni gacirikwo nanakugayisize, ntà kuzibuha orhuvuha rhwâni rhwacizibuha nanagomire.
5 Obubî bwâni nêci bundenzire bulî, kwo bunzidohîre nka mushoko muzirho.
6 Ebibande byâni bidwîrhe byahulula byanahûsa, erhi kuhwinjagala kwâni kurhuma.
7 Nagombire, nayûnama nayûnamiriza; nalegerera ndi omu mishîbo.
8 Ensiko zâni kwo zikola ziri nka buhya bwa muliro, na ntaho amagala garhandya.
9 Najîrage nayûnama, omutula guli bunyîrha; nandwîrhe nalaka erhi kukungula kw’omurhima gwâni kurhuma.
10 Yâgirwa, ebi nalakiraga omu masù gâwe biri, n’omulenge gwâni ogubwîne.
11 Omurhima gurhaciri gwâni, emisî yâni yansizire omu marhabi, ciru n’obubone bw’amasù gâni bwantibire.
12 Abirhu n’abîra bâni badwîrhe bayâka akafinjo kâni; abâlungwe bâni nabo barhadwirhi bandirâna.
13 Balya balingûza omûka gwâni bantezire emirhego, balya barhannongeza kalamo badwîrhe bampigira, banadwîrhe balegerera basinga amenge.
14 Niehe kwo nacîbêrire nka wa bihuli, ntadwîrhi nayumva, kwo nnandi nka kaduma ko karhashagala.
15 Kwo nashubire nka muntu orhumva, ye rhanajira kushuza ankashuza.
16 Yâgirwa, nêci, wêne ncîkubagîre; wêne wanyumva, Yâgirwa, Nyamuzinda wâni.
17 Kwo ndesire, nti: «Barhamwemwerhagwa nie ntuma; barhacitakìraga babona okugulu kwâni kwarherera»
18 Bulya ndi buhirima, n’oburhè burhantenga emurhima.
19 Obubî bwâni niehe ncîyâzize kulibwo; n’ecâha câni co cinjizire mutula.
20 Ci balya banshombera obusha bali badârhi, n’abarhambonakwo guli mwandu.
21 Balyâla bangalulira amabî oku minjà mbajirira, banyabwîre kulya kubà niehe njira nyinjà nshimbire.
22 Nyamwagirwa, orhandekêreraga; orhanjâga kulî, Nyamuzinda wâni.
23 Okanye, ontabâle, Yâgirwa, we kucira kwâni.