10
Paulo Lakpɛ Aata Ɔkpɛ Wɔ Ɔɔbla Nii.
1 Ami, Paulo omu, lɛyɔ Kristo suoto kasɔ ɔwakosa ku otu buɛɛ nka ye. Ami nle otii wɔ ninwakosa ni suoto kasɔ nse nkpe di ɔkyɛ lee, kafɔɔ mbla asaa ku otu okpee nse nnaa di ɔkyɛ lee.
2 Lekoto kotikiti ye nlɛ bitanta alɛ kawa ɔkyɛ lee makakatɛ nta ye ɔtɔ ɔtɔ. Diekye batii ba nikobuɛ kaamɛ lee alɛ kayi ka mmle disibu kanya buɔbla ni asaa yi, lɛtɛ nlɛ masĩ ɔlaa nta ma osie kanya se lɛwa.
3 Nwaako dile alɛ busi kaayi ka mmle kamɛ, kafɔɔ diele kayi ka mmle kakpɛ ka okle bɔɔkpɛ ni buɔɔkpɛ.
4 Diekye akpɛsaa ya bukle buɔkpɛ nii, diele kayi ka mmle akpɛsaa ale. Kafɔɔ Yaa osie kule mun-yɔ munlenkee Abonsam nkpɛkɔ siene.
5 Munlenkee ɔlaa ɔnanfi ku lɛsaa lele le nintakatɛsa ni suoto katoo nintĩi ni batii osuku alɛ batantofo ni Yaa. Mummufũ disibu lele kafɔɔ bulɛ diakyɔɔ Kristo atoko.
6 Ni kamaa nse biediɛ suoto nnɛɛ biɛta niimu kamɛ biɛkyɔɔ Kristo atoko yi, ni butoololaa suoto bulɛ buananfi otii lele ninkpe ni otokopĩ kootoko.
7 Aye suoto sina lɛkyɛ lete bionyu asaa. Nse otii owo lefũ eenu alɛ Kristo ole ale yi, annyuma mmle okle ale ni Kristo ole yi, nkpo okle kafɔɔ di awoo bule Kristo bale nɛ.
8 Diekye nse lɛtakatɛsa suoto katoo kɛkɛɛ lelenkeesa mmle okle dikaatɛ nii, di osie wɔ di Saate lɛta wo alɛ buayɔ munnyu ye mimmuɔ ni di ofũ onu kamɛ, ninanle alɛ buɔyɔ munwakosa ye ni kasɔ yi, sinunsɔ dilaakpɛ mi.
9 Noomiɛ nlɛ dibla ye fɛle lɛyɛkɛ kokpee ye di akũ nii ya kɔkpana ye ni kamɛ.
10 Diekye batii bawo kaamɛ lee kobuɛ alɛ ami, Paulo, nkpana akũ ya kaamɛ sɛlaa nkpe ni onutũ ku osie nkyesee ye. Kafɔɔ nse nkpe ye lɔɔkyɛ lɛbla buɛɛ, sɛlaa nii kafɔɔ diedie lɛsalɛsaa.
11 Komiɛ nlɛ batii nwu nkpo okle batofo alɛ, sɛlaa se munkpana ni di kukũ kamɛ munkyesee ye ni di obe wɔ bunaa ye ni di ɔkyɛ yi, nsinwu kafɔɔ mumbla nse bukpe ye di ɔkyɛ nɛ.
12 Bulootũtũkũ bulɛ buɔyɔ kayilakɔ loo munkaatɛsako ku batii ba nikonyu suoto alɛ bɛɛtaka ni katoo. Buote fɛ mma nkpo okle. Mannyu alɛ nyilakɔ be bayɛ ni kaamɛ lɛma oso ni balɛ, kafɔɔ baaye lɛsalɛsaa kuninwii.
13 Kafɔɔ awo yi, bulabatakatɛsa suoto katoo bulenkeesa nyilakɔ loo. Bubatakatɛsa suoto katoo munse di ɔkpɛ wɔ di Yaa lɛta wo ni kanya. Ɔkpɛ wɔ buɔbla ni kaamɛ lee kafɔɔ nkyaka di nwɔ di Yaa lɛta wo nii.
14 Awo ninle batii kasale ba niayɔ Kristo ɔlaa biene nwu nkpo buawako ye nii. Nkpo oso lɛkanta loo nwu diiwaalɛ ɔkpɛ loo. Diekye awo niabla ɔkpɛ buabadu ɔkyɛ lee.
15 Nkpo oso yi, munnkanta di otii bamba ɔkpɛ suoto di obe wɔ kunanle nwu di Yaa lɛta wo nii. Kafɔɔ osuku loo onyu ninle alɛ ofũ onu lee kataka katoo alɛ buafuo sɛkpɛ kplɛ ɔbla kaamɛ lee sinkyɛ sitũ di mmle okle di Yaa lɛta wo nii,
16 alɛ buafuo ɔlaa biene nwu nkpo obuɛ di sekpoo bamba se ninkpe ye ni sɛɛmaa kamɛ. Ni dilabawa alɛ buɔkanta di otii bamba ɔkpɛ wɔ atɔɔbla ni di aba nwu nkpo suoto.
17 Fɛ mmle bɛɛkpana ni di Kɔkpana Klekle kamɛ alɛ, “Otii lele ninkomiɛ alɛ akanta yi, aakanta di lɛsaa le di Yaa lɛbla ni suoto.”
18 Diekye otii wɔ di Yaa lɛtansa ni yi, nnwɔɔ niefĩ nɛ. Diele otii wɔ nintansa ni suoto niefĩ.