9
Pol lai Juda lo lu taune ne tote ewiteteye.
1 Ane lai Owane Jisas Krais papu ironamisiya. Serai ane fene ma'e peri pefine a'i au te'esiya. Ane fene ma'e peri wawero au te'e se ta'ame. Marepi ano pefine a'i totesiya. Owane Sitewi lo Hepene Wara'i a'i lai marepi toteyei werese ano so'oruwe tene! Le lu taune ma'e apou au te'e areiyesiya, “Pol lo peri werese wiyeme pefine a'i tene!”
2 Peri pefine a'i apou wou a'i ne. Ane Juda lu taune werese ne marepi erasi a'i tote ewitesiya. Lowe tomu ne'ese lai Krais pefine me'iyeni ma'e atati arunamiteye. Serai ane marepi orese erasi a'i lowe ne teritesiya.
3 Ane a'i lai Juda lo lu tewi ne. Ane lowe ma'e au ferafereiyei ne totereme. Juda lo lu tewi ape mo Owane Sitewi lai lowe yehe omo ma'e ani fu arosawirowa. Serai ane Owane Sitewi ma'e apou ei towerisiya, “Ne fara'u Krais ma'e nate tawesiyei ano ani eraure! Ne fara'u yaru ano ni'arawe hire sahe ani pamowere. Yaro ano lowe ma'e aurowa su, ane fara'u yehe omo ma'e eimawesawirowa. Sosu Juda lo lu tewi werese omo hire ma'e wirowa. Marepi ano wisereye nine'irowa. [Kis 32:32]
4 Lowe werese ya'ariyei meni Israel lo lu tewi a'i ne. Tu naifa weriyei Owane Sitewi lai lowe eimane pefine lo fa henerai ne ariariyeye. Owane Sitewi lai lowe ma'e marepi wisere pefine a'i lo au atuatu areiyeteye. Le nowe ta'i ta'i tamo se marepi ta'i topo lo ape lowe ma'e au te'eye. Le yo peri pefine lo Moses leseye ape, lowe ma'e auwe. Le lowe ma'e apou au atuatu areiyeteye, “Fene Owane Sitewi lo wesi tutawe sahe ane ma'e au nine'i wisereyete. Le lowe ma'e peri te'e naneiyei tomu ne'ese au te'eye.” [Kis 9:4]
5 Juda lo lu taune ape mo, lowe iyape erasi ya'ariyei ma'e fai. Aiwawe a'i Owane Jisas Krais lu tewi ape ma'e fai. Krais lai lu taune werese lo Meni Owane Pefine a'i tene. Serai nomo Owane Sitewi Pefine ma'e weriyei weriyei au nine'i wisereyenamitorowa.
Owane Sitewi lai Juda lo lu taune ma'e yo seni lo au atuatuteye.
6 Ahowa, Owane Sitewi lo peri te'e naneiyei pefine a'i lai lowe ma'e winetai ta'ame. Ahowa, Owane Sitewi lo peri te'e naneiyei weriyei weriyei iro kairefiyenamitorowa. Israel lo lu tewi tamo, lowe ya'ariyei Israel pefine wou a'i henerai ta'ame.
7 Lu tewi tamo apou te'eye, “Nomo ya'ariyei Abraham lo lu tewi ma'e fai. Serai nomo Owane Sitewi lo eimane pefine wou henerai.” Owane Sitewi meni Abraham ma'e au te'e naneiye,
“Meni eime no ape, Aisak, a'i lai ya'ariyei lu tewi no henerairowa.” Stt 21:12
8 Abraham lo lu tewi fisa'i lo se henerai ape, lowe werese Owane Sitewi lo eimane pefine ta'ama. Ahowa, Owane Sitewi lu tewi tamo me'iyeni ma'e atati arunati.
Abraham lo lu tewi tamo, lowe Owane Sitewi lo te'e naneiyei ape umasinamiteye. Serai Abraham lo lu tewi ape lai Owane Sitewi lo eimane pefine henerairowa. Piyene awere? Peri te'e naneiyei ape, Owane Sitewi Abraham ma'e au te'eye ape, lowe te'e naneiyei ape, tote tawesiteye. [Ga 4:23]
9 Owane Sitewi lo te'e naneiyei ape Abraham ma'e apou au te'eye,
“Nowe ane ariariye ape se, ane si tame aiyerowa su, tani no, Sara, meni eime ta auteirowa.” Stt 18:14
10 Peri tere'e tamo apou te'esiya. Owane Sitewi lai marepi topo lo se meni ta au ariariyesiya. Nowe poweiye ta'i ta se menitani ta iyape, Rebeka, eimane hesi auteiye. Eimane hesi ape tai lowesi lo ta'i a'i iroteye. Meni ape lo iyape Aisak. Le ya'ariyei sitewi nomo lo ne.
11-12 Nowe ape se eimane hesi mai lo lire papu iroteye su, Owane Sitewi lai Rebeka ma'e apou eiye,
“Meni eime poto ate meni eime Pewe lo wiyawi tesi yahowa'i irorowa. Eimane to'uresi ape yo seni luwaru a'i iro ta'ame.”
Ahowa, Owane Sitewi lai peri ape Rebeka ma'e au te'eye su, le apou toteye. Ane a'i lai marepi topo ano fu umasirowa. Ane meni ta'i ariariyeye. Ane meni ape ariariyeye su, le yo seni wara'i a'i iro te ta'ame. Ahowa, ane marepi topo ano tote umasirowa. [Stt 25:23]
13 Tu naifa weriyei meni ta Owane Sitewi lo one towe sahe eimane hesi ape ne apou leseye,
“Ane meni Jekop ne marepi erasi a'i tote wawesiyenamisiya. Ahowa, ane meni Iso le ma'e ai marepi totenamisiya.” Mal 1:2-3
14 Piye nomo te'esiya awere? Owane Sitewi meni Jakop ariariyeye. Sosu le meni Iso me'iyeni ma'e atati arunati. Owane Sitewi lai yo seni luwaru a'i irowe awere? Piyete! Opiyai! Owane Sitewi lai wiyeme pefine a'i ne.
15 Owane Sitewi lai meni Moses ma'e apou eiye,
“Ane marepi topo ano tote umasirowa. Meni ta ane ariariyeye ape, ane le ma'e au ferafereirowa. Meni tere'e ta, ane le me'iyeni ma'e atati tei awera'iyenatirowa. Sosu ane meni tere'e ta siyeyei su, ane le ne ewiterowa. Meni tere'e ape ane fara'u tote i'anerowa.” Kis 33:19
16 Serai Owane Sitewi lai marepi topo lo tote umasirowa. Le meni ta au ferafereiyei ne ariariyerowa. Meni ta apou toteyei su, “Marepi ano aseyaro wara'i a'i ne. Owane Sitewi ane ne au ferafereite.” Ahowa, Owane Sitewi lai marepi topo lo meni ape ne umasirowa. Aiwawe a'i meni ta apou toteyei su, ane yo seni wisere wara'i a'i ironamiteye. Serai Owane Sitewi lai ane ne ferafereirowa.” Ahowa, Owane Sitewi lai marepi topo lo meni ape ne umasirowa. Owane Sitewi lai marepi topo lo a'i tote eti umasirowa. [Ef 2:8]
17 Ane fene ma'e peri tere'e ta au te'esiya. Tu naifa weriyei Owane Sitewi lo one towe sahe Owane Sitewi lai meni Isip lo owane tutawe lo meni owane pefine a'i ma'e apou eiye, “Ane ne awei lo meni owane pefine a'i fa heneraiyei ne ariariyeye. Ne awei lo meni owane heneraiyei su, ane etiri luwaru a'i tamo ne ma'e irowei. Etiri ape mo henerairowa su, ane lu taune werese ma'e kairefi erasi pefine a'i ano au atuatu areiyerowa. Lu taune werese omo werese sahe kairefi ano wanurowa su, lowe iyape ano omo werese werese ma'e au te'e areiye fiyarirowa.” [Kis 9:16]
18 Owane Sitewi lai meni ta au ferafereirowa su, le meni ape ne au ferafereirowa. Aiwawe a'i le meni ta marepi tote kairefiyeyei ne irowei su, le meni ape marepi kairefi irorowa.
19 Meni ta, fene mase irosiya ape, ane ma'e apou ei toweriyei, “Owane Sitewi lai etiri werese lu taune werese irowei ape au irosiya su, le piyene yo seni luwaru a'i nomo lo au hese ereisiya awere? Eiwerai marepi lo ma'e fara'u ai atu tiyatirowa awere? Owe meni ta lai marepi lo ai aturowata.”
20 Ne peri ape owe ape ei towerire. Ne awei lo meni tene! Ne awei lo marepi wou totenamisiya. Lu taune werese Owane Sitewi Pefine a'i ne eiwerou ei towerirowata. Wanure! Owane Sitewi lai nomo werese au ta'aneye. Serai nomo le ma'e apou owe ape ei towerire, “Ne ane apou ape piyene ta'aneye awere?” [Ais 29:16; 45:9]
21 Meni ta pa'are peperi awe ta'aneyei ne toteyei su, le eiwerou ta'aneyei awere? Le awei peperi se wapo a'i aniyewe, pa'are awe erasi a'i fara'u ta'anerowa. Le awei peperi tere'e ta aniyewe, le sa'i aitaiyei pa'are ta peperi se ta'anerowa. Aiwawe a'i le fara'u pa'are awe peperi tere'e mawiyei itu leseyei erasi se ta'ane anirowa. Apou aiwawe a'i Owane Sitewi fara'u marepi topo lo se umasirowawe, lu taune ma'e eiwerou irorowa. [Jer 18:6]
22 Owane Sitewi lo yo seni wara'i a'i ironamisiya su, le fara'u marepi topo lo tote umasinamisiya. Sosu Owane Sitewi lai marepi topo lo se ai marepi lu taune ma'e au atuaturowa su, sosu lowe ma'e kairefi erasi a'i lo au atuaturowa su, le lai lu taune werese ne marepi eresene momotei erasi a'i ninaweteye. Lu taune ape mo le ma'e ai marepi heneraiyei ne irowe ape, lowe temeniye po'uteyei ne au ta'uweye.
23 Lu taune ape mo, Owane Sitewi lai ai marepi iroteye ape, le nowe pitase a'i onu ninawesiya. Piyene awere? Lu taune ape mo ma'e, Owane Sitewi lowe ma'e au ferafereiye ape le lowe ma'e wisere erasi a'i topo lo au atuatuwei ne totesiya. Tu naifa weriyei le lai lu taune ape mo wisere erasi a'i lo au atuatuwei ne ta'uwe naneiteye.
24 Owane Sitewi lai nomo ta'i ta'i tamo te'e ariariyeye Le Juda lo lu tewi tamo te'e ariariyeye. Aiwawe a'i le lu tewi tere'e tamo te'e ariariyeye. Nomo lu taune ape mo ne.
25 Tu naifa weriyei Owane Sitewi meni Hosea ma'e apou eiye. Sosu le peri lo apou leseye.
“Ane fene ma'e apou au te'erowa. Lu tewi tere'e ape mo lowe iyape ano umasi ta'ame ape, ane lowe ei anirowawe, serai lowe lu feni pefine a'i ano henerairowa. Lu tewi ape mo, ane marepi erasi a'i tote wawesiye ta'ame ape, ane lowe ma'e marepi erasi a'i tote wawesiyenamitorowa.” Hos 2:23
26 Sosu lu tewi tere'e ma'e apou te'eye,
“Fene lu tewi pefine a'i nomo lo ta'ama. Ahowa, nowe me'iye su, Owane Sitewi lai lowe ma'e eiye, 'Ane Owane Sitewi Pefine a'i mi mi pasi pasi ironamitorowa. Fene eimane pefine a'i ano henerirowa.’ ” Hos 1:10
27 Sosu meni Aisaia lai Israel lo lu tewi ape ne apou uteye,
“Fene lu taune tomu ne'ese irosiya. Fene sa'i eneri aiwawe a'i ne. Ahowa, ane fene lu taune tewi oso po'o a'i yo seni luwaru a'i lowe lo au sasari pamowerowa, marepi hepene he'i a'i aurowa.
28 Ei, Owane Sitewi Pefine a'i le a'i lai lu taune omo werese ma'e iroteye ape mo, le witane a'i lowe werese au hese ereirowawe, lowe ma'e fofowei erasi pefine a'i aurowa.” Ais 10:22-23
29 Meni Aisaia peri tere'e apou te'eye,
“Owane Sitewi lai ai lu tomu ne'ese lo hi awei ma'e eimawe arosairowa. Lowe ya'ariyei lu tewi tomu ne'ese nomo lo aine tera'e ererowa. Ahowa, le ya'ariyei tewi oso po'o a'i ma'e au ferafereirowa. Serai lu tewi ta'i ta'i a'i norohuwe iroteye. Owane Sitewi lo ai lu tomu ne'ese a'i ya'ariyei werese werese nomo lo aine tera'ereme su, sosu lu tewi nomo lo po'utereme, nomo omo Sodom, omo Gomora lo lu taune aiwawe a'i ne. Owane Sitewi lai tu naifa weriyei omo weniyei hesi ape ma'e yehe eimawe arosaiyewe, lu taune werese ti sero'o po'uteye.” Ais 1:9
Israel lo lu taune Owane Sitewi ne arisinamiteye.
30 Peri eti lo ape piye te'esiya awere? Peri lo eti ape apou te'esiya. Lu tewi tere'e ape mo Moses lo yo peri umasi ta'ame ape, lowe Owane Sitewi lo nihe se lu taune aseyaro a'i heneraiyei ne toteteye. Ahowa, lowe Krais ne tote tawesinamiteye su, Owane Sitewi lai lowe aseyaro wara'i a'i au ta'aneye.
31 Ahowa, Israel lo lu tewi ape lowe Moses lo yo peri werese umasiyei ne toteteye. Lowe apou toteye, “Nomo Moses lo yo peri werese umasinamiyei su, sosu nomo Owane Sitewi lo nihe se aseyaro wara'i a'i henerairowa.” Ahowa, lowe aseyaro wara'i a'i henerairowata. Marepi lowe lo meremereye a'i ne.
32 Lowe Moses lo yo peri werese umasiyei ne toteteye su, lowe apou toteye, Owane Sitewi lo nihe se nomo wara'i a'i henerai. Ahowa, serai lowe Owane Sitewi ne tote tawesi te ta'ame. Sosu Owane Sitewi lo nihe se lowe yo seni luwaru a'i ironamiteye. Owane Sitewi lai tapiye pefine a'i, yo mai lowe lo uweisiya ape, ma'e fuwe. Tapiye pefine ape Jisas wou a'i ne. Lowe Jisas ne tote tawesi ta'ame su, lu tewi ape mo lowe tapiye ape lowe lowe lo tapiye ape sahe atu tipateriteyewe, winetai ereteye. [Ais 8:14]
33 Owane Sitewi lo one towe sahe apou leseye,
“Ane tapiye ta omo Saion sahe au fuwe. Lu taune tomu ne'ese tapiye ape sahe lowe lowe lo tewiyeyewe, winetai erenamisiya. Tapiye ape lai lu taune ape mo atu tipaterisiyawe, winetai eresiya. Sosu aiwawe a'i lu taune tamo tapiye ape ne tote tawesi umasinamitorowa su, lowe marepi neritaseyerowata.” Ais 28:16