6
Seda gombau do gagalou
1-3 Seda, gombala aiau etonune ruauitonune simbiamonuna Tatamba ebowa baiwa, sa ipa euda dodomana. E epe dewaitonuna God saualena rua e wanwanla euda wankasaitana ita wanwanla daumalepi bola emawo. God anaanawa 10 Moses wanena bedeuwo isiwa no ruauntonte dewamonte sau euda donsataa sauawalen. Tane gombamba atouwontonte oniadewasamontaa anaanawa osowe God bauta me sauawa itun.
4 Gomba, obanla nuau mai di kadisana, dia. Mo kadiwa dewasampo e nuawadawada mampe anaanamonune ita Tatamba waeuwa asiasi oniamono muntopu.
Apana debamau ita mo mida atouwo nolantoia gagalou
5 E mida apana debamau atouwo nolaitilana aiau etonune ruawaitonuna. E mo wiwira mampe oniadewasamonune simbiamonuna, mai emona! Epe dewaitonune bedewe insene ateitana e Keriso baiwa epe dewasailana.
6 E nolaitonune bedewe mai insenunase, “Ne debamana ewanedia baiwa oniadewasasapine simbiasapina, tane enepie alepio aupe di wankoantepina.” Tane God menasadia e nolaitonune bedewe insenunase, “Ne Keriso mebaawaida nolawa dewalala ita nuana uduudu mampe menanedia God insaisawa dewasapa, sa baiwa ne noladewanteapa.”
7 E nuala uduudu mampe nolaitonune bedewe insena e ipa Tatamba baiwa nolaitilana, mai apanaida, dia.
8 E epe nolaitonune atenidaitana Tatamba apana uduudu, eboeboua ita mo mida baibu nolantoia dima euda dewasaia ruawalepie uneu wanamopi.
9 Tane e apana debamau mo mida atolawo nolantoia do oniadewasamonuna. E mai mo wasanamonuna, wasana dewawa eidasana. Insene atendewaitana Tatamba uboo wandia ipa mo ita e do Tatala. Me apana uduudu, eboeboua ita diapanau dima dewasaia ruawaidalepie sipoa wanamopi.
Ona puraiwawa otaimaamone wanlempaa gagalowa
10 Ne gagalona ompa wapa. E Tatamba ita me mukawa debamaia do bedeweitena mukawa sa wadane badoidaitana!
11 Seitan lagawa kadiwa daitada mampe inta banusadia e kadilepia baiwa. Sa baiwa ona puraiwawa uduudu God mampea otaimaamone wanlempa. Ema mampe e rua os badowa enonuno ona iompo nanausana.
12 Ona puraiwawa uduudu God mampea otaimaamone wanlempa, ipawa no mai apanaida do onantipona, dia. No aleu kadiu uaraia wisiasiawaia bolau uba tampe sawano waimoie laia do onantitana. Ita mo uwaantoia uduudu muka badowaida wadeia dubawa gonaawa, sa ipa tawo ema, onieia do onantitana.
13 Sa baiwa ona puraiwawa uduudu God mampea tauma otaimaamone wanlempa ita walamaipa onala iompo e rua os onaitana. Ita ona dialepio e badowa enane enakasaitana.
14 E ulaipa dewasanune do gagalowaitonune wanlempa, sa ipa e igala wadane nolawo taune leununa. God e dewaleno me do dodomanaiten, sa ipa e danala ita adila enabodawa euda badowaida taune enonuna.
15 E walama uduudu no God do deantena gagalowa euda amonawa baiwa menaidalempo imaaitonune wanlempa. Sa ipa e butila, walawo taumonune leununa.
16 E walama uduudu sumanaitonune wanlempa. Sa ipa etela enabodawa witalawo wadonune enonuna, mai itune ena, dia. Ema wadonune Seitan ewa iilala uduudu manlawo ieia e rua os bodamono diaidantopu.
17 God e inalene inawinakasala enalena insenune os wanlempa. Sa ipa uwala enabodawa, wadane uwalawo aine enonuna. Ita God aiawa mampe Seitan onawaitonuna, sa ipa e isimala moamoaua Aleu kakaiwa enalede, wadane mampe onaitonuna. Ona puraiwawa ema uduudu otamone badowa enonuna.
18 Aleu kakaiwa insaisa enalempe banlalempaa rua walama uduudu dewa uduudu bedewe rauparitonuna ita dima menaledia mampe kela odompa. Onioniadewaitonune insaisala wadaaubala wanlempa, ita God meba apanawaida kakaibu uduudu baibu rauparitonuna, mai walama da ena, dia.
19 Tane ne baina do rauparitonuna ita gagalontepina bedewe God insaisawa bedenawosampo rua Gagalo euda mai mala do badowa benemantepina. Ita do Gagalo euda God mapo wadenitudeno winedia ne wasabamosapo apana atentopu.
20 Ne Gagalo euda benemalala apanawa dibura bedewe seni mampe tauneieno wainedina. Ne baina rauparitonuno God saunepio Gagalo euda mai sa do badowa gagalontepina, God menasadia rua.
Paul sumanai sosowa auwamode
21 Ne sumanai sonaida Tikikas e manlawo wapaaubepo wisepi. Me ipa ne sauna walama uduudu Tatamba bedewe simbianedia. Ita me ne umanana uduudu benemalepio ateitana ne nolana dainea os dewamodine wainedina.
22 Ne me wapaaubepo manlawo wimpie no ambi wainitana benemawalepio ateitana do wasaulepie nuala badosapi.
23 Sumanai sosona, Mako God ita Tatamba Iesu Keriso nuawadawada ita sumanai enalempe saulempo wanwanla euda obasa wanlempa.
24 Mako God amonawa euda e uduudu osolawo winompa, e mida Tatamba Iesu Keriso mai nuala obasa mampe tane nuala uduudu mampe nuawadawadasailana manlawo! Amen.