41
Warere auemba gagalowa
1 Tane ena nata diantono aupe Isibt warerewa wandie auenlen. Me auemba ema epe: Me esa Nael tampe enedia ewedie,
2 ita walama sawo kau uduudu 7 etepu potopotowa ewaewau eubu esa bedewee wimone ina esa tampe inintoia namoie.
3 Ema aupe kau 7 da ewaewau oaoarauida etepu nepunepua esa Nael bedewee wimone esa tampe kau eubu bauta wimoiena do eneie.
4 Ita kau ewaewau oaoarau etepu nepunepua enane kau 7 ewaewau eubu etepu potopotowa namonatuwaiena. Ita warere auenleidia ene enenwisen.
5 Tane me osowe itulene auemba natawa ewena ema epe: Wit ipawa uduudu 7 iawa dea osowe naunautetela ewaewau eubu wineie.
6 Ita ema aupe wit iawa osowe ipawa 7 da inintone wimoiena lanunu epeno ipau rorontone kapisantona ewamon.
7 Ita wit kapisantona sa enane wit ipau eubu naunautetela namonatuwaiena. Ita ema aupe warere enenwisene insene wanase, “Ema apa ne auentedina.”
8 Sa baiwa tadinaida me nuawa surakauidalen, ita me wene apanawa, ginauri dewalala ita aten apanawa auen ipawa benemantopuo etepia baiwa gagalou wanauben Isibt bolawa uduudu bedewe. Mo wimoieno warere auemba nata umanawa diamon, tane mai mida da auen sa nata ipawaida waeuwalepona, dia.
9 Ita wain reduwa wadedie warere wanedia apanawa me diene wanase, “Tauma ne insaisa mainawo wiseno kadiwa dewasana insenadewanten, tauma wapo etaa.
10 Mapo e bured sudia apanawa mampe ita ne mainawo nuaa kadiidalen. Ita e otanee dibura onieia uwauleidia apanawa duwa bedewe teaneana.
11 Tane tadina dea no ituntite auenten ita auen sa ipawa ipa nambenambe.
12 Ita Ibru apanawa sanaa no do wainitana, mida dibura onieia uwauleidia nolawa dewasadia apanawa, no auentena umanawa me diatano benemanen.
13 Ita dima me wana ruaida no mainimbo segalen. E ne wadane nolana osowe ituneana ita e sorodiaa diamoano bured sudia apanawa imumba tonapune ita etepa ia osowe seuiena.”
14 Tauma warere epe etene Iosep gagalowa wanauben me mampe wisepia baiwa. Ita mo tauwadea antone me banlene dibura ene wimoiena. Ita Iosep koro tone gara eubu taumono tauma me banlene warere mampe antoiena.
15 Ita warere Iosep diene wanase, “Tadino ne ituntedine auenten ita auen sa ipawaida mai mida da ne waeuwaneapona, dia. Tane apana waiase, e auen ipawaida waeuwaitiana.”
16 Tane Iosep sipoasane wanase, “Ne neba mukana mampe mai auen sa ipawaida waeuwanteapa rua, dia. Tane God os e auena sa ipawaida waeuwaepia rua.”
17 Ita warere Iosep diene wanase, “Ne auen bedewe esa Nael tampe enedine,
18 ita esa sa bedewee kau uduudu 7 etepu potopotowa eubu wimone esa waiwe ina namoie.
19 Tane ema aupe ewedino kau uduudu 7 da oaoarau etepu nepunepua esa bedewee wimoiena. Kau inainambu ema ruau ne mai Isibt bolawa bedewe ewamopona, ewamona.
20 Ita kau oaoarau etepu nepunepua enanawimone ita kau etepu potopotowa uduudu 7 esa bedewee bauta wimoiena namonatuwaiena.
21 Tane kau etepu nepunepua sosou etepu potopotowa namonatue aupe mai muntopona, dia, nepunepua deawa waimoie. Ita ne ituntedina enanawinen.
22 Tane osowe ituntene auen da ewana. Ita auen sa bedewe wit iawa dea osowe naumona ipawa uduudu 7 menawane wineio ewamona.
23 Ita ema aupe wit iawa da osowe ipawa naumona uduudu 7 wineio lanunu wisene suno ipawa da kapisanton ita isiwa kerakera teamon.
24 Tane wit ipawa 7 kapisantona enane wit naumonadewae menawaie wineia namonatuwaiena. Ita ne auen ema ewane ipawa atenteapona baiwa wene ita apana debamau diamono wimoiena. Ita ne auena mo diamono etane ipawa mai waeuwaneapona, dia.”
25 Tane Iosep warere auemba ipawa benemasane wanase, “E auena nata ipau ipa deawaa. Dima ando e manawo segalepia umanawa God auen bedewe waeuwaen.
26 Kau potopotowa eubu 7 ewamoana sa ipa ena 7 ita wit ipawa eubu 7 sa ipa ena 7. Auen sa nata ipau ipa deawa.
27 Tane kau etepu nepunepua ewaewau oaoarau 7 kau eubu wauwo wimoiena sa ipa ena 7 umanawa wade. Tane wit ipawa 7 lanunu epeno tonantona sa ipa ena 7 bedewe omana debamawa segalepia umanawa wade.
28 Ita dima ne warere benemaena ruaida God e manawo dewasapia baiwaleide.
29 Ena 7 bedewe maura debama Isibt tawowa uduudu bedewe segalepi.
30 Tane ema aupe ena 7 da bedewe omana debamaia segalepi. Ita Isibt bedewe maura debama segalena apana nuauawawalepi. Ita omana debama segalepie bola uduudu kadisapituwapi.
31 Ita omana debamaia segalepie apana mapo nana debama naia insaisawa bedeuwo dialepi.
32 Tane God insaisawa itudia dewa ema ideita segalepi. Sa baiwa me auen ema nata eneen.
33 Tauma ne menanedia aten ita insadewasa apanawa enaitudepio tawo Isibt uduudu me atowelepio oniepi.
34 Sa baiwa Isibt bolawa deadea bedewe apana insadewasala sonabamoa. Ita mo sape wampue apana nana uwauwantoia adibawa 5 teamompa. Ita uwauwa sa deadea bedewe mo adiba dea wadompe adiba bolawe itumpa, maura walamawa sa bedewe.
35 Ita apana sa debamau ena ema deadea bedewe nana uwauwantompe warere mukawa atowe bola debamau bedewe adibantompo winompo oniempadewantompa. Ita muriwa nana ipa sa apana napue tounawe wampu.
36 Tane omana debama segalempo, ena 7 bedewe Isibt apanawa nana sa saumopi. Ita epe segalepio apana mai omana bowantopu, dia.”
Iosep Isibt onepia apanawa debama segalen
37 Ita dima Iosep wana osowe warere ita me nolawa dewalala do nuaeuwanton.
38 Ita warere mo diamone wanase, “Ulaipa, God aleupa apana ema bedewe wande. Sa baiwa no mai insaisa apanawa da me rua banusata, dia.”
39 Mape me Iosep diene wanase, “Ipawa God nitu uduudu e manawo sabamosan, mai mida da insaisa euda ita aten apanawa wainipona e ruaa, dia.
40 Tauma ne e ituedina ne bolana ema uduudu atoawolepio oniea ita apana uduudu e aiaa etompe ruaantompa. Tane warere bolawa osowe mai wana, dia. Ipawa ne ipa warere.
41 Tauma ne ituedina Isibt bolawa uduudu atoawolepio onionia apanawa debama segaitaa.”
42 Ita warere rin witape wadenaubene Iosep witape ain. Sa ipa warere mukawa me wanene badosan. Ita gara eudida malesawa debama wadene me osowe aine ita seni gold mampe dewalala wadene gadompawe seun.
43 Tane do warere atowe Iosep nolalepia baiwa turakawa pue mampe teiteinalala natawa waneno osowe wandi leidie. Ita nolawa apanawa me nambanepe bautantoie antoie mukantoie waiase, “E winlene Iosep mampe iminla emmisitana.” Ita mo epe dewantone mampe me dewasaieno Isibt bolawa uduudu onien.
44 Tauma warere Iosep diene wanase, “Ne ipa warere; e dieedina mai mida da Isibt bedewe wisepie e amboiaepie meba insaisawa rua dima da dewasapi, diaida.”
45 Tane warere Isibtiwa ebou asiasi Iosep ebowa Sapenat-panea wane itun ita do bola debama On pirisiwa Potipera anoopa Asenat waneno naisen. Ita sape Iosep Isibt bolawa uduudu atoweleno onien.
46 Iosep enawa 30 wadeno Isibtiwa warereu atowelene me duwa bedewe nola ualen. Me nola ualene nosene Isibt bolawa uduudu ewamone alen.
47 Tane ena 7 bedewe Isibt tawowa bedewe maura debamaia segalen.
48 Ena sa 7 bedewe Iosep apana diamono maura sa uwauwantone auweiena Isibt bolawa debama deadea bedewe adibantoiena. Ita bola debama deadea bedewe nana sa irai bedewe uwauwantoia maida auwene adibantoiena.
49 Iosep nana sa adibaleno nopainta alen owa nelawa wisiasiawaia rua segalen. Sa baiwa Iosep nana wisiawa en.
50 Tane Iosep manainapa On pirisiwa Potipera anoopa Asenat sedawa nata gamomono aupe omana debama segalen.
51 Ita Iosep otopa tautuwa ebowa Manase wane itun. Ema ipawa me wane wanase, “Ne God sauneno poka daitada etedina nuaawawasana ita do mida ne mamana duwa bedewe waimoia mai insamopona, dia.”
52 Tane me otopa natawa ebowa Eparaim wane itun. Ema ipawa me wane wanase, “Ne poka etanaa bolawa bedewe wainedino God sedana nata amonalene nen.”
53 Tane Isibtiwa ena 7 bedewe maura debamawa mampo segalena tauma dialen.
54 Ita ena 7 da bedewe Iosep wana rua omana debamaia bola daitada bedewe ualen. Tane Isibt bolawa os bedewe nana winedie.
55 Ita walama sawo Isibt apanawa waimoia omana tomono antone warere iririsaia nana wanamopi. Ita warere mo uduudu diamone wanase, “E aitane Iosep ewana ita me dima dialepio rua dewasana.”
56 Bola uduudu bedewe omana segalen ita apana Isibtiwa wanwanlala omana pokawa etaidasaiena. Sa baiwa Iosep nana adibaledia duwa moawa wadaubaleno Isibt apanawa wimone nana gimaranton.
57 Omana debama segalene bola isiwa do kadimon. Sa baiwa bola sa apanawa wimone Iosep mampe nana gimarantoie.