7
Iawe God saua badowa Dawid mampe wan
1 Iawe God Dawid gonaasane ita kakaisan emalawoa apanawa mampo ita do muka wanena mo nanaumopi. Sa baiwa me duwa bedewe wanwan obasawa bedewe wandie.
2 Ita me peroweta Natan diene wanase, “Ne duna ia badowa eubu ebowa sida mampe wadawadala bedewe wainedina. Tane God sauawa badowa bokisiwa ape bedewe winede.”
3 Tane Natan warere diene wanase, “Iawe God ipa e do, aite dima inseiana rua dewasaa.”
4 Tane tadina sawo Iawe God Natan diene wanase,
5 “Aite ne nolana dewalala Dawid diee waase, ‘Iawe ema epe wade: Mai e ne duna wadawo bedewe wampa, dia.’ ”
8 Ne nolana dewalala Dawid diee waase, “Iawe God Mukamukaua ema epe wade:
‘Mapo e ipa ituaisilalaida pue ina naia bolawe sipsip oniamoie. Tane ne e sonabaene itueno Israel apanawa uwaula segaiten.
9 E naepe aitiano ne do sape antedine ita sauene emalawoa apanawa nanaumone ita aimona. Tauma ne e eboa debamasapa, tawo osowe apana ebou debamaleidia, rua.
10-11 Ne apanana Israelwa bolau wanamopa sape mo wanwan obasa bedewe wampudewae waimompa. Walama sawo uwauntompa apanawa ne teamono Israelwa oniamoie tane emalawoa apanawa mo poka wanamoie. Tauma mo ando mai epe dewantopua rua, dia. Ne mai osowe emalawoa apanawa dewamopo wimopue poka enalepu, dia. Ne Iawe God, e nosinosila do dewalepo warereitonuna.
12 Tane warere sa e dana bedewe eba obana bedeuwo dea sonabepo warerelepi. E gulaute boitawo nosinosia dobosamoienawo sape dobosaepu. Tane ne me dewasapo onionia apanawa mukamukaua segalepie gonaawa badowa enepi, mai mida me ituaisisapia rua.
13 Ita do mai mida wisepie me wanwanba bolawa wadepia rua, diaida. Me ando ne duna wadepi.
14 Ne ipa me mamba wananteapa ita me ne otona wanalepi. Naita me kadiwa dewasapia ne me poka wanapa, ambi oto mamba otopa poka wanedia, rua.
15 Tane ne nuawadawadana me mampe mai wadapaaubepa Sol mampe dewasana rua, dia. Ne warere Sol wadanaaubene aupe e ituedina warereitaa.
16 E dana ando mai enepiitudepi ita do e dana bedewe mo ando warerekasantopu.’ ”
17 Dima uduudu auen rua bedewe Natan Iawe God mampe etena umanawa Dawid benemasan.