Magtubu dənə̂ Mãr̰ĩ Jak 5

Gəsə̂ni gə ꞌyagə nare woni ꞌywa mani.

1 Dwayna gwale gə nə̂ wayang ꞌyeni woni ꞌywa mani di, bwana gura me, nulbənə̂ sədə̂gə me dara wamani gə ɓedangə̂ di. 2 Mani dan nə̂ ꞌywa di meyendə bam me barge dan kaw dəgən̰e law bam me ca. 3 Jəndar dan me gursə dan me kaw marəw yigə bam, marəw gə ta di, ha biyə̂ sandərang Mãr̰ĩ dərə̂wə̂ dara ba anə̂ al mani nə̂ acn̰e, me ha ulə̂ doni dan gə sədə̂ng bam ya duwa de me ca. Dara anə̂ dajəba mani nə̂ ꞌywa wala gə so ka ha pii gə ilə̂ ꞌyan̰a-lə̂ di. 4 Nare woni n̰ilə̂ swagə̂ managə yiga dan-ə̂ kaw, anə̂ ꞌyogəgə gursə day gə bərmə̂ duwa bə̂də̂. Dwayna nulə̂ day gə cendi nul dara darang di sən̰, nulə̂ gənə̂ nare woni n̰ilə̂ swagə̂ day di nəm yaa əndara managə Aba ciri gə Mãr̰ĩ gə dwana pad i əsə̂wə̂ di suməwə̂. 5 Anə̂ dam dodə̂ sən̰a lə̂ ka, mana gə ladəbeyə̂ me mani nə̂ dərə̂ng urgə me anə̂ ənbə al swani ya mani nə̂ paga nə̂ gə ha gandagə dara kunbə̂gə bam de. 6 Nare woni ala mani nə̂ təba da, anə̂ bogə gwale dədə̂gələ̂ me anə̂ ꞌyə̂gə bam me ca kaw, cendi tin̰ bədə̂gə way gwale bə̂də̂.

ꞌWo gə di bam wamani-yə̂

7 Chamran, unə̂ dədə̂ng bam bəra Aba ciri cwara duwa lə̂ ba. Yarna aba yiga sən̰, an̰ji u dəw bam bəra ɓedə gə sən̰a duwa də an̰ji yigədə di ba nanaw swagə̂ ladna. An̰ji ugə swagə̂ di dəw bam bəra ɓedə gə Mãr̰ĩ gaba ꞌwa dərin̰ nə̂ pii-yə̂ me gə targən̰ə̂ me ca. 8 ꞌYeni kaw unə̂ dədə̂ng bam me yinə̂ dusərə̂ng waynale dara cwara gənə̂ Aba ciri duwa da, wor i ib də̂n̰ ɗəm.

9 Kalna nulbə̂ gə kwanang gwale day ɗi, chamran, dara sanga kaw kal Mãr̰ĩ anang sariya bə̂də̂ me ca. Yarna aba agə nare sariya di yala ɗəbə lə̂ kulə bəwə̂ ib ɗəm, an̰ji ha dəmə̂ i kulə̂. 10 Chamran, kalna dusərə̂ng gunə̂ng managə woni waya Mãr̰ĩ bu nə̂ pii nə̂ way gwale gə suməw di dədə̂gələ̂ sən̰. Cendi ꞌwo dədə̂gə bam managə jiba day-ə̂ me ꞌyeni kaw alna yande me ca. 11 Sii ꞌywala di i dara nare nə̂ tanga pii woni ꞌwo dədə̂gə bam ya ta de di day. Anə̂ doy mana dənə̂ Job duwa me yə̂ə̂ duwa gə səw managə wamani gə ꞌyow dalawə̂ me mani nə̂ Aba ciri gə Mãr̰ĩ al gandəw di me ca, bə̂də̂ mo. Dara Aba ciri gə Mãr̰ĩ da, i gun gə dusəw ladə nan̰e me dərə̂w ꞌyə̂ngəw gun dəwə̂ me ca.

12 Chamran, pii pa da, kalna sərgə sədə̂ng gə daa bə̂də̂ me gə sən̰a bə̂də̂ me gə mani nə̂ ɗang bə̂də̂ me ca. Gwale dan gə anə̂ wayəw di: ina i «ə̂w» le i ə̂w, ina i «bə̂də̂» le i bə̂də̂ me ca, dara kal anə̂ bwarna managə sariya dənə̂ Mãr̰ĩ duwa lə̂ bə̂də̂ me ca.

Amsa gə Mãr̰ĩ dara woni mwom

13 Gun mən managə dwar̰angə̂ wamani ꞌywawe mo? A amsəna Mãr̰ĩ me gə ɗang dam ꞌywalalə̂ mo? A tunə̂ diri bwanaw gə Mãr̰ĩ jilay me ca. 14 Gun mən managə dwar̰angə mwom aləwe mo? A ꞌwagəna nare woni ɗəbə̂ nare nə̂nə̂ Mãr̰ĩ nə̂ dayar mana mən dərə̂gələ̂ amsənaw Mãr̰ĩ dəwə̂ me kwogədənaw swani dəwə̂ me gə Aba ciri suməw. 15 Amsa gə Mãr̰ĩ gə dusi də kala da, ha swa aba mwom di i daa me Aba ciri gə Mãr̰ĩ kaw ha ꞌyaw labiya me ha kala dusəw həlala managə acn̰a duwa dəwə̂ me ca. 16 Wayna acn̰a dan gəndəw daa, daa, managə dwar̰angə̂ me gun gə woy kaw amsəna Mãr̰ĩ dara jaw me dara kal anə̂ ꞌywana labiya. Dara gun gaba ala mani gə bərmə̂ duwa təba da, amsa duwa di dwana duwa ilə̂ nan̰e. 17 Abe gə gə ꞌogəw Eli da i gun gə wun ya nendə de me an̰ji amsa Mãr̰ĩ gə dwana dara Mãr̰ĩ ba ꞌwana bə̂də̂ me Mãr̰ĩ di ꞌwo bə̂də̂ al aliya subu gə durə kubi. 18 Managə ta lə̂ da an̰ji cor amsa Mãr̰ĩ ba ꞌwana bi, ər̰ə Mãr̰ĩ di ꞌwo me swagə̂ kaw dəm me naa sən̰a dədə̂ me ca.

19 Chamran, gun dan mən dwar̰angə̂ nwalna bərmə̂ gənə̂ gwale səw di bam me jaw gə ɗang walnaw cwanaw bi da. 20 Kalna dusərə̂ng gunə̂ng gwale gə ta di dəwə̂, gun gə cwanay aba ala acn̰a gə nol bam di bi managə bərmə̂ gə lade-yə̂ da, an̰ji ha bələw i daa made əsədələ̂ me Mãr̰ĩ kaw ha kala dusəw həlala managə acn̰a duwa gə nan̰ di dəwə̂ me ca.