Den sani san
Yesus tyari kon na krin
Wan wortu na fesi
A buku disi na a laste buku fu a Bijbel. Furu sma e bribi tak' a e taki fu den sani di sa psa te Masra Yesus o kon baka. A skrifiman na Yohanes. Den Romeinisma di ben e rigeri a pisten dati, ben poti Yohanes na strafu tapu a eilanti Patmos. Drape Masra Yesus sori en den sani san musu psa. Wan bigi krutu sa de. Gado o wini a ogriwan. A buku disi skrifi leki wan warskow gi den bribisma èn fu gi den dek'ati.
San de ini a buku disi:
Kristus sori ensrefi na Yohanes (1:1-20)
Den brifi gi den seibi gemeente (2:1 – 3:22)
Den seibi lenti (4:1 – 8:5)
Den seibi tutu (8:6 – 11:19)
A feti fu a bigi kaiman (12:1 – 14:20)
Den seibi strafu èn a kba fu Babilon (15:1 – 19:5)
A trow-oso fu a Lam, a nyun heimel nanga a nyun grontapu (19:6 – 22:21)
1
San Yesus sori Yohanes èn san A taigi en
1 Gado sori Yesus Kristus den kibrisani san musu psa her'esi, fu A kan tyari den sani disi kon na krin gi den knekti fu En. Dan Yesus seni En engel fu go sori En knekti Yohanes den sani disi.
2 Yohanes skrifi ala sani san a si, a boskopu san kmopo fu Gado, nanga ala sani san Yesus Kristus taki.
3 Blesi de tapu a sma di e leisi a boskopu disi fu Gado gi trawan. Blesi de tapu den sma tu di e yere a boskopu èn di e hori densrefi na san skrifi. Bika a ten de krosbei.
4 Mi Yohanes e skrifi den seibi gemeente na ini a distrikti Asia.
Mi e winsi unu a bun-ati
nanga a freide
fu Gado di de, di ben de,
èn di sa kon,
èn fu den seibi Yeye
di de na fesi En kownusturu,
5 èn fu Yesus Kristus:
a kotoigi di no e lei,
a fosi wan di opo baka na dede,
nanga a Basi fu ala kownu
na grontapu.
A lobi wi,
èn A ferlusu wi puru
na ini wi sondu nanga En brudu.
6 A meki wi tron wan folku
di abi Gado leki den Kownu,
èn A meki wi tron priester
fu Gado En P'pa.
Na En mus kisi grani nanga makti
fu têgo èn ala ten! Amen.
7 Luku, A e kon nanga den wolku,
èn ala sma sa si En,
srefi den wan di ben dyuku En
na En seibere.
Èn ala folku na grontapu
sa bari krei te den si En.
Iya, amen!
8 “Mi na a Alfa nanga a Omega.” Na so Masra Gado e taki, di de, di ben de, èn di sa kon. Na En abi ala makti.
San Yohanes si na Patmos
9 Mi, Yohanes, na wan bribisma leki unu, èn sma e pina mi leki fa den e pina unu. Mi srefi abi Gado leki mi Kownu, èn mi e hori doro leki unu, fu di un de wan ini Yesus. Den ben poti mi tapu a eilanti Patmos fu di mi ben tyari a wortu fu Gado, èn fu di mi ben kotoigi fu Yesus.
10 Tapu a dei fu Masra, a Yeye fu Gado ben de na mi tapu. Dan mi yere wan tranga sten na mi baka, leki a babari fu wan tutu.
11 A sten taki: “Skrifi san yu e si na ini wan buku, dan yu seni en go na den seibi gemeente di de ini den foto Efese, Smirna, Pergamum, Tiatira, Sardes, Filadelfia, nanga Laodisea.”
12 Di mi drai luku fu si suma e taki nanga mi, mi si seibi gowtu kandratiki.
13 Na mindri den kandratiki mi si wan Sma. A ben gersi wan mansma. A ben weri wan langa krosi te na En futu, èn A ben tai wan gowtu banti na En borsu.
14 En edewiwiri ben weti leki katun, a ben weti srefsrefi. Den ai fu En ben de leki faya.
15 En futu ben e brenki leki kopro di sma e faya na ini wan onfu, èn En sten ben de leki a babari fu wan bigi sula.
16 A ben abi seibi stari ini En let'anu, èn wan owru san ben srapu na ala tu sei ben e kmopo na ini En mofo. A fesi fu En ben e brenki leki a son na mindri dei.
17 Di mi si En, mi trowe misrefi na gron na En futu, dan mi tan didon leki mi dede. Ma A poti En let'anu na mi tapu dan A taki: “No frede. Mi na a Fosiwan nanga a Kriboiwan.
18 Mi na a Wan di e libi. Mi ben dede, ma luku, now Mi e libi fu têgo. Mi abi den sroto fu Dede nanga Dedekondre.
19 Yu mus skrifi den sani san yu ben si, den sani san e psa nownow, nanga den sani san o psa bakaten.
20 Mi o taigi yu san den kibritori wani taki: a wan fu den seibi stari san yu si na ini Mi let'anu, nanga a wan fu den seibi gowtu kandratiki. Den seibi stari na den seibi engel fu den seibi gemeente. Den seibi kandratiki na den seibi gemeente.”