11
Dios quiato nyeremo Dios cheẽ senei senei
1 Dios que uu mo mondo séoo cuu ra. Ñee ngue seje ra. —Eso Dios chuchua mbuchecha checha. Altar abe embuchecha. Ae mbia chɨ huee ñee ñee Dios je nae, ũquɨ̃ abe je contar ere rã.
2 Itaicuee ra erembuchechachɨ̃ jẽ. Patio ra erembuchechachɨ̃ jẽ. Ũquɨ̃ ngue amee mbia sequiatoã je ra. Sequiatoã nda irõ irõ Jerusalén ndese cuarenta y dos meses chee.
3 Sequiato nyeremo je ra sequirãcuã amee. Ũquɨ̃ nda secheẽ senei senei tuchɨ quia mbia je 1,260 días chee. Tiru rondeɨ ra ũquɨ̃ quereco quia, ɨ que seje ra.
4 Dios quiato nyeremo ndei olivos i nyeremo na sɨ́. Candeleros nyeremo na sɨ́ no. Sã Dios mbae reaquiatu ja no. Uquiato nyeremo abe ra eteaquiatu no.
5 Dios ra uquirãcuã mee ũquɨ̃ nyeremo je. Emo embasi serɨ̃ mose, tata ra embu embu uchuru sɨ. Ucuãyãsa mbasi tuchɨ sacuã. Eɨ̃ nda mbia mano mano, ũquɨ̃ Dios quiato nyeremo ucuãyã mose.
6 Ũquɨ̃ Dios quiato nyeremo ama mbuchaaqui eã arõte, Dios cheẽ nenei nenei mbeɨ mose mbia je. Mbae ruqui rã nda ama naa. Mbia ra embasi mbasi arõte uquirãcuã je. Ibi jend a mbasise mose, mbasi tuchɨ rae.
7 Ũquɨ̃ Dios quiato nyeremo Dios cheẽ nenei nenei ja mose mbia ja je, icuã nda tu ɨcuãte ee cote. Ibicua yenda. Icuã nda Dios quiato nyeremo ɨquia cote.
8-9 Emo ũquɨ̃ Dios quiato raaque nyati aroneate. Erete tiquia iríã nda chɨchõ itaicuee rɨ̃. Mbia mangue chooñoa jenda abe tuchɨ r a mae ja eraaque rese. Tres días y medio chee rae. Jerusalén ndei ra ũquɨ̃. Ae mbia Jesucristo mbucha ira rese nae, huee. Hue jenda quiarei eɨcuã tuchɨ mbia. Sodoma jenda rã. Egipto jenda rã abe no.
10 Ae mbia siqui quia ibi rɨ̃ nae, ũquɨ̃ ia tuchɨ rae. Dios quiato nyeremo mano mose. —Ae nandechɨao ɨcuã siquisã quisã nguia nae, ũquɨ̃ ngue mano cote ra, ɨ r a eyate ñee nyue. Nyebe ra eriqui mbae mondo mondo tuchɨ nyue.
11 Dios quiato nyeremo ndaaque que chɨ tres días y medio cuu ra. Aquere que Dios embuquera sɨ́ seque re cuu ra. Júã ngue cuu ra. Mbia que siquiche ja tuchɨ mae erese ra.
12 Ibatenda que ñee nyecua ũquɨ̃ Dios quiato nyeremo je cote ra. —Jenyu aa quiatu ibate, ɨ que Dios ñee ee ra. Nyoɨ que ibate ibei ye cuu ra. Eucuãyãsa que mae mbeɨte u echuɨ rese ra.
13 Aque mose tuchɨ que ibi nyere ɨcuã nda. Sucha tubɨrɨã ndɨbɨsho que ngoɨ ngoɨ jate ra. Mbia tubɨrɨãte que mano nda. Siete mil que mbia mano nda. Mbia ataque que siquichete ra. Ñee turã turãte que equia Dios ibatenda je cote ra.
14 Segundo mbae rasi chõ ã nde. Tercero quia tasenei jẽje cote.
Séptima trompeta mbucheẽ cote
15 Séptimo ángel que trompeta mbucheẽ cote no nda. Ũquɨ̃ mose que mbia ñeemombo ja ja ibatenda ra. Eɨ̃ ngue tasẽ tasẽ nda:
Mbia mo ibi jenda mo nda siquíã ererecuarã cote.
Dios ae chõ nda siqui ererecuarã cote. Nguiirĩ ndese.
Ae ae chõ nda siqui ererecuarã mbeɨ cote,
ɨ que ibatenda tasẽ tasẽ cuu ra.
16 Ae ameɨ veinticuatro siqui beɨte quia Dios jii nae, ũquɨ̃ ngue ngoi ngũíã ndese ñee Dios je cuu ra. Eɨ̃ ño ngue ñee nguiã:
17 Gracias ure tuchɨ quia ndeje co, Dios.
Ndequirãcuã mbae saã ja arõte quia co.
Ereɨco beɨte que equia nyii ra. Namo abe no. Ereɨco beɨte ra eno.
Ereɨco ndequirãcuã naanguquiate mbia je co cote.
Ereɨco mbia rerecuarã tuchɨ co cote.
18 Mbia rerecua que paama ɨte ndeje ra.
Co mose ra ndequiatoã erembasi cote.
Ndequiatoã mano je abe ra erembasi cote.
Ndequiato abe ra erembuquera cote.
Mbae turã mee mee sacuã ee.
Ae ndecheẽ senei senei mbeɨte quia mbia je nae.
Ae ñee turã turã nguia ndeje nae.
Ndequiato cuasu je. Ndequiato ñetẽ je abe no.
Ndequiato ja je ra mbae turã eremee mee cote.
Ae mbia mbɨɨcuã ɨcuã nguia nae, ũquɨ̃ nda erembutiã co mose cote,
ɨ que veinticuatro ameɨ ñee turã Dios je cuu ra.
19 Dios chuchua ibatenda ɨquesa que quiata seje cuu ra. Caja Dios chuchua jenda que nyecua seje cuu ra. Aque rei contrato riru Dios mbae aque. Aquere que ama pirirã pirirã ɨ ra. Ama ngue sieute ra. Ama ngue ñeete ra. Ibi que nyere ra. Iquitã abe que ngoɨ ngoɨ chee ra.