6
Yesuta꞉ Na꞉sa꞉tete da nane peekeeki
(Ma꞉tiu 13꞉53-58, Luku 4꞉16-30)
1 Yesuma꞉ koto pa꞉ta꞉ mina꞉pa꞉lao ipika꞉ disaipolo haliweki ame̱le̱ da nane pemekeme.
2 Kutupa mo Hoto Pila꞉ Natena꞉ Diu haliwekina꞉ pi hotu haemeke da tukiki pa꞉ta꞉ honda꞉ pamba puaata꞉ pi waleekeme. Mo yeni pu haemeke da pa꞉ta꞉ pitimiki wanda꞉hali wopuma꞉ opua penkilipa꞉tia pominolo hata꞉ alota꞉ Do wala꞉la꞉eki paeyaota꞉ ipikana꞉ma꞉ hando pa꞉ta꞉ opua pa꞉la꞉pe. Do halima꞉ ipikana꞉ma꞉ epeke honemanu ekipa handa꞉ wia mea pa꞉la꞉pe laa ipikana꞉ma꞉ wele pita꞉la꞉ ekimanu do aleke welema꞉ pita꞉la꞉pe.
3 Do halita꞉ kapenda hali dia꞉ya꞉ka꞉ta꞉pe laa Metina꞉ eiyeke dia꞉ya꞉ka꞉ta꞉pe. Dia꞉mesi Diosepe Diudasi make Saimono make ipika꞉ hameke titi dia꞉ya꞉ka꞉ta꞉pe laa Ipika꞉ beliki titi do pa꞉ta꞉ niki ame̱le̱ na halemepe lemekeme. Kutupa ipiki pa꞉ta꞉ honditi pitolo hata꞉ lemekeme.
4 Koto lemeke ekina꞉ Yesuma꞉ iki pa꞉ta꞉ alota꞉ potopede halita꞉ da ma꞉nda꞉ wanda꞉hali paeyaoma꞉ta꞉ ipika꞉ pi opu halemepate ipika꞉ da haleme wanda꞉halima꞉ make ipika꞉ tapake manuma꞉ make ikana꞉ma꞉ta꞉ ipika꞉ pi na opilimikie leekeme.
5 Kutupa Yesuma꞉ ipika꞉ da pa꞉ta꞉ hata꞉ wele pita꞉la꞉ ekimanu pia꞉peke na yeekepate pa yeni hayeke wanda꞉halimanu ipika꞉ kikima꞉ minaa ika꞉ yeni tandelaeyekeme.
6 Ika꞉ hone na tulaemeke ekina꞉ Yesuma꞉ penkilipa꞉tia pominolo hata꞉ ikita꞉ ekipeke pi na opitolo pitelemepe hone wiekeme. Kutupa mo da ma꞉nda꞉ pa꞉ta꞉manu pominolo hata꞉ pi wala꞉tiki piekeme.
Yesuma꞉ ipika꞉ disaipolo haliweki tapaeyekeeki
(Ma꞉tiu 10꞉5-15, Luku 9꞉1-6)
7 Kutupa Yesuma꞉ mo hande 12 haliweki ipiki pa꞉ta꞉ epena꞉yeke wi la꞉ mea yaapo la la pu tapa tapa piekeme. Ikana꞉ma꞉ mo hoke temokomanu tolu lina꞉yeke ipika꞉ wele pita꞉la꞉eki haleekeme.
8 Kutupa mana꞉ alo hata꞉ alota꞉ Tumapu homeke mea minaa ala꞉ta꞉ ma꞉nda꞉ na mea miniki pua꞉pa꞉peke laata꞉ tia nu make mani make na mea pua꞉pa꞉peke.
9 Anke dake pambaota꞉ sedi yaapo atulao na pambaake pua꞉pa꞉peke leekeme.
10 Pi ma꞉nda꞉ make alota꞉ Da ma꞉nda꞉ hala꞉ alena꞉ pemeka꞉na꞉ta꞉ hali ma꞉nda꞉na꞉ da pa꞉ta꞉ pelia haluekema꞉ honda꞉ pambemeka꞉na꞉ta꞉ kota꞉ koto da pa꞉ta꞉ homeke hao hapa꞉peke. Kutupa mo damanu mina꞉pa꞉lao da ma꞉nda꞉ hala꞉ alena꞉ pemeka꞉na꞉ta꞉ titina꞉ honda꞉ pamba pua haeme data꞉ mina꞉pa꞉lao pua꞉pa꞉peke leekeme.
11 Da ma꞉nda꞉ nane pemeka꞉na꞉ta꞉ iki na handa꞉ mimika꞉na꞉ta꞉ ika꞉ pi na opimiki kiaemeka꞉na꞉ta꞉ kota꞉ koto da pa꞉ta꞉ na hake pemeka꞉na꞉ta꞉ ika꞉ ankena꞉ tala꞉la꞉ dokolo tandelapa꞉peke. Mo wanda꞉halima꞉ kiaemekeeki tombo waluekema꞉ tandelapa꞉peke leekeme.
12 Kutupa mo disaipolo haliwekima꞉ puaata꞉ wanda꞉hali pa꞉ta꞉ pi walolo hata꞉ alota꞉ Hone ma꞉nda꞉ la꞉ka꞉la wia꞉pa꞉peke laata꞉
13 hoke temokomanu wopu tolu liaata꞉ yeni haemeke wanda꞉hali wopuna꞉ youna꞉ honkuma꞉ handeke ale lekeeki holaota꞉ tandelena꞉ peaemekeme.
Bapitaisi peao hayeke hali Dionita꞉ homeekeeki
(Ma꞉tiu 14꞉1-12, Luku 9꞉7-9)
14 Wanda꞉halima꞉ Yesuna꞉ biki kende tupa꞉ wina꞉ lemeke handaa Kini Hetodima꞉ Yesuma꞉ tapaeyeke haliwekima꞉ pieke ekimanu opiekeme. Mandane wanda꞉halima꞉ alota꞉ Bapitaisi peao hayeke hali Dionita꞉ homa kone paa tiao pia꞉ka꞉ta꞉me laa koto pa꞉la꞉ ekima꞉ do wele pita꞉la꞉ ekimanu pitolo pia꞉ka꞉ta꞉me lemekeme.
15 Koto lemekepate mandane wanda꞉halima꞉ alota꞉ Ipikita꞉ Elaidia ya꞉ka꞉ta꞉me lemekepate mandane wanda꞉halima꞉ alota꞉ Ipikita꞉ potopede hali ma꞉nda꞉ ya꞉ka꞉ta꞉me laa amba꞉ kone hayeke hali tupa꞉ ya꞉ka꞉ta꞉me lemekeme.
16 Hetodima꞉ koto pimanu opua alota꞉ Ipikita꞉ Dionie. I̱ma꞉ you tunkulua꞉ hali tiao pia꞉ka꞉ta꞉me leekeme.
17 Amba꞉ta꞉ Hetodima꞉ Dioni yola꞉ mea epena꞉yeke haliweki tapaota꞉ Dionita꞉ tonkao dipula mea lopaeyekeme. Hetodiasima꞉ honke leeke handaa piekeme. Hetodiasita꞉ Hetodina꞉ hameke Pilipina꞉ wanda꞉ hayekepate Hetodima꞉ petolo miekeme.
18 Dionima꞉ Hetodi pa꞉ta꞉ pi amba꞉ leekeeki dupa. Naka꞉ kamena꞉ wanda꞉ petolo mele ekita꞉ ana꞉ na pa꞉la꞉me leekeme.
19 Koto leeke handaata꞉ Hetodiasima꞉ Dioni pa꞉ta꞉ mineke pankolo hata꞉ luekema꞉ ho̱linda꞉lu hayekepate lia꞉peke na yekeme.
20 Hetodima꞉ta꞉ Dionina꞉ tiki tiki hau pu hayekeeki make yako piki hali make handeeke handaata꞉ ipiki pa꞉ta꞉ paala꞉ma꞉ homolo hata꞉ panka mea hao hayekeme. Dionima꞉ wala꞉tiki pieke pimanu Hetodima꞉ opua weiya꞉tiki piekepate ta꞉na꞉ma꞉ homa opua꞉tiki piekeme.
21 Hetodima꞉ ipika꞉ mendieke nate epeeke handaata꞉ ne pambuluekema꞉ ipika꞉ kapomani tumiki haliweki make ipika꞉ a꞉nda꞉ tumiki haliweki make Ka꞉lili nane haemeke hali tieke tieke make wi la꞉ mepi pieke a꞉pa mombelemekeme. Koto dina꞉ta꞉ Hetodiasima꞉ Yaka natee hone wiekeme.
22 Hetodiasina꞉ wanekema꞉ a꞉paata꞉ keliapo pambolo hata꞉ Hetodi make epemeke haliweki make ta꞉na꞉ma꞉ homaeyeke handaa kini halima꞉ mo wandiki pa꞉ta꞉ alota꞉ Naka꞉ hone pa꞉la꞉ ale I̱ pa꞉ta꞉ honke leka꞉na꞉ta꞉ ota꞉ kulueke leekeme.
23 Mo wandiki pa꞉ta꞉ la꞉ witolo hata꞉ alota꞉ Naka꞉ hone pa꞉la꞉ ale I̱ pa꞉ta꞉ honke leka꞉na꞉ta꞉ ota꞉ kulueke. Ya kilu tombuao hala꞉eki kone putupa ota꞉ kulueke leekeme.
24 Koto leeke handaa mo wandikima꞉ puaata꞉ ipika꞉ ama꞉ pa꞉ta꞉ lota꞉ pea alota꞉ Aleke honke lonope leekeme. Mo wanda꞉ma꞉ alota꞉ Bapitaisi peao haya꞉ hali Dioni ipika꞉ you honke lae leekeme.
25 Kutupa mo wandikima꞉ koto kone kini hali pa꞉ta꞉ a̱i̱ a꞉pa honke alo hata꞉ alota꞉ Yaka hone pa꞉la꞉ aleta꞉ mo bapitaisi peao haya꞉ hali Dionina꞉ youta꞉ metekina꞉ wia ame do kone kuelena꞉e leekeme.
26 Mo kini halima꞉ ipika꞉ pukima꞉ tanda wotu homeekepate mo la꞉ wieke pimanu leeke handaa make mo epemeke haliweki haemeke handaa make ipika꞉ pi tunkula꞉peke na yeeke handaata꞉
27 kota꞉ koto kone ipikana꞉ma꞉ ipika꞉ a꞉ndeli miniki hali homekema꞉ Dionina꞉ you tunkulu mea epena꞉yeke tapaeyekeme. Kutupa mo halima꞉ puaata꞉ dipula da pa꞉ta꞉ Dionina꞉ you tunkula
28 metekina꞉ wia mea a꞉paata꞉ mo wandiki pa꞉ta꞉ haleekeme. Mo wandikima꞉ meata꞉ ipika꞉ inkiki pa꞉ta꞉ haleekeme.
29 Dionina꞉ disaipolo haliweki manuma꞉ opuaata꞉ ipika꞉ toko mulu puaata꞉ toopi ka꞉ka꞉na꞉ pa꞉ta꞉ pua tu wimikime.
Pi mea pemeke haliwekita꞉ paa epemekeeki
(Luku 9꞉10)
30 Hande tapaeyeke haliwekima꞉ Yesu pa꞉ta꞉ paa a꞉paata꞉ ika꞉ pi walemeke ekimanu make ika꞉ pimiki ekimanu paeyao make Yesu pa꞉ta꞉ lemekeme.
31 Wanda꞉hali wopu pa a꞉pa꞉tiki pua꞉tiki pimiki handaa Yesu ipika꞉ disaipolo haliweki ame̱le̱ ne napeke nate dia꞉ yeekeme. Koto ekina꞉ Yesuma꞉ iki pa꞉ta꞉ alota꞉ Iki homeke pomana꞉ ipupe. Mo Keneme nane hoto siki pitulu pomana꞉e leekeme.
32 Kutupa amba꞉ hande kawasona꞉ pita keneme nane pemekeme.
33 Keneme nane pemekepate wanda꞉hali wopuma꞉ ika꞉ pemekeeki handolo hata꞉ dota꞉ handa꞉ haliweki ya꞉ka꞉ta꞉me hone wimikime. Ikana꞉ma꞉ daoni paeyao mina꞉pa꞉lao anke hao paka꞉lao puaata꞉ Yesu ameda a̱i̱ na opolo yapemeke haena꞉ iki amba꞉la opolo yapemekeme.
34 Yesuma꞉ mo kawaso mina꞉pa꞉lao kenke nane opolo pulu hata꞉ wanda꞉hali wopu handaata꞉ ikita꞉ mo handeteke hala꞉ hali dia꞉ ya꞉la꞉ sipisipi ma꞉na꞉manu tupa꞉ handaata꞉ ipika꞉ pukima꞉ e̱ alo hata꞉ iki pa꞉ta꞉ a꞉ta꞉ma꞉ homeekeme. Kutupa pimanu wopu waleekeme.
Yesuma꞉ 5 daoseni haliweki pa꞉ta꞉ ne haleekeeki
(Ma꞉tiu 14꞉13-21, Luku 9꞉10-17, Dioni 6꞉1-14)
35 Kutupa nate paeta꞉leke handaa ipika꞉ disaipolo haliwekima꞉ ipiki pa꞉ta꞉ a꞉pa alota꞉ Do aneta꞉ keneme nanee. Ameta꞉ nate paeta꞉la꞉me laa
36 topu da aneke da pa꞉ta꞉manu make wanda꞉halima꞉ ne hamba꞉tiki pena꞉ tapa tapa pie lemekeme.
37 Koto lemekepate Yesuma꞉ iki pa꞉ta꞉ alota꞉ Ikana꞉ma꞉ nemanu mandaneeki mea hala꞉pa꞉peke leekeme. Ikana꞉ma꞉ ipiki pa꞉ta꞉ alota꞉ Nikana꞉ma꞉ 200 kina mea pua palaowa hambaata꞉ iki nena꞉yeke halomono alepe lemekeme.
38 Kutupa ipikana꞉ma꞉ iki pa꞉ta꞉ alota꞉ Mo palaowa kitiki siki ekipu halemepe handolo pupe leekeme. Kutupa ikana꞉ma꞉ handaa paa a꞉pa alota꞉ Yunki hata꞉ ula꞉me kutupa ta꞉pelita꞉ yaapo ula꞉me lemekeme.
39 Koto lemeketa꞉ Yesuma꞉ iki pa꞉ta꞉ pi alo hata꞉ alota꞉ Mo noma꞉ seliapona꞉ momba꞉la pituma꞉ pituma꞉ pea pita꞉pe leekeme.
40 Koto ekina꞉ mo hande momba꞉la pituma꞉ pituma꞉ pemeke wanda꞉halita꞉ mandaneeki 100 tupa꞉ mandaneeki 50 tupa꞉ pituma꞉ pituma꞉ pea pitimikime.
41 Kutupa Yesuma꞉ hande palaowa kitiki siki yunki hata꞉ make hande ta꞉peli yaapo make minaata꞉ ya nane handa꞉liao Koda꞉ pa꞉ta꞉ keiyae laata꞉ palaowa kitiki sunu pindi pindi pea ipika꞉ disaipolo haliwekima꞉ mea wanda꞉hali mina꞉yeke hale hale piekeme. Ipikana꞉ma꞉ ta꞉peli yaapo make pindi pindi pea disaipolo haliwekima꞉ hale hale pina꞉ haleekeme.
42 Paeyaoma꞉ naaka꞉na꞉ta꞉ Weleke tala꞉me lemekeme.
43 Mo wanda꞉hali pa꞉ta꞉ pa wieke palaowa ta꞉peli putu piliki pa wieke ekimanu meata꞉ nu 12 tumbaemekeme.
44 Kutupa hande palaowa kitiki sunu nemeke haliwekita꞉ 5 daoseni haliwekie.
Yesuta꞉ ikali manda peekeeki
(Ma꞉tiu 14꞉22-33, Dioni 6꞉15-21)
45 Koto kone Yesuma꞉ ipika꞉ disaipolo haliweki pa꞉ta꞉ alota꞉ Kawasona꞉ pita mone tea꞉na꞉ hala꞉ da Betesaida da pa꞉ta꞉ iki amba꞉la opolo pua꞉pa꞉peke laata꞉ mo hande wanda꞉hali wopu tapa tapa piekeme.
46 Kutupa Yesuma꞉ mo disaipolo haliweki mina꞉pa꞉laota꞉ pote pa꞉ta꞉ yeni pulu peekeme.
47 Timba꞉leke hauta꞉ kawaso ikali tukikina꞉ pulu haena꞉ ipika꞉ honu makesiki kenkena꞉ hayekeme.
48 Yesuma꞉ handaata꞉ ipika꞉ disaipolo haliwekima꞉ deli awolo hata꞉ po tieke wenoko nane epeeke handaa weleke we pimikieki handeekeme. Koto ekina꞉ da ka꞉la꞉puluekema꞉ okona꞉ Yesuta꞉ mo haliweki haemeke alena꞉ poluekema꞉ ikali manda ankena꞉ peekeme. Lombei pu pa poluekema꞉ hone wiekepate
49 mo haliwekima꞉ ipiki ikali manda ankena꞉ peekeeki handaata꞉ temokopate ipula꞉me hone witolo hata꞉ e̱ wi lemekeme.
50 Paeyaoma꞉ ipiki handolo hata꞉ paala꞉ma꞉ wotu homemekeme.
Kutu pimikipate koto kone Yesuma꞉ iki pa꞉ta꞉ pi alo hata꞉ alota꞉ Honkopu hape. Dota꞉ I̱e. Paala꞉ma꞉ na homa꞉pepee leekeme.
51 Kutupa Yesuta꞉ mo kawasona꞉ iki ame̱le̱ pitulu peeke haena꞉ta꞉ po tieke tunkuliekeme. Kutu pieketa꞉ mo haliwekima꞉ penkilipa꞉tia pomimikime.
52 Pa ekipeke ikana꞉ma꞉ta꞉ mo hande 5 daoseni wanda꞉hali pa꞉ta꞉ palaowa kitiki sunu telipieke ekina꞉ teketa꞉ hone lenkipa na wimiki ekiyalo hone na wimikime.
Kenesatete pa꞉ta꞉ pemekeeki
(Ma꞉tiu 14꞉34-36)
53 Mo kawasona꞉ ikali tunkula puaata꞉ Kenesatete nane opolo puaata꞉ mo kawaso a꞉ndimikime.
54 Kawaso mina꞉pa꞉laemeketa꞉ kutaa kone wanda꞉halima꞉ ipika꞉ leke popeleke handolo hata꞉ hone wimikime.
55 Koto ekina꞉ koto da nina꞉ a̱i̱ya pua mo yeni hapa wieke wanda꞉hali tilina꞉ mu wiaata꞉ Yesu hayeke pa꞉ta꞉ mea pemekeme.
56 Yesu peeke alena꞉ paeyao pa꞉ta꞉ da nane make daonimanu make topu topu da nina꞉ make opolo peeke dina꞉ da nane yeni hapa wimiki wanda꞉hali mea tia pua makedi yalao tu uma꞉ uma꞉ pimikime. Kutupa mo wanda꞉halima꞉ Yesuna꞉ dau honiki wataaluekema꞉ honke lemekeme. Wataemeke wanda꞉halina꞉ yeni tandelemekeme.